ނ. އަތޮޅުގައި ތަރައްގީކުރުމަށް ހަމަޖެހިފައިވާ "އައިލާ ސަސްޓެއިނަބަލް ޓައުންޝިޕް ޕްރޮޖެކްޓް" ގެ އިންވެސްޓަރުންނާއެކު ސަރުކާރުން ސޮއިކޮށްފިއެވެ.

މިކަމަށްޓަކައި ބޭއްވި ހާއްސަ ރަސްމިއްޔާތެއްގައި ސަރުކާރުގެ ފަރާތުން އެއްބަސްވުމުގައި ސޮއިކުރެއްވީ އިގުތިސޯދީ ތަރައްގީއާއި ވިޔަފާރިއާބެހޭ ވަޒީރު، މުޙައްމަދު ސަޢީދެވެ. އަދި ކްރިސްޓަލް ހޯލްޑިންގްސް ޕްރައިވެޓް ލިމިޓެޑްގެ ފަރާތުން ސޮއިކުރެއްވީ  ސީއީއޯ ޕެރަޓް ކްރިސްޓިކްއެވެ.

Ad by Hajj Corporation

މި ރަސްމިއްޔާތުގައި ވާހަކަދައްކަވަމުން އިގުތިސޯދީ ތަރައްގީއާބެހޭ ވަޒީރު މުޙައްމަދު ސަޢީދު ވަނީ، މި ޓައުންޝިޕް ޕްރޮޖެކްޓަކީ ރާއްޖޭގެ އިގުތިސޯދު، އައު ހަރުފަތަކަށް ގެންދިއުމުގައި ވަރަށް މުހިންމު ދައުރެއް އަދާކުރާނެ މަޝްރޫއެއް ކަމާއި، މި މަޝްރޫއުގެ ސަބަބުން މިފަދަ އިތުރު އިންވެސްޓްމަންޓުތައް ހޯދަން ސަރުކާރަށް ހިތްވަރު ލިބި، އެކަމަށް މަގުފަހިވާނެކަން ފާހަގަކުރައްވާފައެވެ. މީގެ އިތުރުން، މި މަޝްރޫއުގެ ސަބަބުން މުޅި ރާއްޖެއަށާއި ދުނިޔޭގެ އިންވެސްޓަރުންގެ އިތުރުން ވަކިވަކި ފަރުދުން އާމްދަނީ ހޯދުމަށް އައު މަގުތަކާއި ފުރުސަތުތައް ހުޅުވިގެންދާނެ ކަމަށް ވަޒީރު ވިދާޅުވިއެވެ.

ކްރިސްޓަލް ހޯލްޑިންގްސްގެ ސީއީއޯ ވަނީ މިކަމުގައި ރައީސުލްޖުމްހޫރިއްޔާގެ އިތުރުން ސަރުކާރުގެ އެކި ވުޒާރާތަކުން ދެއްވި އެއްބާރުލުމަށް ޝުކުރުދަންނަވާފައެވެ. ރާއްޖެއަކީ އިންވެސްޓަރުންނަށް ފަހި މާހައުމެއް އޮތް ގައުމެއްކަން ސީއީއޯ ފާހަގަކުރެއްވިއެވެ.

790 މިލިއަން ޑޮލަރު ހޭދަކޮށްގެން ނ. އަތޮޅުގައި ތަރައްގީކުރަން ހަމަޖެހިފައިވާ މި ޓައުންޝިޕްގެ މަޝްރޫއު ނިންމާލުމަށް ހަމަޖެހިފައިވަނީ 2028 ވަނަ އަހަރުގެ ނިޔަލަށެވެ.