މާލޭގައި ބަނގުރާ ވިއްކަމުންދިޔަ ފަސް ބިދޭސީއަކު ހައްޔަރުކޮށްފައިވާ ކަމަށް ފުލުހުން ބުނެފިއެވެ.

މާލޭގައި ބަނގުރާ އުފައްދާ ގެންގުޅެ އަދި ބޭނުންކޮށް، އޭގެ ވިޔަފާރި ކުރަމުންދާކަމުގެ ތުހުމަތުގައި ބަޔަކު ހައްޔަރުކޮށްފައިވަނީ ފުލުހުންގެ ޑްރަގް އެންފޯސްމަންޓާއި ކައުންޓަރ ނާކޮޓިކްސް އިންޓެލިޖެންސް ގުޅިގެން ހިންގި އޮޕަރޭޝަނެއްގައެވެ. މިމަހުގެ ފަސްވަނަ ދުވަހު ފުލުހުން ކުރިއަށް ގެންދިޔަ މިއޮޕަރޭޝަންގައި މާލޭގެ ގެއެއް ބަލައި ފާސްކުރިއިރު މަސްތުވާތަކެތި ކަމަށް ބެލެވޭ އެއްޗެއް ހުރި ފުޅިތަކަކާއި، ބަނގުރާ އުފެއްދުމަށް ބޭނުންކުރާ ކަމަށް ބެލެވޭ ސާމާނު ފެނިފައިވާ ކަމަށް ފުލުހުން ބުނެފައި ވެއެވެ.

Ad by Hajj Corporation

މި މައްސަލައާއި ގުޅިގެން ހައްޔަރުކޮށްފައިވާ މީހުންގެ ވަނަވަރު އާންމުކޮށްފައި ވާއިރު، އޭގެތެރޭގައި ހިމެނެނީ ނޭޕާލަށް ނިސްބަތްވާ ޑިއު ކުމަރް މެޔޮންގްބައާއި، ސުމަން އަދިކަރިއާއި، ރާމްޖި ޕަރިޔަރްއާއި ބިކްރަމް ނެޕަލީގެ އިތުރުން ބަންގްލަދޭޝަށް ނިސްބަތްވާ މޮޒައްމެލް އެވެ.

މި މީހުން ޑީޕޯޓް ކުރުމަށް މޯލްޑިވްސް އިމިގްރޭޝަނާއި ހަވާލުކޮށްފައިވާ ކަމަށް ފުލުހުން މައުލޫމާތު ދީފައިވެއެވެ.

ފުލުހުން އަންނަނީ މި މައްސަލަ އިތުރަށް ތަހުގީގުކުރަމުންނެވެ.