ފްރާންސުގެ ވެރިރަށް ޕެރިހަށް ބޯކޮށް ސްނޯ ފޭބުމާ ގުޅިގެން، އޯލީ އަދި ޗާލްސް ޑި ގޯލް އެއާޕޯޓުގެ ފްލައިޓްތަކުގެ 15 އިންސައްތަ މިރޭގެ ނިޔަލަށް ކެންސަލް ކުރުމަށް ފްރާންސުގެ ސިވިލް އޭވިއޭޝަން އޮތޯރިޓީން ހޯމަ ދުވަހު އެއާލައިންތަކުގައި އެދިއްޖެއެވެ.

ފްލައިޓްތައް ފުރުމާއި ޖެއްސުން މަދުކުރާހާ ހިނދަކު، ކެންސަލް ކުރާނީ ކޮން ފްލައިޓްތަކެއްކަން ނިންމުމުގެ އިޚްތިޔާރު އެއާލައިންތަކަށް އޮންނާނެ ކަމަށް ތަރުޖަމާނަކު ރޮއިޓާސްއަށް މައުލޫމާތު ދިނެވެ.

Ad by Hajj Corporation

ޕެރިސް-ޗާލްސް ޑި ގޯލް އެއާޕޯޓުން ޖީ.އެމް.ޓީ ގަޑިން 19:00 އާ ހަމައަށް، އަދި ޕެރިސް-އޯލީ އެއާޕޯޓުން ޖީ.އެމް.ޓީ ގަޑިން 22:30 އާ ހަމައަށް ފްލައިޓްތައް މަދުކުރުމަށް ވަނީ އަންގާފައެވެ.

ފްރާންސުގެ ޓްރާންސްޕޯޓް މިނިސްޓްރީން ވަނީ ދަތުރުވެރިން ގެއިން ނުކުތުމުގެ ކުރިން ފްލައިޓް އޮތްތޯ ޗެކްކުރުމަށާއި، އެއާޕޯޓަށް ދިއުމަށް އަމިއްލަ ކާރުގެ ބަދަލުގައި އާންމު ދަތުރުފަތުރުގެ ނިޒާމު ބޭނުންކުރުމަށް އިލްތިމާސްކޮށްފައެވެ.

މީގެ އިތުރުން، ޔޫރަޕްގެ އެންމެ ބާރުބޮޑު އެއް އެއާޕޯޓު ކަމަށްވާ އެމްސްޓަޑަމްގެ ޝިޕޯލް އެއާޕޯޓުން ވެސް ސްނޯ ފޭބުމުގެ ސަބަބުން ހޯމަ ދުވަހުގެ ހެނދުނު ގާތްގަނޑަކަށް 500 ފްލައިޓް ކެންސަލްކޮށް، ޖީ.އެމް.ޓީ ގަޑިން 12:00 އާ ހަމައަށް އެއާޕޯޓަށް ފްލައިޓްތައް ޖެއްސުން މެދުކަނޑާލާފައިވާ ކަމަށް އޭ.އެން.ޕީ ނިއުސް އެޖެންސީން ރިޕޯޓްކޮށްފައިވެއެވެ.