ސިިޑްނީގެ ބޮންޑައި ބީޗުގައި ހަތިޔާރު އެޅި ދެ މީހުން ދިން ބަޑީގެ ހަމަލާ ދިވެހި ސަރުކާރުން ކުށްވެރިކޮށްފިއެވެ.

އޮސްޓްރޭލިއާގައި ޔަހޫދީންގެ ބާތިލް "ޢީދެއް" ފާހަގަކުރަމުންދަނިކޮށް ދިން މި ހަމަލާގައި 15 މީހުން މަރުވެ 38 މީހުން ޒަހަމްވެފައިވާކަމަށް ރިޕޯޓުތައް ބުނެއެވެ.

Ad by Hajj Corporation

ހާރިޖީ ވުޒާރާއިން ނެރުނު ބަޔާނުގައި އޮސްޓްރޭލިއާގެ ސިޑްނީގެ ބޮންޑައި ބީޗުގައި ހަތިޔާރު އެޅި ދެ މީހަކު ދިން ޓެރަރިސްޓް ހަމަލާ ހަރުކަށި އިބާރާތުން ކުށްވެރިކޮށް މި ހަމަލާއަކީ ލާއިންސާނީ އަމަލެއްގެ ގޮތުގައިވަނީ ސިފަކޮށްފައެވެ.

މި ހާލަތުގައި ދިވެހި ސަރުކާރުން އޮންނާނީ އޮސްޓްރޭލިއާގެ ސަރުކާރާއިއެކުގައިކަމަށާއި އަދި ރާއްޖެ އިން އަބަދުވެސް މަސައްކަތް ކުރާނީ ޓެރަރިޒަމާ ދެކޮޅަށް ކަމަށް ވެސް ބަޔާންނުގައިވެއެވެ.

އޮސްޓްރޭލިއާގެ ސިޑްނީ ސިޓީގައި ދިން މިހަމަލާތަކަކީ ސީދާ އެ އިވެންޓަށް އަމާޒުކޮށް ދިން ހަމަލާތަކެއް ކަމަށް ރިޕޯޓުތައް ބުނެއެވެ.

ހަމަލާދެމުންދަނިކޮށް ހަމަލާދިން މީހުންގެ ތެރެއިން އެކަކަށް ހުރަސްއަޅައި އެމީހާގެ އަތުން ބަޑި އަތުލީ މުސްލިމެއްކަން ވަނީ ކަށަވަރުވެފައެވެ. އޮސްޓްރޭލިއާގެ މީޑިއާތަކުން ރިޕޯޓުކުރާގޮތުގައި ޔަހޫދީންނަށް ދެމުންދިޔަ ހަމަލާތަކަށް ހުރަސްއެޅީ އަޙުމަދު އަލް އަޙުމަދު ކިޔާ ސިޑްނީގެ ސަދަލޭންޑް ޝަޔަރއަށް އުފަން މުސްލިމެކެވެ. ހަމަލާ ހުއްޓުވަން އުޅުމުގެ ތެރޭގައި އަހުމަދަށްވެސް އެކިވަރުގެ ޒަހަމްތައް ލިބިފައިވާއިރު ހުޅަނގުގެ މީޑިއާތަކުން އަންނަނީ އަހުމަދުގެ ހިތްވަރުގެ ވާހަކަ ދައްކަން ދެކޮޅުހަދަމުންނެވެ. ސަބަބަކީ އޭނާއަކީ މުސްލިމެއްކަމަށްވާތީކަމަށް ގިނަ ފަރާތްތަކަކުން ދެކެއެވެ.

އޮސްޓްރޭލިއާގެ މުސްލިމުންވެސް ވަނީ މި ހަމަލާ ކުށްވެރިކޮށް ހާދިސާގައި މަރުވި މީހުންނަށް ތައުޒިޔާ ކިޔާފައެވެ.