ކުރިއަށް އޮތް ހޫނު މޫސުމުގައި ރާއްޖެއަށް އޮންނަ ޑިމާންޑް އިތުރުވުމާ ގުޅިގެން، ސްވިޒަލޭންޑުގެ މަޝްހޫރު އެއާލައިން، އޭޑަލްވައިސް އެއާ އިން ރާއްޖެއަށް ކުރާ ދަތުރުތައް އިތުރުކުރަން ނިންމައިފި އެވެ.

މި ނިންމުމާއެކު، މިހާރު ކުރިއަށްދާ ތާވަލު ދަތުރުތަކުގެ އިތުރުން، 2026 ވަނަ އަހަރުގެ ޖުލައި 4 އިން ސެޕްޓެމްބަރު 13 އާ ދެމެދު ކޮންމެ ހަފުތާއަކު އިތުރު ދެ ފްލައިޓް ބޭއްވުމަށް ވަނީ ހަމަޖެހިފަ އެވެ. މި ދަތުރުތައް ކުރުމަށް ތާވަލުކޮށްފައިވަނީ ކޮންމެ ހަފުތާއެއްގެ ބުދަ އަދި ހޮނިހިރު ދުވަހު އެވެ. މިއީ ފަތުރުވެރިން ގިނަވާ ދުވަސްވަރު ސްވިޒަލޭންޑާއި ރާއްޖެއާ ދެމެދު އޮންނަ ވައިގެ ދަތުރުފަތުރުގެ ގުޅުން އިތުރަށް ވަރުގަދަކުރުމަށް އެޅި މުހިންމު ފިޔަވަޅެކެވެ.

Ad by Hajj Corporation

މި ބަދަލާއެކު، ހޫނު މޫސުމުގެ ތެރޭގައި އޭޑަލްވައިސް އެއާ އިން ރާއްޖެއަށް ޖުމްލަ 21 އިތުރު ދަތުރު ކުރާނެ އެވެ. މިކަމުގެ ސަބަބުން ސްވިޒަލޭންޑާއި ޔޫރަޕްގެ އެކި ސަރަހައްދުތަކުން ރާއްޖެއަށް ދަތުރުކުރާ ފަތުރުވެރިންނަށް ފްލައިޓް އިޚްތިޔާރު ކުރުމުގައި އިތުރު ފުރުސަތުތަކާއި ފަސޭހަތަކެއް ލިބިގެންދާނެ އެވެ.

އޭޑަލްވައިސް އެއާ އަކީ ސްވިޒަލޭންޑުގެ ތިންވަނައަށް އެންމެ ބޮޑު އެއާލައިނެވެ. އަދި މިއީ ރާއްޖޭގެ ފަތުރުވެރިކަމުގެ ބާޒާރުގައި ގިނަ ދުވަސްތަކެއް ވަންދެން އިތުބާރާއެކު ހަރަކާތްތެރިވަމުން އަންނަ އެއާލައިނެކެވެ. އެ އެއާލައިނުން ރާއްޖެއަށް އެންމެ ފުރަތަމަ ދަތުރުތައް ފަށާފައިވަނީ 4 ނޮވެމްބަރު 2000 ގައެވެ.

އޭޑަލްވައިސް އިން ރާއްޖެއަށް ދަތުރުކުރާތާ މިހާރު ދެ ދަހަޔަށްވުރެ ގިނަ ދުވަސް ވެފައިވާއިރު، 2025 ވަނަ އަހަރު އެ އެއާލައިނުން ވަނީ ރާއްޖެއަށް ދަތުރުކުރާތާ 25 އަހަރު ފުރުނު ރިހި ޔޫބީލް ފާހަގަކޮށްފައެވެ. މިއީ ރާއްޖޭގެ ފަތުރުވެރިކަމަށް އެ އެއާލައިނުން ދޭ އަހައްމިއްޔަތު ހާމަވެގެންދާ ކަމެކެވެ.