ސައުދީ އަރަބިއްޔާގެ އަލް ހިލާލަށް ކުޅެމުން އަންނަ ޕޯޗުގަލްގެ ފުލްބެކް ޖޮއާއޯ ކަންސޭލޯ އަލުން ޔޫރަޕަށް ބަދަލުވުމުގެ މަސައްކަތް ފަށާފައިވާކަމަށް ރިޕޯޓުތައް ބުނެފިއެވެ. މަޝްހޫރު ކުޅިވަރު ނޫސްވެރިޔާ ފަބްރީޒިއޯ ރޮމާނޯ ހާމަކޮށްފައިވާ ގޮތުގައި، ވޭތުވެދިޔަ 24 ގަޑިއިރުގެ ތެރޭގައި ސްޕެއިންގެ ބާސެލޯނާ އާއި އިޓަލީގެ އިންޓަ މިލާނުން ވަނީ ކަންސޭލޯގެ އެޖެންޓުންނާ ގުޅައި މަޝްވަރާތައް ކޮށްފައެވެ.

މި މަޝްވަރާތަކުގައި އިންޓަ މިލާނުން ކަންސޭލޯ ހޯދުމަށް ބޮޑު ޝައުގުވެރިކަމެއް ފާޅުކޮށް ބާރުއަޅަމުންދާއިރު، ބާސެލޯނާއިން ވެސް އަންނަނީ އޭނާ އަލުން ގެނައުމުގެ ފުރުސަތު އޮތްކަން ދަނެ އެކަމާ ގުޅޭގޮތުން ކްލަބުގެ އެތެރޭގައި މަޝްވަރާ ކުރަމުންނެވެ. ކަންސޭލޯ ވަނީ 2023/24 ވަނަ ސީޒަނުގައި ލޯނު އެއްބަސްވުމެއްގެ ދަށުން ބާސެލޯނާއަށް ކުޅެދީފައެވެ.

Ad by Hajj Corporation

މައުލޫމާތު ލިބޭގޮތުގައި ކުރިއަށް އޮތް ޖެނުއަރީ މަހުގެ ޓްރާންސްފާ މާކެޓުގައި ކަންސޭލޯ އަލް ހިލާލް ދޫކޮށްލާނެކަން މިހާރު ވަނީ ޔަގީންވެފައެވެ. އޭނާ އެ ކްލަބާއެކު ހަދާފައިވާ އެއްބަސްވުން 2027 ވަނަ އަހަރުގެ ހޫނު މޫސުމަށް ހަމަވި ނަމަވެސް، އަލުން ޔޫރަޕުގެ ވަރުގަދަ ލީގަކަށް ބަދަލުވުމަށް އޭނާ ބޭނުންވެއެވެ.

މި ސީޒަނުގައި އަލް ހިލާލަށް ކުޅެދިން މެޗުތަކުގައި ކަންސޭލޯ ވަނީ އެއް ލަނޑު ޖަހައި، ދެ ލަނޑު ޖެހުމަށް އެހީތެރިވެދީފައެވެ. އޭނާ އަލުން ބާސެލޯނާއަށް ގެނައުމަށް އެ ކްލަބުގެ ސަޕޯޓަރުން ވެސް ބޭނުންވާއިރު، ކުރިއަށް އޮތް ދުވަސްތަކުގައި އޭނާގެ މުސްތަގުބަލާ މެދު ގޮތެއް ނިމިގެންދާނެ ކަމަށް ބެލެވެއެވެ.