ސްޕެނިޝް ސުޕަރ ކަޕުގެ ފައިނަލް މެޗުގައި ވާދަވެރި ބާސެލޯނާ އަތުން ބަލިވި މެޗަށްފަހު، ރެއާލް މެޑްރިޑްގެ ކޯޗު ޒަބީ އަލޮންސޯ، މަގާމުން އަމިއްލައަށް ވަކިވެއްޖެއެވެ.

މަގާމާ ހަވާލުވިތާ ގާތްގަނޑަކަށް އަށް މަސް ދުވަހުގެ ތެރޭގައި ރެއާލްގެ ކޯޗުކަމުން އަލޮންސޯ ވަކިވެފައިވާއިރު، ޓީމުގެ ކުޅުންތެރިންގެ މެދުގައި އަލޮންސޯގެ މަގުބޫލުކަން ވަނީ ވަރަށް ބޮޑަށް ކުޑަވެފައި ކަމަށް ރިޕޯޓުތައް ބުނެއެވެ.

ރެއާލް އިން ނެރުނު ބަޔާނެއްގައި ބުނީ، އުމުރުން 44 އަހަރުގެ އެލޮންސޯ، އެ ޓީމުގެ ކޯޗުކަމުގެ މަގާމުން ވަކިވެފައިވަނީ ދެ ފަރާތުން ކުރެވުނު މަޝްވަރާތަކަށްފަހު ވެވުނު އެއްބަސްވުމާ އެއްގޮތަށް ކަމަށެވެ. އަދި ރެއާލްގެ ވެރިންނާއި ކުޅުންތެރިންނާއި ސަޕޯޓަރުންގެ ހިތުގައި، ކްލަބްގެ ލެޖެންޑެއްގެ ގޮތުގައި އަލޮންސޯއަށް އަބަދުވެސް ހާއްސަ މަގާމެއް އޮންނާނެކަމަށާއި ރެއާލް އަކީ އަބަދުވެސް އެލޮންސޯގެ "ހޯމް" އަށް ވާނެކަމަށް ރެއާލްގެ ބަޔާނުގައި ބުނެފައި ވެއެވެ.

Ad by Hajj Corporation

ރެއާލް މެޑްރިޑުގެ ކުޅުންތެރިއެއްގެ ގޮތުގައި ފަސް އަހަރު ހޭދަކުރި އެލޮންސޯ، ރެއާލްގެ ކޯޗުކަމާ ހަވާލުވީ މިދިޔަ ޖޫން މަހުގެ 25 ވަނަ ދުވަހު، އެ ޓީމުގެ ކޯޗުކަމުގައި އޭރު ހުރި ކާލޯ އެންޗެލޮޓީގެ ބަދަލުގައެވެ.

ރެއާލް އިން ވަނީ އަލޮންސޯގެ ބަދަލުގައި، ކުޑަވަގުތުކޮޅެއްގެ ތެރޭގައި އެ ޓީމުގެ ކޯޗަކަށް، މީގެ ކުރިން އެޓީމަށް ކުޅެފައިވާ، އަދި އިތުބީ ދުވަސްތަކުގައި ރެއާލްގެ ޒުވާން ޓީމުތަކަށާއި ރެއާލްގެ ބީ ޓީމުގެ ކޯޗުކަން ކޮށްފައިވާ ސްޕެއިންގެ ރައުލް އާބަލޯއާ ހަމަޖެއްސިކަން ރަސްމީކޮށް އިއުލާނުކޮށްފައެވެ.

ރެއާލްގެ ކޯޗުކަމުން އެލޮންސޯ ވަކިވިއިރު އޭނާގެ އިރުޝާދުގެ ދަށުން ރެއާލުން ކުޅުނު 34 މެޗުގެ ތެރެއިން 24 މެޗުން ރެއާލް ވަނީ މޮޅުވެފައެވެ.