ސައުދީ އަރަބިއްޔާގެ ރިޔާދުގައި ކުޅުނު ސުޕަރކޮޕާ އިޓާލިއާނާގެ ސެމީ ފައިނަލްގައި ވަރުގަދަ ޓީމު އިންޓަރ މިލާން ޕެނަލްޓީ ޖަހައިގެން ބަލިކޮށް ބޮލޯނިއާ ތާރީޚީ ފައިނަލުން ޖާގަ ހޯދައިފިއެވެ. މި ކާމިޔާބީއާއެކު ބޮލޯނިއާ މި ހޯމަ ދުވަހު ފައިނަލުގައި ނަޕޯލީއާ ދެކޮޅަށް ނިކުންނާނެއެވެ.

މެޗުގެ ފުރިހަމަ ވަގުތު ހަމަވިއިރު ދެ ޓީމު ވެސް އެއްވަރުވެފައި އޮތީ މާކަސް ތޫރާމް އިންޓަމިލާނަށް ޖަހައިދިން ގޯލަކާ ރިކާޑޯ އޮރްސޮލީނީ ބޮލޯނިއާ އަށް ޖަހައިދިން ގޯލަކާއެކު މެޗު ހަމަހަމަވެގެންނެވެ. ޕެނަލްޓީ ޖެހުމުގައި ފަސް ޕެނަލްޓީ ބޭކާރުވިއިރު، ބަދަލު ކުޅުންތެރިޔާ ސީރޯ އިމޮބިލޭ ވަނީ ފަހުޕެނަލްޓީ ގޯލުގެ ދަނޑީގައި ޖެހިފައި ވަދެގެން ބޮލޯނިއާވަނީ ފައިނަލަށް ދަތުރުކޮށްފައެވެ.

Ad by Hajj Corporation

ބޮލޯނިއާއިން މި ކާމިޔާބީ ހޯދިއިރު، އެ ޓީމުގެ މުހިންމު ކުޅުންތެރިން ކަމަށްވާ ގޯލްކީޕަރު ލޫކަސްޒް ސްކޮރަޕްސްކީ، ރެމޯ ފްރެއުލާ، އަދި ނިކޮލޯ ކަސާލޭ ނުލައެވެ. އަނެއްކޮޅުން، އިންޓަރ ޓީމުގައި ވެސް ޑެންޒެލް ޑަމްފްރީސް، ފްރެންޗެސްކޯ އެޗެރްބީ، މާޓިއޯ ޑާރމިއަން، އަދި ރައްފައެލް ޑީ ޖެނާރޯ ނެތް ނަމަވެސް، މެޗުގެ ބޮޑު ބައި ކޮންޓްރޯލް ކުރިއިރު ވެސް އެކަމުގެ ފައިދާ ނަގާކަށް އިންޓަރ ވަނީ ނުކުޅަދާނެވިއެވެ.

މި މުބާރާތުގެ އާ ފޯމެޓްގައި އިތުރު ވަގުތެއް ނުކުޅޭ ގޮތަށް ހަމަޖައްސާފައިވާތީ، ސެމީ ފައިނަލް ސީދާ ޕެނަލްޓީއަށް ދިޔައީއެވެ. މި ޕެނަލްޓީ ޝޫޓްއައުޓްގައި ގިނަ ޕެނަލްޓީތަކެއް ބޭކާރުވުމަށްފަހު، އިމޮބިލޭގެ ހަމަޖެހުމާއެކު ބޮލޯނިއާއަށް މި ބޮޑު ކާމިޔާބީ ލިބުނެވެ. ނަޕޯލީ ވަނީ މިދިޔަ ބުރާސްފަތި ދުވަހު އޭސީ މިލާން 2-0 އިން ބަލިކޮށް ފައިނަލުން ޖާގަ ހޯދާފައެވެ. މި ނަތީޖާއާއެކު ކޮޕާ އިޓާލިއާގެ ޗެމްޕިއަނާއި ސެރީ އާ ޗެމްޕިއަން ބައްދަލުކުރާ ފޯރިގަދަ ފައިނަލެއް ފެނިގެންދާނެއެވެ.