ސައުދީ އަރަބިއްޔާގައި އުމްރާގެ އަޅުކަން ފުރިހަމަކުރަމުން ދިޔަ ދިވެއްސަކު ރޭ ނިޔާވެއްޖެއެވެ.

Ad by Hajj Corporation

ނިޔާވެފައިވަނީ އަލްމަނާސިކް ހައްޖު އުމްރާ ޖަމާއަތުގެ ހަވާލުގައި އުމްރާއަށް ގޮސް ހުރި މ. ސައްކެޔޮމާގޭ މުހައްމަދު އިމްތިޔާޒު (62އ) އެވެ.

މުހައްމަދު އިމްތިޔާޒު ނިޔާވީ މަސްޖިދުލް ހަރަމްގައި ދެވަނަ އުމްރާގެ އަޅުކަން ފުރިހަމަކުރަން އުޅެނިކޮށް ރޭ ރާއްޖެ ގަޑިން 7:35 ހާއިރުއެވެ.

އޭނާ ނިޔާވީ ކުއްލި ގޮތަކަށް ސިއްހީ ހާލަތު ގޯސްވެގެންނެވެ.

ޑޮކްޓަރުންނާ ހަވާލާދީ އުމްރާ ގުރޫޕުން ބުނިގޮތުގައި އޭނާ ނިޔާވީ ހާޓް އެޓޭކެއް ޖެހިގެންނެވެ. ނިޔާވި މީހާއަކީ ކުރިންވެސް ހިތުގެ މައްސަލަތަކެއް ހުރެގެން ޕޭސްމޭކާ ލައްވާފައި ހުރި މީހެއްކަން އެ ޖަމާއަތުން ފާހަގަކޮށްފައިވެއެވެ.

މި ދުވަސްވަރަކީ ސްކޫލް ބަންދާ ދިމާކޮށް ގިނަ އަދަދެއްގެ ދިވެހިން އުމްރާގެ އަޅުކަމަށް ސައުދީ އަރަބިއްޔާއަށް ގޮސްފައިވާ ދުވަސްވަރެކެވެ.

ތަފާސްހިސާބުތަކުން ދައްކާގޮތުގައި މި ފަހަރުގެ ބަންދާ ދިމާކޮށް 7,700 އަށް ވުރެ ގިނަ ދިވެހިން އުމްރާގެ އަޅުކަމަށް ގޮސްފައިވެއެވެ.