ޣައްޒާ އާއި ހުޅަނގު އައްސޭރީގައި މަދަނީ ޖަމިއްޔާތަކަށް ހަރަކާތްެރިނުވެވޭ ގޮތަށް އިސްރާއީލުން ކޮށްފައިވާ "ބޭން" އުވާލުމަށް އދ. އިން ގޮވާލައިފިއެވެ.

އދ.ގެ ސެކްރެޓަރީ ޖެނެރަލް އެންޓޯނިއޯ ގުޓަރޭޒް ނެރުއްވި ބަޔާނެއްގައި ވިދާޅުވީ، އެންޖީއޯތަކުގެ މަސައްކަތަކީ އިންސާނީ ފުރާނަ ސަލާމަތް ކުރުމަށް ކުރާ މަސައްކަތަށް ކޮންމެހެން ބޭނުންތެރި މަސައްކަތެއް ކަމަށެވެ. އޭނާ ވިދާޅުވީ އިސްރާއީލުން ކޮށްފައިވާ ބޭންގެ ސަބަބުން ހަނގުރާމަ ހުއްޓާލުމުގެ ސަބަބުން ލިބުނު ނާޒުކު ކުރިއެރުމަށް ބުރޫ އަރާނެ ކަމަށެވެ.

Ad by Hajj Corporation

އިސްރާއީލުން ވަނީ ހިއުމެނިޓޭރިއަން ގްރޫޕްތަކުން ޣައްޒާއާއި ހުޅަނގު އައްސޭރީގައި މަނާކޮށްފައެވެ. އެ އަމުރު ތަންފީޒު ކުރަން ނިންމާފައި ވަނީ އަންނަ މަހުގެ އެއްވަނަ ދުވަހުން ފެށިގެންނެވެ.

ތަޖުރިބާކާރުން ވަނީ މިއީ އިންސާނީ އުޞޫލުތަކާ ޚިލާފު އަދި އިންސާނިއްޔަތާ މުޅިން ޚިލާފު ޝަރުތުތަކެއް ކަމަށް ބުނެފައެވެ.

އެހީދޭ ޖަމާއަތްތަކުން ބުނެފައި ވަނީ ފަލަސްތީނުގެ މުވައްޒަފުންގެ ޒާތީ މައުލޫމާތު އިސްރާއީލަށް ފޯރުކޮށްދިނުމަކީ އެ މީހުންނަށް ނުރައްކަލެއް ކުރިމަތިވެދާނެ ކަމެއް ކަމަށެވެ.

މި ގްރޫޕްތަކުގެ ތެރޭގައި "ޑޮކްޓާސް ވިތައުޓް ބޯޑާސް" ގެ ބައެއް ޗެޕްޓަރުތަކާއި ނޯވޭޖިއަން ރެފިއުޖީ ކައުންސިލް އަދި އިންޓަނޭޝަނަލް ރެސްކިއު ކޮމިޓީ ހިމެނެއެވެ.