ވެނަޒުއޭލާގެ ތެލުގެ ބޮޑު ރިޒަރވް އެމެރިކާގެ ބާރުގެ ދަށަށް ގެންނަން ނިންމާފައިވާކަން އެމެރިކާގެ ރައީސް ޑޮނަލްޑް ޓްރަމްޕު ވިދާޅުވެއްޖެއެވެ.

ޓްރަމްޕު މިހެން ވިދާޅުވީ ވެނަޒުއޭލާ އަށް ވައިގެ ހަމަލާތަކެއްދީ އެގައުމުގެ ރައީސް ނިކޮލަސް މަޑޫރޯގެ ދެމަފިރިކަނބަލުން ހައްޔަރުކުރުމަށްފަހު ބޭއްވި ނޫސްވެރިންގެ ބައްދަލުވުމެއްގައެވެ.

Ad by Hajj Corporation

ޓްރަމްޕު ވިދާޅުވީ ވެނެޒުއޭލާގެ ވެރިކަން ދެން ހިންގާނީ އެމެރިކާއިން ކަމަށާއި އެގައުމުގެ ހުރިހާ ކަމެއް ވެސް ބަލަހައްޓާނީ އެމެރިކާ އިން ކަމަށެވެ. އަދި ވެނަޒުއޭލާގައި ތެލުގެ ބޮޑު ރިޒަރވްއެއް އެބައޮތްކަމަށާއި އެ ރިޒަރވް އެމެރިކާގެ ބާރުގެ ދަށަށް ގެނައުމަކީ އެމެރިކާ އަށް އިގްތިސާދީ ގޮތުން ލިބޭނެ ބޮޑު ކުރިއެރުމެއްކަމަށެވެ.

ޚަބަރުތައް ބުނާގޮތުގައި އެމެރިކާއިން ވަނީ ވެނެޒުއޭލާގެ އަސްކަރީ މަރުކަޒުތަކަށް މިއަދު ވެސް ހަމަލާ ދީފައެވެ. މި ހާދިސާތަކާ ގުޅިގެން ދުނިޔޭގެ މަސްރަހުގައި ބޮޑު ކަންބޮޑުވުމެއް ވެސް ވަނީ އުފެދިފައެވެ. އަދި މިނިވަން ދައުލަތެއްގެ ދާޚިލީ ކަންކަމަށް ނުފޫޒު ފޯރުވާ ކަމަށް ބުނެ ޓްރަމްޕަށް ވަނީ ގިނަ ފާޑުކިޔުންތަކެއް އަމާޒުވެފައެވެ.

ވެނެޒުއޭލާއަކީ ދުނިޔޭގެ ހަކަތައިގެ ބާޒާރުގައި މުހިންމު ދައުރެއް އަދާކުރާ، ތެލުގެ މުއްސަނދި ގައުމެކެވެ. އެ ގައުމުގެ ސިޔާސީ ހަމަޖެހުމަށް އަންނަ ކޮންމެ ބަދަލަކީ މުޅި ދުނިޔެއަށް އޭގެ އަސަރު ކުރާނެ ކަމެއް ކަމުގައި ދުނިޔޭގެ މަސްރަހު ދިރާސާކުރާ ފަރާތްތަކުން ބުނެއެވެ.