އިޓާލީގެ ވާދަވެރި ދެ ޓީމު ކަމަށްވާ އިންޓަރ މިލާން އާއި އޭސީ މިލާން ދެމެދު ކުޅުނު ކޮޕާ އިޓާލިއާގެ ސެމީ ފައިނަލް މެޗުން 3-0 ގެ ނަތީޖާއަކުން އިންޓަރ މިލާން ބަލިކޮށް، އޭސީ މިލާން ވަނީ ފައިނަލަށް ގޮސްފައެވެ. މިއާއެކު މިސީޒަނުގައި އިންޓަރ ޓްރެބްލް (ތިން ތަށި) ހޯދުމަށް ކުރަމުން އަންނަ މަސައްކަތަށް ވަނީ ނިމުން އައިސްފައެވެ.

މި ދެ ޓީމުގެ މެދުގައި ކުޅުނު ފުރަތަމަ ލެގް 1-1 އިން އެއްވަރުވެފައިވާއިރު، ރޭ ކުޅުނު ދެވަނަ ލެގްގެ ނަތީޖާއާ އެކު އޭސީ މިލާނަށް ވަނީ 4-1 ގެ އެގްރިގޭޓް ނަތީޖާއަކުން ކުރިއަށް ދެވިފައެވެ. ރޭގެ މެޗުގައި، އިންޓަރ މިލާނުން ގިނަ ވަގުތު ބޯޅަ ހިފަހައްޓައިގެން ކުޅުނު ނަމަވެސް، އެ ޓީމަށް ވަނީ ގޯލެއް ނުޖެހިއެވެ.

މެޗުގެ 36 ވަނަ މިނެޓުގައި އޭސީ މިލާނުގެ ސްޓްރައިކަރު ލޫކާ ޖޮވިޗް ވަނީ ފުރަތަމަ ލަނޑު ޖަހައި އެ ޓީމަށް ކުރި ހޯދައިދީފައެވެ. އަދި ދެވަނަ ހާފުގެ ކުޅުން ފެށިތާ ހަތަރު މިނެޓުގައި ޖޮވިޗް ވަނީ އޭނާގެ ދެވަނަ ލަނޑު ޖަހައި، ދެ ޓީމުގެ މެދުގައިވާ ފަރަގު އިތުރަށް ބޮޑުކޮށްފައެވެ.

މެޗުގެ ފުރިހަމަ ވަގުތު ހަމަވާން ފަސް މިނެޓަށް ވެފައިވަނިކޮށް، ތިޖާނީ ރެއިންޑާސް ވަނީ އޭސީ މިލާނުގެ ތިންވަނަ ލަނޑު ޖަހައި، މެޗުގެ ނަތީޖާ 3-0 އަށް ބަދަލުކޮށްފައެވެ.

ފައިނަލުގައި އޭސީ މިލާން ވާދަކުރަންޖެހޭނީ އެމްޕޯލީ އާއި ބޮލޯނިޔާ މިރޭ ކުޅޭ މެޗުން އެގްރިގޭޓުން މޮޅުވާ ޓީމަކާއި ދެކޮޅަށެވެ.