ފޮޓޯ: ރައީސް ޑރ. މުއިއްޒު މިރޭ ޕީއެންސީގެ އޮފީސް ހުޅުއްވައި ދެއްވަނީ. --- ކަވަރ ފޮޓޯ ކްރެޑިޓްސް: ވަގުތު ނޫސް

Ad by Hajj Corporation

ޕީއެންސީގެ އޮފީހަކީ އެންމެ ފުރިހަމަ ގޮތުގައި ސިޔާސީ ޕާޓީއެއް ހިންގޭނެ ފަދަ ވަޞީލަތެއް ކަމަށް ރައީސް ޑރ. މުޙައްމަދު މުޢިއްޒު ވިދާޅުވެއްޖެއެވެ.

އެމަނިކުފާނު މިފަދައިން ވިދާޅުވީ، ސަރުކާރު ހިންގާ ޕީޕަލްސް ނެޝަނަލް ކޮންގްރެސް (ކޮންގްރެސް ޕާޓީ)ގެ އޮފީސް ހުޅުވުމުގެ ރަސްމިއްޔާތު މިރޭ ވާހަކަފުޅުދައްކަވަމުންނެވެ.

ޕީއެންސީގެ އައު އޮފީސް ރަސްމީކޮށް މިރޭ ހުޅުވައިދެއްވީ ރައީސް ޑރ. މުޙައްމަދު މުޢިއްޒެވެ. އައު އޮފީސް ހުޅުވާފައި ވަނީ ކުރިންވެސް އެ ޕާޓީގެ އޮފީސް ހިންގި އިމާރާތުގައެވެ. އައު އޮފީސް ހުޅުވާފައި ވަނީ ބޮޑެތި މަރާމާތުތަކާއި ބަދަލުތަކާ އެކުގައެވެ.

ރައީސް ވިދާޅުވީ، މިއީ ޑިމޮކްރެސީގެ ރިވެތި އުސޫލުން ޕާޓީއެއް ހިންގަން ވަރަށް މުހިންމު ވަސީލަތަކަށް ވެގެންދާނެ ކަމަށެވެ. އެތަން ތަރައްޤީކޮށްފައި ވަނީ ވަރަށް ފުރިހަމަކޮށް އެ މަގުން މަސައްކަތްކުރުމަށް ކަމަށްވެސް ރައީސް ވިދާޅުވިއެވެ.

އަލަށް ހުޅުވި އޮފީސް ކުރީގެ އޮފީހަށްވުރު ބޮޑުވެ ޖާގަ ތަނަވަހެވެ.

މީގެ ކުރިން އިދިކޮޅު އެމްޑީޕީއާއި އޭގެ ފަހުން އެމްޑީޕީ ދޫކޮށް ދިޔަ މެންބަރުން އުފެއްދި ޑިމޮކްރެޓްސްއިން ބޭނުންކުރި ހަރުގެ ޕީއެންސީން ބޭނުންކުރަން ފެށީ ޖުލައި، 2024ގެ ކުރީކޮޅެވެ.

އެ ތަން ބޮޑުކޮށް ހަތަރު ފަންގިފިލާއަށް ވަނީ އުސްކޮށްފައެވެ.

އެ ތަން ބޮޑުކުރުމަށް ޓަކައި އެ ސަރަހައްދުގައި މީގެ ކުރިން ހުރި ތޫމް ކެފޭ ވެސް ވަނީ ބަދަލުކޮށްފައެވެ.

އާޓިފިޝަލް ބީޗު ކުރިމައްޗަށްވާހެން ޖަގަހައިގެ ފާރުގައި ބޮޑު އެލްއީޑީ ސްކްރީނެއް ވެސް ހަރުކޮށްފައިވެއެވެ. ބެލެވޭ ގޮތުގައި އެއީ ޕާޓީއާ ގުޅޭ މައުލޫމާތުތައް އާންމުންނަށް ފޯރުކޮށްދިނުމަށާއި، ޕްރޮމޯޝަނަލް ކޮންޓެންޓް ދެއްކުމަށް ހަރުކޮށްފައިވާ ސްކްރީނެކެވެ.

ބޮޑެތި ޚަރަދުތަކެއްކޮށްގެން ތައްޔާރުކުރި މި އޮފީސް އިމާރާތް ވާނީ ރާއްޖޭގައި ސިޔާސީ ޕާޓީއަކުން މިހާތަނަށް ހެދި އެންމެ ބޮޑު އޮފީހަށެވެ.

އޮފީސް ހުޅުވުމުގެ ރަސްމިއްޔާތު ރައީސް ޝަރަފުވެރިކޮށްދެއްވާފައިވާއިރު ރަސްމިއްޔާތުގައި ކޮންގްރެސް ޕާޓީގެ އިސްވެރިންނާއި އެ ޕާޓީއަށް ނިސްބަތްވާ މަޖިލިސް މެމްބަރުންވެސް ބައިވެރިވެވަޑައިގަތެވެ.

އަދި އެ ޕާޓީގެ މެމްބަރުންނާއި ޕާޓީއަށް ހެޔޮއެދޭ ގިނަ ބަޔަކުވެސް ވަނީ މި ރަސްމިއްޔާތަށް ހާޒިރުވެފައެވެ.

ދިވެހި ރައްޔިތުންގެ ޑިމޮކްރެޓިކް ޕާޓީ ވައްޓާލުމަށްފަހު، ޕީއެންސީއަކީ މިހާރު ރާއްޖޭގައި އޮތް އެންމެ މެމްބަރުން ގިނަ ޕާޓީއެވެ.

އެގޮތުން އިލެކްޝަންސް ކޮމިޝަނުގެ އެންމެ ފަހުގެ ތަފާސްހިސާބުތަކުން ދައްކާ ގޮތުގައި އެ ޕާޓީގެ ދަފްތަރުގައި މި ވަގުތު 74،048 މީހުން ވަނީ ރަޖިސްޓްރީވެފަ އެވެ.