އީރާނުގައި ކުރަމުންދާ މުޒާހަރާތަކާ ގުޅިގެން އެމެރިކާއިން އެ ޤައުމާ ދެކޮޅަށް ދެމުންދާ އިންޒާރުތަކާއި އަޅަމުންދާ ފިޔަވަޅުތަކުގެ ސަބަބުން، އީރާނުން އެމެރިކާއާއެކު މުއާމަލާތުކުރުން ހުއްޓާލައިފިއެވެ.

އީރާނުގައި ތަކެތީގެ އަގުތައް އިންތިހާއަށް އުފުލިފައިވާތީ އެކަމާ ދެކޮޅަށް އެ ޤައުމުގެ ރައްޔިތުން މިދިޔަ މަހުގެ ފަހުކޮޅު ފެށި މުޒާހަރާތައް މިހާރުވަނީ އެޤައުމުގެ އެކި ސަރަޙައްދުތަކަށް ފެތުރިފައެވެ. އެ މުޒާހަރާތަކުގައި ސަލާމަތީ ބާރުތަކާ ކުރިމަތިލުންތައް ހިނގުމުގެ އިތުުރުން މުދަލަށް ބޮޑެތި ގެއްލުންތައް ދީފައިވެސް ވެއެވެ. އަދި ހަމަނުޖެހުންތަކުގައި 2،600އެއްހާ މީހުން މަރުވެފައިވާ ކަމަށް ބެލެވެއެވެ.

މުޒާހަރާތައް ހުއްޓުވަން އެކަށީގެންނުވާ ބާރުގެ ބޭނުންކުރާނަމަ، މުޒާހަރާގެ ބައިވެރިންގެ ދިފާޢުގައި އެމެރިކާއިން އީރާނަށް އަރާނެކަމުގެ އިންޒާރު، އެމެރިކާގެ ރައީސް ޑޮނަލްޑް ޓްރަމްޕް ގެންދަނީ ތަކުރާރުކޮށް ދެއްވަމުންނެވެ. ނަމަވެސް މި އިންޒާރުތަކަށް އަމަލުކުރައްވައިފިނަމަ އެމެރިކާގެ އަސްކަރީ މަރުކަޒުތަކަށް ހަމަލާދޭނެ ކަމަށް އީރާނުން ބުނެފައިވެއެވެ.

އީރާނުން ހަނގުރާމައަށް ތައްޔާރަށް އޮތް ނަމަވެސް މަޝްވަރާގެ މަގުން ކަންކަން ޙައްލުކުރުމަށް ޝައުޤުވެރިވާ ކަން އެޤައުމުން މީގެ ކުރިން ހާމަޮށްފައިވެއެވެ. ނަމަވެސް އޭގެ ފަހުން ޓްރަމްޕް ވަނީ އީރާނާއެކު ވިޔަފާރިކުރާ ޤައުމުތަކުން އެމެރިކާއަށް އެތެރެކުރާ މުދަލުން 25 އިންސައްތައިގެ އިތުރު ޓެކުހެއް ނަންގަވާނެ ކަމަށް އިޢުލާނުކުރައްވާފައެވެ. މައްސަލަ މިހާރު އިތުރަށް ގޯސްވެ، އީރާނުން އެމެރިކާއާ އެކު މުއާމަލާތު ކުރުން ހުއްޓާލައިފައިވާއިރު، އީރާނުގެ ޚާރިޖީ ވަޒީރު ޢައްބާސް ޢަރާޤްޗީއާއި އެމެރިކާއިން މެދުއިރުމައްޗަށް ކަނޑައަޅާފައި ހުންނަވާ ޚާއްޞަ މަންދޫބު، ސްޓީވް ވިޓްކޮފްއާ ދެމެދު ދެކެވެމުން ދިޔަ ވާހަކަތައް ވަނީ މެދުކެނޑިފައެވެ.

އީރާނުގެ ސަރުކާރުން އެ ޤައުމުގައި ހަަމަނުޖެހުން އުފައްދާ މީހުން ސިފަކޮށްފައި ވަނީ ނިރުބަވެރިންގެ ގޮތުގައެވެ. އެޤައުމުން ވަނީ އެމެރިކާއާއި ޔަހޫދީން އެޤައުމުގައި ހަމަނުޖެހުން އުފައްދާ، ޤައުމު ހަލަބޮލި ކުރަމުންދާ ކަމަށް ތުހުމަތުކޮށްފައެވެ. އެޤައުމުގައި ވަރުގަދަ މުޒާހަރާތައް ކުރި ނަމަވެސް، ސަރުކާރު ބަލިކަށިވެފައި ނުވާކަމަށް އީރާނުން ދަނީ ބުނަމުންނެވެ.