ވައިގެ ދަތުރުފަތުރުގައި ބޭނުންކުރާ ތެޔޮ (ޖެޓް ފިއުލް) ގެ އަގު މިދިޔަ މަހެއްހާ ދުވަހުގެ ތެރޭގައި 83 އިންސައްތައަށް އުފުލި، އެއަރލައިންތަކަށް ބޮޑެތި ގޮންޖެހުންތަކަކާ ކުރިމަތިލާން ޖެހިފައިވާކަމަށް އިންޓަރނޭޝަނަލް އެއަރ ޓްރާންސްޕޯޓް އެސޯސިއޭޝަން (އައި.އޭ.ޓީ.އޭ) އިން ބުނެފިއެވެ.

އައި.އޭ.ޓީ.އޭ އިން ހާމަކޮށްފައިވާ އެންމެ ފަހުގެ ތަފާސްހިސާބުތަކަށް ބަލާއިރު، ފާއިތުވި ހަފުތާގެ ތެރޭގައި އެކަނިވެސް ތެލުގެ އަގު ވަނީ 11.2 އިންސައްތަ އިތުރުވެ، ފީފާއެއްގެ އަގު 175 ޑޮލަރަށް އަރާފައެވެ. އަދި އަހަރީ ގޮތުން ބަލާއިރު، މި އަގު ވަނީ 94.4 އިންސައްތައަށް އުފުލިފައެވެ.

Ad by Hajj Corporation

މިގޮތަށް ކުއްލިއަކަށް ތެލުގެ އަގު ބޮޑުވުމަކީ އެއަރލައިންތަކުގެ ފައިދާއަށް ނޭދެވޭ އަސަރުކުރާނެ ކަމެކެވެ. ސަބަބަކީ ތެލަކީ އެއަރލައިންތަކުން ކުރަންޖެހޭ އެންމެ ބޮޑު އެއް ޚަރަދަށް ވެފައި، ކުއްލިއަކަށް އަގު ބޮޑުވުމުން ޓިކެޓުގެ އަގަށާއި އޮޕަރޭޝަންތަކަށް ބަދަލު ގެނައުމަށް އެކަށީގެންވާ ވަގުތު ނުލިބޭތީއެވެ.

ތެލުގެ އަގު މިހާ ބޮޑަށް އުފުލެން މެދުވެރިވީ މެދުއިރުމަތީގައި ހިނގަމުންދާ ހަމަނުޖެހުންތަކާ ގުޅިގެންނެވެ. އެގޮތުން، އެމެރިކާއާއި އިސްރާއީލުން އީރާނަށް ދިން ހަމަލާތަކާ ގުޅިގެން ދުނިޔޭގެ ބާޒާރުގައި ސާފުނުކުރާ ތެލުގެ އަގު ވަނީ ބޮޑުތަނުން އުފުލިފައެވެ.

މި ހަމަލާތަކުގައި އީރާނުގެ ގިނަ ބަޔަކު ޝަހީދުވެފައިވާއިރު، މީގެ ރައްދުގައި އީރާނުން ދެމުންދާ ހަމަލާތަކުގެ ސަބަބުން ދުނިޔޭގެ ވައިގެ ދަތުރުފަތުރަށާއި މާލީ ބާޒާރުތަކަށް ވަނީ ބޮޑެތި ބުރޫއެރުންތަކެއް ކުރިމަތިވެފައެވެ.