އިސްރާއިލުން އީރާނަށް އިތުރު އެއްވެސް ހަމަލާއެއް ދީފިނަމަ އިޒްރޭލުގެ ހަކަތަ އާއި ގޭސް ރައްކާކުރާ މަރުކަޒުތަކަށް އީރާނުން ހަމަލާދޭނެ ކަމަށް އީރާނުގެ އެންމެ އިސްވެރިޔާ އާޔަތުالله ޢަލީ ޚާމަނާއީ ވިދާޅުވެއްޖެއެވެ. އާޔަތުالله ޢަލީ މިހެން ވިދާޅުވީ ތެހެރާނުގައި ހުންނަ އިމާމް ޚުމެއިނީ ގްރޭންޑް މޮސައްލާ މިސްކިތުގައި މިއަދުގެ ހުކުރު ނަމާދަށް ފަހު ރައްޔިތުންނާއި ބައްދަލުކުރައްވައި ދެއްކެވި ވާހަކަފުޅުގައެވެ.

"އެ މީހުން އެފަދަ ގޯހެއް ހަދައިފި ނަމަ، އެ މީހުންގެ ހަކަތައިގެ ހުރިހާ ވަސީލަތްތަކާއި އިންސްޓޯލްމަންޓާއި ހުރިހާ ރިފައިނަރީތަކާއި ގޭސް ރައްކާކުރާތަންތަނަށް ހަމަލާދޭނަން."- އާޔަތުالله ޢަލީ ޚާމަނާއީ

Ad by Hajj Corporation

އީރާނުން މިފަދައިން ބުނެފައިމިވަނީ އިސްރާއީލުން އީރާނަށް ވަރުގަދަ ރައްދު ހަމަލާތަކެއް ދޭނެ ކަމުގެ އިންޒާރު ދީފައިވަނިކޮށެވެ. އީރާނުން އިސްރާއީލަށް ސީދާ ހަމަލާއެއް ދިނީ އިސްރާއިލުން ހަމާސް އަދި ހިޒްބުﷲގެ އިސް ލީޑަރުން ތަކެއް ޝަހީދުކުރުމާއި ގުޅިގެން އޭގެ ބަދަލުގައެވެ. އީރާނުން ވަނީ އިސްރާއީލުން ފަލަސްތީނުގައި ހިންގަމުންދާ އިސްތިއުމާރީ ހަރަކާތްތައް ހުއްޓާލަންދެން އިސްރާއީލަށް ހަމަލާދޭނެ ކަމަށް ވެސް ބުނެފައެވެ.

"އަހަރުމެންގެ ލީޑަރުން ޝަހީދުވިޔަސް އަހަރުމެން ފަހަތަށް ނުޖެހޭނަން، އަހަރުމެން ކާމިޔާބު ހޯދާނަން. އިސްރާއީލަކަށް އަހަރުމެންގެ މައްޗަކަށް ކުރިއެއް ނުހޯދޭނެ."- އާޔަތުالله ޢަލީ ޚާމަނާއީ

ފަލަސްތީނަށް ތާއީދުކުރާ ގިނަ ބަޔަކު މިއަދުގެ ހުކުރު ނަމާދަށް ފަހު ޝަހީދުވި ހަމާސް އަދި ހިޒްބުﷲ ގެ އިސް ލީޑަރުންގެ ފޮޓޯ ހިފައިގެން އިމާމް ޚުމެއިނީ ގްރޭންޑް މޮސައްލާ މިސްކިތް ކުރިމައްޗަށް އެއްވެފައިވެއެވެ.

އީރާނުގެ އަސްކަރީ ޖަމާއަތް ކަމަށްވާ އީރާން ރިވޮލިއުޝަނަރީ ގާޑަކީ އެގައުމުގެ ޚާރިޖީ ސިޔާސަތު ތަންފީޒުކުރުމުގައި ބޮޑު ދައުރެއް އަދާކޮށް، އިގްތިސާދުގެ ބޮޑު ބައެއްގެ ހިއްސާ އޮންނަ ޖަމާއަތެކެވެ. ލުބުނާނުގެ ހިޒްބުالله އާއި ފަލަސްތީނުގެ ހަމާސް ފަދަ ޖަމާއަތްތަކާއި އޮންނަ ބަދަހި ގުޅުމުގެ ސަބަބުން މެދުއިރުމަތީގައި އީރާނުގެ ނުފޫޒު ވަނީ އިތުރަށް ވަރުގަދަވެފައެވެ.