ދިރާސީ އައު އަހަރަށް ތައްޔާރުވުމުގެ ގޮތުން މަދަރުސާތައް މަރާމާތުކުރުމަށް 20 މިލިއަނަށްވުރެ ގިނަ ރުފިޔާ ހޭދަވާކަމަށް، ތަޢުލީމާބެހޭ ވަޒީރު ޑރ. އިސްމާޢީލް ޝަފީޢު ވިދާޅުވެއްޖެއެވެ.

ދައުލަތުގެ މީޑިއާއިން ގެނެސްދިން ޕްރޮގްރާމެއްގައި ވާހަކަދައްކަވަމުން ވަޒީރު ވިދާޅުވީ މި ދެ އަހަރަކީ ސްކޫލްތަކުގެ ޢުމްރާނީ މަސައްކަތްތަކަށް އެންމެ ބޮޑު ހޭދައެއް ކުރަމުންދާ އަހަރުތައްކަމަށާއި ފާއިތުވި ދެ އަހަރެކޭ އެއްގޮތަށް، މިއަހަރުވެސް ދިރާސީ އައު އަހަރަށް ތައްޔާރުވުމަށް ވުޒާރާއިން ގިނަ މަސައްކަތްތަކެއް ކުރަމުންދާކަމަށެވެ.

އެގޮތުން ވަޒީރު ފާހަގަކުރެއްވިގޮތުގައި މަަރުސާތަކަށް ބޭނުންވާ މަރާމާތަކީ އެންމެ އިސްކަން ދީގެން ކުރިއަށްގެންދާ އެއް މަސައްކަތެވެ.

މާލެއާއި އަތޮޅުތަކުގެ މަދަރުސާތަކުންވެސް މަރާމާތަށް ބޭނުންވެގެން ވަރަށް ގިނަ ހުށަހެޅުންތައް އައިކަން ވަޒީރު ފާހަގަކުރެއްވިއެވެ. އެހުރިހާ މަސައްކަތްތަކެއްވެސް ކުރިއަށްގެންދިއުމަށް ބޭނުންވާ ކަންކަން ސްކޫލްތަކަށް ހަމަޖައްސައިދީފައިވާކަމަށް ވަޒީރު ވިދާޅުވިއެވެ. މީގެތެރޭގައި ބޮޑެތި މަރާމާތުގެ މަސައްކަތްތައްވެސް ހިމެނެއެވެ. އޭގެތެރެއިން ސްކޫލް ހުޅުވުމުގެ ކުރިން ކޮންމެހެން ކުރަންޖެހޭ ހުރިހާ މަސައްކަތްތައް ނިންމާނެކަމުގެ ޔަގީންކަން ވަޒީރު ދެއްވިއެވެ. އަދި ދެން ހިމެނޭ މަސައްކަތްތައް އެއަށްފަހު ކުރިއަށްދާނެކަމަށް ވަޒީރު ވިދާޅުވިއެވެ.

ދިރާސީ އަހަރުގެ ތައްޔާރީތައް، ވުޒާރާއާއި ސްކޫލްތައް ގުޅިގެން ކުރިއަށްދަނީ ވަރަށް ފުރިހަމައަށްކަން ވަޒީރު ފާހަގަކުރެއްވިއެވެ.

Ad by Hajj Corporation