އއ. އުކުޅަހުން ރަޝިއާއަށް ނިސްބަތްވާ ފަތުރުވެރިއަކު ގެއްލިގެން ހޯދަން ފަށައިފިއެވެ.

އުކުޅަހު ކައުންސިލުން ސޯޝަލް މީޑިއާގައި ހިއްސާ ކުރި ޕޯސްޓެއްގައި ބުނެފައިވަނީ، އެ މީހާ އަކީ އެ ރަށު ލަ ޕަލްމާ ސްޓޫޑިއޯގައި ހުރި މީހެއް ކަމަށާއި،އޭނާ ފުރަން ހަމަޖެހިފައި ވަނީ މިއަދު ކަމަށެވެ. ނަމަވެސް އަދިވެސް އޭނާގެ ޚަބަރެއް ނުވާ ކަމަށް ވެސް އެ ޕޯސްޓުގައި ބުނެފައި ވެއެވެ.

Ad by Hajj Corporation

އަދި އޭނާ އެންމެ ފަހުން ފެނިފައިވަނީ އިއްޔެ ހަވީރު ކަމަށާއި، އަދި އޭނާގެ ފޯނާއިއެހެނިހެން ތަކެތި އޭނާ އުޅުނު ކޮޓެރީގައި ހުރި ކަމަށް ވެސް އެ ރަށު ކައުންސިލުން މައުލޫމާތު ދެއެވެ.

ލަ ޕަލްމާ ސޫޓްސްއިން ބުނި ގޮތުގައި ގެއްލިފައިވަނީ، ރޯމަން ލުރޮޗްކިން ކިޔާ، އުމުރުން 48 އަހަރުގެ މީހެކެވެ. އޭނާ އެ ހޮޓަލަށް ޗެކްއިން ވެފައިވަނީ މިދިޔަ ހޯމަ ދުވަހެވެ.

އުކުޅަހު ކައުންސިލުން ވަނީ އެ މީހާއާ ގުޅޭ މައުލޫމާތެއް ލިބިއްޖެ ނަމަ ލަ ޕަލްމާ ސޫޓްސްގެ ނަންބަރު 9646363އަށް ނުވަތަ އުކުޅަހު ޕޮލިސް ޑެސްކް 9553510 އަށް ގުޅުމަށް އެދިފައެވެ.

އެ މައްސަލައާ ގުޅޭ ގޮތުން މިހާތަނަށް ފުލުހުންގެ ބަހެއް ލިބިފައިނުވެއެވެ.