ހުޅުމާލެ ފޭސް 2 ގައި އަލަށް އިމާރާތްކޮށް ނިމިފައިވާ މިސްކިތް އަންނަ ހުކުރު ދުވަހު ހުޅުވާނެކަމަށް އިސްލާމިކް މިނިސްޓަރު ޑރ. މުޙައްމަދު ޝަހީމް ޢަލީ ސައީދު އިޢުލާނު ކުރައްވައިފިއެވެ.

 "މަސްޖިދުލް އީމާން" ގެ ނަމުން ނަންދެވިފައިވާ މި މިސްކިތް ރަސްމީކޮށް ހުޅުވުމަށް ހަމަޖެހިފައިވަނީ އަންނަ ހުކުރު ދުވަހުގެ ހުކުރު ނަމާދަށެވެ.

Ad by Hajj Corporation

އިސްލާމިކް މިނިސްޓްރީން ހާމަކޮށްފައިވާ މަޢުލޫމާތުތަކަށް ބަލާއިރު، މި މިސްކިތަކީ އެއްފަހަރާ 1200 މީހުންނަށް ނަމާދު ކުރެވޭނެ ޖާގައިގެ މިސްކިތެކެވެ.

ތިން ފްލޯއަށް ބިނާކޮށްފައިވާ މި ރީތި މިސްކިތަކީ ހެޔޮއެދޭ ފަރާތެއްގެ ދީލަތި އެހީގައި ބިނާކޮށްފައިވާ ތަނެކެވެ.

މިސްކިތްތައް ބިނާކުރުމާ ގުޅޭގޮތުން ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު މިދިޔަ ނޮވެމްބަރު މަހު ވިދާޅުވެފައިވަނީ، ރަމަޟާން މަހުގެ ކުރިން ރާއްޖޭގެ އެކި ކަންކޮޅުތަކުގައި ބިނާކުރަމުންދާ ފަނަރަވަރަކަށް މިސްކިތުގެ މަސައްކަތް ނިންމާލެވޭނެ ކަމަށެވެ.

މީގެ އިތުރުން، ހުޅުމާލެ ދެވަނަ ފިޔަވަހީގައި އިތުރު މިސްކިތެއް ބިނާކުރުމުގެ ޢަމަލީ މަސައްކަތް ޑިސެންބަރު މަހު ފައްޓަވާނެކަން ވެސް އެމަނިކުފާނު ވަނީ ހާމަކުރައްވާފައެވެ.

ރައީސް މުޢިއްޒު އިތުރަށް ވިދާޅުވެފައިވާ ގޮތުގައި، މިސްކިތްތަކާއި އިސްލާމީ މަރުކަޒުތައް ބިނާކުރުމުގެ މައިގަނޑު މަޤްޞަދަކީ، ރާއްޖޭގައި އިސްލާމީ އެއްބައިވަންތަކަން ޤާއިމުކޮށް، އިސްލާމީ ޘަޤާފަތާއި ނޫރު ފެތުރުވުމެވެ.

މި އާ މިސްކިތާއެކު ހުޅުމާލެ ފޭސް 2 ގައި ދިރިއުޅޭ ރައްޔިތުންނަށް ނަމާދުކުރުމުގައި ބޮޑެތި ފަސޭހަތަކެއް ލިބިގެންދާނެއެވެ.