އިޓަލީގެ ސެރީ އޭގައި އެޓަލާންޓާއާ ދެކޮޅަށް ކުޅުނު މެޗު 1-0 އިން ކާމިޔާބުކޮށް، އިންޓަ މިލާނުން ތާވަލުގެ އެއްވަނަ މަގާމަށް އަލުން ޖެހިލައިފިއެވެ. މި މެޗުގައި ފެނިގެންދިޔަ ހަމައެކަނި ލަނޑު ދެވަނަ ހާފުގެ މެދުތެރޭގައި ކާމިޔާބުކޮށްދިނީ އެޓީމުގެ ކެޕްޓަން ލައުޓާރޯ މާޓީނޭޒްއެވެ.

މެޗުގެ ފުރަތަމަ ހާފުގައި އިންޓަ މިލާނުން ރަނގަޅު ކުޅުމެއް ދެއްކި ނަމަވެސް، ލަނޑު ޖަހާނެ ސާފު ފުރުސަތުތަކެއް އުފެއްދުމުގައި ވަނީ ދަތިތަކާ ކުރިމަތިވެފައެވެ. އެގޮތުން އެލެސަންދްރޯ ބަސްޓޯނީ ތަނަވަސްކޮށްދިން ފުރުސަތެއްގައި ނިކޯލޯ ބަރެއްލާއަށް ލިބުނު ބޯޅަ އޭނާ ވަނީ ބޭކާރުކޮށްލާފައެވެ. މީގެ އިތުރުން މާކަސް ތުރާމް ލަނޑެއް ޖެހި ނަމަވެސް، ވީއޭއާރު ބެލުމަށްފަހު އެ ލަނޑު ބަލައިނުގަންނަން ނިންމީ މާޓީނޭޒް އޮފްސައިޑްގައި ހުރުމުންނެވެ.

Ad by Hajj Corporation

ދެވަނަ ހާފު ފެށިގެން އެޓަލާންޓާގެ ޗާލްސް ޑި ކެޓެލަރޭ ލަނޑެއް ޖެހި ނަމަވެސް، އެ ލަނޑުވެސް ވަނީ އޮފްސައިޑްވުމުގެ ސަބަބުން ބަލައިނުގަނެފައެވެ. އިންޓަ މިލާނުން މެޗުގެ ކުރި ހޯދީ 65 ވަނަ މިނެޓުގައެވެ. މިއީ އެޓަލާންޓާގެ ބެރަޓް ޖިމްސިޓީ ހެދި ގޯހެއްގެ ފައިދާ ނަގައި، ބަދަލު ކުޅުންތެރިޔާ ޕިއޯ އެސްޕޮސިޓޯ ދިން ބޯޅައަކުން މާޓީނޭޒް ކާމިޔާބުކުރި ލަނޑެކެވެ.

މި މޮޅާއެކު އިންޓަ މިލާނުން 2026 ވަނަ އަހަރާ ކުރިމަތިލާނީ ތާވަލުގެ އެއްވަނައިގައި އެއް ޕޮއިންޓުގެ ލީޑަކާއެކުގައެވެ.