ޖޯޖިއާގެ ކުރީގެ ބޮޑުވަޒީރު އިރަކްލީ ގަރިބަޝްވިލީ މަނީ ލޯންޑަރިންގެ ކުށަށް އިއުތިރާފުވުމާ ގުޅިގެން، އޭނާ ފަސް އަހަރު ދުވަހުގެ މުއްދަތަށް ޖަލަށްލުމަށް އެ ގައުމުގެ ކޯޓުން ހުކުމްކޮށްފިއެވެ.

ޖޯޖިއާގެ ޕްރޮސެކިއުޓަރ ޖެނެރަލްގެ އޮފީހުން ހޯމަ ދުވަހު ހާމަކުރި ގޮތުގައި، މި ހުކުމް އިއްވާފައިވަނީ ގަރިބަޝްވިލީއާއެކު ވެވުނު އިއުތިރާފުގެ އެއްބަސްވުމެއްގެ ދަށުންނެވެ.

Ad by Hajj Corporation

އިރަކްލީ ގަރިބަޝްވިލީ ވަނީ 2013 އިން 2015 އަށް އަދި 2021 އިން 2024 އަށް ޖޯޖިއާގެ ބޮޑުވަޒީރުކަން ކުރައްވާފައެވެ.

"ޖޯޖިއާގެ ޕްރޮސެކިއުޓަރ އޮފީހުން ވަނީ ދައުވާ ލިބޭ އިރަކްލީ ގަރިބަޝްވިލީއާއެކު އިއުތިރާފުގެ އެއްބަސްވުމެއްގައި ސޮއިކޮށްފައެވެ. މި އެއްބަސްވުމުގެ ދަށުން، ޖޯޖިއާގެ ގާނޫނުލްއުގޫބާތުގެ 194 ވަނަ މާއްދާގެ ތިންވަނަ ބައިގެ ދަށުން ކުރެވުނު ކުށަށް ކުރީގެ ބޮޑުވަޒީރުގެ މައްޗަށް 5 އަހަރުގެ ޖަލު ހުކުމެއް ވަނީ އިއްވާފައެވެ." ޕްރޮސެކިއުޓަރ އޮފީހުގެ ބަޔާނުގައި ބުނެފައިވެއެވެ.

ޖަލު ހުކުމުގެ އިތުރުން، އަދަބެއްގެ ގޮތުން ގަރިބަޝްވިލީ 1 މިލިއަން ލާރީ (ގާތްގަނޑަކަށް 370,000 ޑޮލަރު) އިން ޖޫރިމަނާކުރުމަށް ވެސް ވަނީ ނިންމާފައެވެ. އަދި ކުށް ކޮށްގެން އޭނާ ހޯދާފައިވާ ފައިސާ ދައުލަތަށް ހިފެހެއްޓުމަށް ވެސް ކޯޓުން ވަނީ އަމުރުކޮށްފައެވެ.

ތަހުގީގުގެ ތަފްސީލު

ތަހުގީގު ކުރާ ފަރާތްތަކުން ހާމަކޮށްފައިވާ ގޮތުގައި، 2019 އާއި 2024 އާ ދެމެދު ގަރިބަޝްވިލީ ވަނީ ގާނޫނާ ހިލާފު ވިޔަފާރި މުއާމަލާތްތަކެއް ހިންގަވައި، އޭނާގެ އާމްދަނީގެ ބަޔާންތައް އޮޅުވާލައްވާފައެވެ. މި މައްސަލަ ފެންމަތިވެފައިވަނީ 2023 ވަނަ އަހަރުގެ އޮކްޓޫބަރު މަހު ޖޯޖިއާގެ ހާއްސަ ހިދުމަތްތަކުން ހިންގި އޮޕަރޭޝަނެއްގެ ތެރެއިންނެވެ.

އެ އޮޕަރޭޝަނުގައި ކުރީގެ ބައެއް އިސްވެރިންގެ ގެތައް ބަލައި ފާސްކުރިއިރު 7 މިލިއަނަށްވުރެ ގިނަ ޑޮލަރު ފެނިފައިވާ ކަމަށް ރިޕޯޓުތައް ބުނެއެވެ. މީގެ ތެރޭގައި ގަރިބަޝްވިލީގެ ގެއިން ފެނުނު ފައިސާ ވެސް ހިމެނެއެވެ. ޕްރޮސެކިއުޓަރ އޮފީހުން ބުނީ ގަރިބަޝްވިލީ ކުށަށް އިއުތިރާފުވެ، އެއްބަސްވުމުގެ ޝަރުތުތަކަށް އެއްބަސްވެފައިވާތީ ކޯޓުން އެ ހުށަހެޅުމަށް ތާއީދުކޮށްފައިވާ ކަމަށެވެ.