އިނގިރޭސި ޕްރިމިއާ ލީގުގައި ރޭ ބްރައިޓަންއާ ދެކޮޅަށް ކުޅުނު މެޗު 1-1 އިން އެއްވަރުވެ، މެންޗެސްޓާ ސިޓީއަށް ލީގު ކާމިޔާބުކުރުމަށް ކުރަމުންދާ އުންމީދުތަކަށް އިތުރު ހުރަސްތަކެއް ކުރިމަތިވެއްޖެއެވެ. މިއީ ލީގުގައި ސިޓީ ޖެހިޖެހިގެން އެއްވަރުވި ތިންވަނަ މެޗެވެ.

އިއްތިހާދު ސްޓޭޑިއަމްގައި ކުޅުނު މި މެޗުގެ ފުރަތަމަ ހާފުގައި ސިޓީއަށް ކުރިހޯދައިދިނީ ލިބުނު ޕެނަލްޓީއަކުން އާލިން ހާލަންޑެވެ. މިއީ ޑިއޭގޯ ގޯމޭޒް، ޖެރެމީ ޑޯކޫއަށް ކުރި ފައުލަކާ ގުޅިގެން ވީއޭއާރު ބެލުމަށްފަހު ދިން ޕެނަލްޓީއެކެވެ. ނަމަވެސް، މެޗުގެ 60 ވަނަ މިނެޓުގައި ކައޯރު މިޓޯމާ ވަނީ ލަނޑެއް ޖަހައި ބްރައިޓަންއަށް ނަތީޖާ އެއްވަރުކޮށްދީފައެވެ.

Ad by Hajj Corporation

މި މެޗުގައި ސިޓީގެ ފަރާތުން ގިނަ ހަމަލާތަކެއް ފެނިގެންދިޔައިރު، ބެނާޑޯ ސިލްވާ ފޮނުވާލި ހަމަލާއެއް ގޯލުގެ އަރިމަތީ ދަނޑިއަށް ވަނީ އަރާފައެވެ. މެޗުގެ ފަހުކޮޅު ސިޓީން ބްރައިޓަންގެ ގޯލަށް ބާރުބޮޑުކުރި ނަމަވެސް، ހާލަންޑާއި ރަޔާން ޗެރްކީއަށް ލިބުނު ފުރުސަތުތަކުގެ ބޭނުން ހިފޭގޮތެއް ނުވިއެވެ. މެޗު ނިމުމާއެކު ސިޓީގެ ސަޕޯޓަރުން ވަނީ ޓީމުގެ ކުޅުމާމެދު ހިތްހަމަނުޖެހުން ފާޅުކޮށްފައެވެ.

މި މެޗުގައި ހާލަންޑް ޖެހި ލަނޑަކީ ޕްރިމިއާ ލީގުގެ ތާރީޚުގައި ފެނިގެންދިޔަ 35،000 ވަނަ ލަނޑެވެ. އަދި މިއީ ސިޓީއަށް އޭނާ ކުޅެދިން 173 މެޗުން ކާމިޔާބުކޮށްދިން 150 ވަނަ ލަނޑެވެ. މީގެ އިތުރުން، ބްރައިޓަންގެ ޖޭމްސް މިލްނާ ވަނީ އުމުރުން 40 އަހަރުގައި ޕްރިމިއާ ލީގު މެޗެއްގައި ކުޅުނު ފަސްވަނަ ކުޅުންތެރިޔާގެ ޝަރަފު ހޯދާފައެވެ.

މި ނަތީޖާއާއެކު، ތާވަލުގެ އެއްވަނައިގައި އޮތް އާސެނަލް އާއި ސިޓީއާ ދެމެދު އޮތް ފަރަގު އަށް ޕޮއިންޓަށް ބޮޑުވުމުގެ ފުރުސަތު އެބައޮތެވެ. އާސެނަލް މާދަމާ ރޭގައި ލީގުގައި ލިވަޕޫލާއި ދެކޮޅަށް ނިކުންނައިރު، ސިޓީއަށް ދެން އޮތީ ޖެނުއަރީ 17 ވަނަ ދުވަހު މެންޗެސްޓާ ޔުނައިޓެޑާ ދެކޮޅަށް ކުޅޭ ޑާބީ މެޗެވެ.