ވެލާނާ އިންޓަރނޭޝަނަލް އެއަރޕޯޓް (ވީއައިއޭ) ގެ އައު ފަސިންޖަރު ޓާމިނަލް, ޓާމިނަލް 1 ގެ ޑިއުޓީ ފްރީ ޖާގަ އެއްކޮށް ބޭނުންކުރަން ފަށައިފިއެވެ.

އައު ޓާމިނަލްގެ ޚިދުމަތް ފެށިއިރު، ޑިއުޓީ ފްރީ ސަރަޙައްދު އެއްކޮށް ހުޅުވާފައިނުވާއިރު، އެކި އެއާލައިންތަކުގެ އޮޕަރޭޝަންތައް އައު ޓާމިނަލަށް ބަދަލުވަމުންދިޔަ ވަރަކަށް ޑިއުޓީ ފްރީގައި ހިމެނޭ ފިހާރަތައްވެސް ދިޔައީ އިތުރުކުރަމުންނެވެ.

Ad by Hajj Corporation

އައު ޓާމިނަލާއެކު ޑިއުޓީ ފްރީއަށް ދޫކުރާ ޖާގަ ތިންގުނަ އިތުރުކުރެވިފައިވާއިރު، ގާތްގަނޑަކަށް 13،000 އަކަފޫޓުގެ އެ ޓާމިނަލްގެ 4،000 އަކަފޫޓު ޚާއްޞަކޮށްފައިވަނީ ޑިއުޓީ ފްރީއަށެވެ.

އެމްއޭސީއެލްއިން ކުރިން ހާމަކޮށްފައިވާގޮތުގައި، މި އައު ޑިއުޓީ ފްރީއާއެކު ދުނިޔޭގެ މަޝްހޫރު އަދި އަގުބޮޑު ބްރޭންޑްތަކުގެ އުފެއްދުންތައް ކުރިއަށްވުރެ ފުޅާދާއިރާއެއްގައި ފަސިންޖަރުންނަށް ލިބިގެންދާނެއެވެ. އެއާއެކު، ޑިއުޓީ ފްރީގެ އިތުރުން ބައެއް ބްރޭންޑްތަކަށް ޙާއްޞަ ބުޓީކް ފިހާރަަތައްވެސް ޓާމިނަލްގައި ހުންނާނެ ކަމަށް އެމްއޭސީއެލްއިން ބުނެފައިވެއެވެ.

މަޢުލޫމާތު ލިބިފައިވާގޮތުގައި، ޑިއުޓީ ފްރީގެ ހުރިހާ ފިހާރައެއް އައު ޓާމިނަލަށް މިހާރު ބަދަލުކޮށްފައިވާއިރު މާދަމާ އެތަން ރަސްމީކޮށް ހުޅުވާގޮތަށް ވަނީ ހަމަޖެހިފައެވެ.