ބްރެޒިލްގެ ތަރި ނޭމާ ޖޫނިއާ، 2026 ވަނަ އަހަރު އުތުރު އަދި މެދުތެރޭ އެމެރިކާގައި ބޭއްވުމަށް ހަމަޖެހިފައިވާ ފީފާ ވޯލްޑް ކަޕުން ފުރުސަތު ހޯދުމުގެ ގޮތުން އޭނާގެ މިހާރުގެ ކްލަބް ސަންޓޯސް އެފްސީއާއެކު ހަދާފައިވާ އެއްބަސްވުން އެއް އަހަރަށް އިތުރުކޮށްފިއެވެ. އުމުރުން 34 އަހަރުގެ ނޭމާ މިހާރު އެ ކްލަބުގައި 2026 ވަނަ އަހަރުގެ ޑިސެމްބަރު މަހުގެ ނިޔަލަށް މަޑުކުރާނެއެވެ.

ބްރެޒިލްގެ މީޑިއާތަކާއި އިނގިރޭސިވިލާތުގެ ޑެއިލީ މެއިލްއިން ރިޕޯޓްކޮށްފައިވާ ގޮތުގައި، ނޭމާ މި ނިންމުން ނިންމީ ބްރެޒިލްގެ ގައުމީ ޓީމުގެ ކޯޗު ކާލޯ އަންޗެލޮޓީގެ ވޯލްޑް ކަޕް ސްކޮޑުން ޖާގައެއް ކަށަވަރު ކުރުމުގެ މަގްސަދުގައެވެ. އަނިޔާއިން ސަލާމަތްވެ އެނބުރި އައުމަށްފަހު ނޭމާ ވަނީ އެންމެ ފަހުން ކުޅުނު ހަތް މެޗުގައި ފަސް ގޯލް ޖަހައި، ޖުވެންޓޫޑްއާ ދެކޮޅަށް ކުޅުނު މެޗުގައި ހެޓްރިކެއް ހަދައި އޭނާގެ ފެންވަރު ދައްކާލާފައެވެ.

Ad by Hajj Corporation

2023 ވަނަ އަހަރުގެ ސެޕްޓެމްބަރު މަހު ކަކުލަށް ލިބުނު ސީރިއަސް އަނިޔާއަކަށްފަހު ނޭމާ އަދި ބްރެޒިލްގެ ގައުމީ ޖާޒީގައި ފެނިފައެއް ނުވެއެވެ. ބާސެލޯނާ އާއި ޕީއެސްޖީއަށްފަހު އަލް ހިލާލަށް ބަދަލުވި ނަމަވެސް، އަނިޔާގެ ސަބަބުން އޭނާއަށް ގިނަ މެޗުތަކެއް ވަނީ ގެއްލިފައެވެ. ނަމަވެސް ނޭމާ ބުނެފައިވަނީ، "ފުރުސަތު ލިބިއްޖެނަމަ ވޯލްޑް ކަޕް ފައިނަލުގައި ގޯލް ޖަހައި ތަށި އުފުލާލާނަން" ކަމަށެވެ.

ނޭމާގެ ފިޓްނަސް ރަނގަޅު ކުރުމަށްޓަކައި އޭނާ މިހާރު ދަނީ ބްރެޒިލްގެ މަޝްހޫރު ފިޒިއޮތެރަޕިސްޓް އެޑުއާޑޯ ސަންޓޯސް ނުވަތަ 'ޑރ. މިރަކަލް' ގެ އެހީތެރިކަން ހޯދަމުންނެވެ. ސަންޓޯސްގެ ހާއްސަ ރިހެބިލިޓޭޝަން ޕްރޮގްރާމެއްގެ ދަށުން ނޭމާ ތައްޔާރުވަމުންދާއިރު، މީގެ ކުރިން ފިލިޕޭ ކުޓީނިއޯ ފަދަ ކުޅުންތެރިން ވެސް ވަނީ މި ޕްރޮގްރާމްގެ އެހީގައި އަވަހަށް ދަނޑަށް އެނބުރި އައިސްފައެވެ.

ބްރެޒިލްގެ ކޯޗު އަންޗެލޮޓީގެ ވިސްނުން މިކަމުގައި އަދިވެސް ހުރީ ވަރަށް ހަރުކަށިކޮށެވެ. އޭނާ ވިދާޅުވީ ބްރެޒިލް ޓީމު ނޭމާއާއެކު ނުވަތަ ނޭމާ ނެތިވެސް އޮވެދާނެ ކަމަށާއި، އެއްވެސް މީހަކަށް ދޭންޖެހޭ ހާއްސަ އިނާޔަތެއް ނޯންނާނެ ކަމަށެވެ. "ފަހުގެ ނިންމުން ނިންމާނީ މާޗް މަހުގެ ފީފާ ތާވަލަށްފަހު،" އަންޗެލޮޓީ ވިދާޅުވިއެވެ.

ވޯލްޑް ކަޕް އޮތީ ޖޫން މަހު ކަމަށްވެފައި، ފައިނަލް ސްކޮޑް މެއި މަހު އިއުލާން ކުރަން ޖެހޭތީ ނޭމާއަށް އޮތީ ވަރަށް ކުޑަ ވަގުތުކޮޅެކެވެ. ބްރެޒިލްގެ ތާރީހުގައި އެންމެ ގިނަ ގޯލް ޖެހި ކުޅުންތެރިޔާގެ ރެކޯޑް (128 މެޗުން 79 ގޯލް) އޮތް ނޭމާގެ މި ފަހު ފުރުސަތު ކާމިޔާބުވާނެތޯ ބެލުމަށް މުޅި ދުނިޔެ އިންތިޒާރު ކުރެއެވެ.