ދިރާގު ދިވެހި ޕްރިމިއަރ ލީގުގައި ނިއު ރޭޑިއަންޓް ސްޕޯޓްސް ކުލަބާއި އޮޑި ސްޕޯޓްސް ކްލަބް ބައްދަލުކުރި މެޗު ލަނޑެއް ނުޖެހި އެއްވަރުވުމާއެކު، ލީގު ތަށި ދިފާއުކުރުމުގެ ފުރުސަތު މާޒިޔާ ސްޕޯޓްސް އެންޑް ރެކްރިއޭޝަނުން ވަރަށް ބޮޑަށް ފަހިކޮށްފިއެވެ. ގަލޮޅު ރަސްމީ ދަނޑުގައި ކުޅުނު މި މެޗު ނިމުނީ 0-0 އިން ދެޓީމު އެއްވަރުވެގެންނެވެ.

މި ނަތީޖާއާއެކު ތާވަލުގެ އެއްވަނައިގައި އޮތް މާޒިޔާއަށް ވަނީ 8 ޕޮއިންޓުގެ ބޮޑު ލީޑެއް ލިބިފައެވެ. ލީގުގައި ކޮންމެ ޓީމަކަށް ބާކީ ފަސް މެޗު އޮތްއިރު، މާޒިޔާ އެއްވަނައިގައި އޮތީ ކުޅުނު އެއްވެސް މެޗަކުން ބަލިނުވެ 37 ޕޮއިންޓާއެކުއެވެ. މެޗުން އެއްވަރުވި އޮޑި ސްޕޯޓްސް 29 ޕޮއިންޓާއެކު ދެވަނައިގައި އޮތްއިރު، ނިއު ރޭޑިއަންޓް ތިންވަނައިގައި އޮތީ 24 ޕޮއިންޓާއެކުއެވެ.

Ad by Hajj Corporation

މެޗުގެ ފުރަތަމަ ހާފުގައި ދެޓީމުގެ ފަރާތުންވެސް ފެނުނީ ވަރަށް ބަލައިގެން ކުޅުނު ތަނެވެ. އެޓޭކިންގް ގޭމެއް ކުޅެން ދެޓީމުންވެސް މަސައްކަތް ކުރި ނަމަވެސް، ނުރައްކާތެރި ހަމަލާތަކެއް އުފެއްދުމުގައި ދަތިތަކެއް ކުރިމަތިވިއެވެ. ނަމަވެސް ދެވަނަ ހާފުގައިވެސް ދެޓީމުން ލަނޑެއް ޖެހޭތޯ މަސައްކަތް ކުރިއެވެ.

އެގޮތުން ދެވަނަ ހާފުގައި ވެސް ދެޓީމުގެ ފަރާތުން ފޮނުވވާލި ގިނ ހަމަލާތައް ކީޕަރުންވަނީ ހުއްތުވާފައެވެ.

މިއީ މިފަހަރުގެ ލީގުގައި ނިއު ރޭޑިއަންޓް އެއްވަރުވި ތިންވަނަ މެޗެވެ. މި ދެޓީމު ލީގުގެ ފުރަތަމަ ބުރުގައި ބައްދަލުކުރި މެޗު 1-0 އިން ކާމިޔާބުކުރީ އޮޑި ސްޕޯޓްސް ކްލަބެވެ. މި ނަތީޖާއާއެކު ލީގުގެ ގަދަ ހަތަރެއްގެ ވާދަވެރިކަންވެސް ވަނީ ބޮޑުވެފައެވެ. ބުރު ސްޕޯޓްސް 23 ޕޮއިންޓާއެކު ހަތަރުވަނައިގައި އޮތްއިރު، ވިކްޓަރީ އޮތީ 20 ޕޮއިންޓާއެކު ފަސްވަނައިގައެވެ.

ލީގުގެ ފުލުގައި އޮތް ޓީމުތަކުގެ މެދުގައިވެސް ވާދަވެރިކަން ބޮޑުއިރު، އީގަލްސް 19 ޕޮއިންޓާއެކު ހަވަނައިގައި، އަދި ޓީސީ 9 ޕޮއިންޓާއެކު ހަތްވަނައިގައި އޮތްއިރު، ރެލިގޭޝަން ޒޯނުގައި އޮތް ގްރީން ސްޓްރީޓްސް އާއި ވެލެންސިއާއަށް ލިބިފައިވަނީ 8 ޕޮއިންޓެވެ. ތާވަލުގެ އެންމެ ފުލުގައި ޔުނައިޓެޑް ވިކްޓަރީ އޮތީ 7 ޕޮއިންޓާއެކުއެވެ.