ދިވެހިރާއްޖޭގެ ހުރިހާ އެއާޕޯޓަކަށް ރޭގަނޑު ފްލައިޓްތައް ޖެއްސޭނެ އިންތިޒާމު ސަރުކާރުން ކާމިޔާބުކަމާއެކު ގާއިމުކޮށްފިއެވެ.

މި މަޝްރޫއުގެ ދަށުން އެންމެ ފަހުން ރޭގަނޑު ދަތުރުތަކަށް ތައްޔާރުކޮށް، އޮޕަރޭޝަނަށް ގެނެސްފައިވަނީ ށ. ފުނަދޫ އެއާޕޯޓެވެ.

Ad by Hajj Corporation

މި މަސައްކަތަކީ ރައީސުލްޖުމްހޫރިއްޔާ ޑރ. މުހައްމަދު މުއިއްޒު ކަނޑައަޅުއްވާފައިވާ މުހިންމު އަމާޒެއް ކަމަށް ޓްރާންސްޕޯޓް އެންޑް ސިވިލް އޭވިއޭޝަން މިނިސްޓަރު މުޙައްމަދު އަމީން ވިދާޅުވިއެވެ. މިނިސްޓަރު ފާހަގަކުރެއްވި ގޮތުގައި، ރައީސްގެ އިރުޝާދާއި އެއްބާރުލުމާއެކު މި ލަނޑުދަނޑި މިހާރު ވަނީ ފުރިހަމައަށް ހާސިލުކުރެވިފައެވެ.

"މިއީ ރައީސުލްޖުމްހޫރިއްޔާ ޑރ. މުއިއްޒު ކަނޑައަޅުއްވާފައިވާ ގައުމީ މުހިންމު އަމާޒެއް. އެމަނިކުފާނުގެ މެދުނުކެނޑި ދެއްވި އިރުޝާދާއި އެހީތެރިކަމާއެކު މިކަން މިވަނީ ހާސިލުކުރެވިފައި،"  އަމީން ވިދާޅުވިއެވެ.

މި ތާރީޚީ ކާމިޔާބީއާ ގުޅިގެން މިނިސްޓަރު ވަނީ މި މަސައްކަތުގައި ބައިވެރިވި ހުރިހާ ފަރާތްތަކަކަށް ޝުކުރު އަދާކުރައްވާފައެވެ. މި ބަދަލުގެ ސަބަބުން ރާއްޖޭގެ ދަތުރުފަތުރުގެ ނިޒާމަށް ބޮޑު ލުޔެއް ލިބި، އަތޮޅުތަކުގެ އިގްތިސާދީ އަދި އިޖުތިމާއީ ކުރިއެރުމަށް މަގުފަހިވެގެންދާނެ ކަމަށް ސަރުކާރުން ގަބޫލުކުރެއެވެ.

ރާއްޖޭގެ އެކި ސަރަހައްދުތަކުގައި މިހާރު ހިންގަމުންދާ 18 އެއާޕޯޓަށްވެސް މިހާރު ރޭގަނޑު ދަތުރުކުރެވޭނެ އިންތިޒާމު ވަނީ ހަމަޖެހިފައެވެ. މިއީ ރާއްޖޭގެ ވައިގެ ދަތުރުފަތުރުގެ ދާއިރާއަށް ލިބުނު ބޮޑު ކުރިއެރުމެކެވެ.