ސަރުކާރުގެ "ބޯހިޔާވަހިކަން އެންމެންނަށް" ސިޔާސަތުގެ ދަށުން، ކޮޅުމަޑުލު ވިލުފުށީގައި އިމާރާތްކޮށްފައިވާ 100 ހައުސިންގ ޔުނިޓަށް ޝަރުތު ފުރިހަމަވާ ފަރާތްތަކުން އެޕްލިކޭޝަން ހުށަހެޅުމުގެ ފުރުސަތު މިނިސްޓްރީ އޮފް ކޮންސްޓްރަކްޝަން، ހައުސިންގ އެންޑް އިންފްރާސްޓްރަކްޗަރ އިން މިއަދު ހުޅުވާލައިފިއެވެ.

މިނިސްޓްރީން ބުނި ގޮތުގައި މި ހައުސިންގ ޔުނިޓުތައް ދޫކުރުމަށް ހަމަޖެހިފައިވަނީ ސަރުކާރުގެ ގެޒެޓްގައި ޝާއިއުކޮށްފައިވާ ނަންބަރު G-34/2025 އުސޫލުގެ ދަށުންނެވެ. މި ޔުނިޓުތަކަށް އެދި ފޯމު ހުށަހަޅަންޖެހޭނީ މިނިސްޓްރީގެ ހިޔާވަހި ޕޯޓަލް (https://hiyaavehi.housing.gov.mv) މެދުވެރިކޮށެވެ. އެޕްލިކޭޝަން ހުށަހެޅުމުގެ މުއްދަތަކީ 11 ޖަނަވަރީ 2026 އިން ފެށިގެން 11 އެޕްރީލް 2026 ގެ ނިޔަލަށެވެ.

Ad by Hajj Corporation

ވިލުފުށީގައި އިމާރާތްކޮށްފައިވާ މި ހައުސިންގ ޔުނިޓުތަކުގެ ތަފްސީލަށް ބަލާއިރު، ކޮންމެ ޔުނިޓެއްގައި 3 ކޮޓަރިއާއި، 3 ފާހާނާގެ އިތުރުން ބަދިގެއާއި ސިޓިންގ ރޫމު ހިމެނެއެވެ. މި ޔުނިޓުތައް ބިނާކޮށްފައިވަނީ 2002.09 އަކަފޫޓުގެ ބަންޑާރަ ގޯއްޗެއްގައި ކަމަށާއި، އޭގެ ތެރެއިން އިމާރާތްކުރެވިފައިވާ އޭރިއާގައި 1204.69 އަކަފޫޓު ހުންނާނެ ކަމަށް މިނިސްޓްރީން މައުލޫމާތުދެއެވެ.

ކުރިމަތިލާ ފަރާތްތަކުގެ ކިބައިގައި ހުންނަންޖެހޭ މައިގަނޑު ޝަރުތުތައް

މި މަޝްރޫއުގެ ދަށުން ހައުސިންގ ޔުނިޓަށް އެދޭ ފަރާތްތަކަކީ ދިވެހި ރައްޔިތަކަށްވުމާއެކު، އުމުރުން 18 އަހަރު ފުރިފައިވާ މީހަކަށް ވާންޖެހެއެވެ. މީގެ އިތުރުން ތ. ވިލުފުށީގެ ރަށްވެއްސަކަށްވުން ނުވަތަ އެ ރަށަށް ހިޖުރަކޮށް މެދުނުކެނޑި 10 އަހަރު ދިރިއުޅެފައިވާ ފަރާތަކަށް ވާންޖެހޭނެއެވެ.

މިނިސްޓްރީން އިތުރަށް ބުނެފައިވަނީ، އެޕްލިކޭޝަން ހުށަހަޅާ ފަރާތަކީ ރާއްޖޭގެ އެއްވެސް ރަށެއްގައި އަމިއްލަ ނަމުގައި 600 އަކަފޫޓަށް ވުރެ ބޮޑު ބަންޑާރަ ގޯއްޗެއް ނުވަތަ ފްލެޓެއް/ޔުނިޓެއް ލިބިފައިވާ ފަރާތަކަށް ވެގެން ނުވާނެ ކަމަށެވެ. އަދި އެއްމެދު އިމާރާތަކުން އެފަދަ ބޮޑުމިނުގެ ތަނެއް ގަތުމަށް އެއްބަސްވުމެއްގައި ސޮއިކޮށްފައިވާ ފަރާތަކަށް ވެސް ވެގެން ނުވާނެއެވެ.

މިކަމާ ގުޅޭ އިތުރު މައުލޫމާތު ހޯއްދެވުމަށް މިނިސްޓްރީގެ ފޯން ނަންބަރު 4004900 އަށް ގުޅުއްވުމަށް ނުވަތަ socialhousingprograms@infrastructure.gov.mv އަށް އީމެއިލް ކުރެއްވުމަށް މިނިސްޓްރީން ވަނީ އެދިފައެވެ.