މާލެ ސަރައްހައްދަށް ދިމާވެފައިވާ ބޯހިޔާވަހިކަމުގެ މައްސަލައަށް ބޮޑު ލުޔެއް ހޯދައިދޭނެ މަޝްރޫއެއް ކަމަށްވާ، ހުޅުމާލެ ތިންވަނަ ފިޔަވަހީގެ ބިން ހިއްކުމުގެ މަޝްރޫގެ ބޮޑު އިންސައްތައެއް ނިމިފައިވާކަމަށް، އެ މަސައްކަތުގެ ކޮންޓްރެކްޓަރ، މޯލްޑިވްސް އެއަރޕޯޓްސް ކޮމްޕެނީ ލިމިޓެޑް (އެމްއޭސީއެލް) އިން ބުނެފިއެވެ.

މި މަސައްކަތުގެ އަދާހަމަ ހިއްސާކުރަމުން އެކުންފުނިން ކޮށްފައިވާ ޕޯސްޓެއްގައި ވާގޮތުން، މަސައްކަތުގެ 94% އިންސައްތަ މަސައްކަތް (59 ހެކްޓަރު) ވަނީ ނިމިފައެވެ.

Ad by Hajj Corporation

ހުޅުމާލެ ފޭސް ތިނަކީ ނިމިދިޔަ ސަރުކާރުން އެތަނުގެ މަސައްކަތް ނުނިންމާ، "ކަނޑު އަޑިން" ގޯތިތަކެއް ބާހާލާފައިވާ ތަނެކެވެ. އެ މަސައްކަތް މަޑުޖެހިފަ އޮއްވާ އެ މަސައްކަތް މި ސަރުކާރުން ހަލުވިކަމާއެކު އަލުން ފެށީ އެމްއޭސީއެލްއާ ހަވާލުކޮށްގެންނެވެ. މަސައްކަތް ކުރިއަށް ގެންދަނީ، ބޮސްކާލިސްގެ 22,000 ސީބީއެމްގެ ދެ ޑްރެޖަރު ބޭނުންކޮށްގެންނެވެ.

ތިންވަނަ ފިޔަވަހީގެ މަސައްކަތުގެ ދަށުން ޖުމުލަ 63 ހެކްޓަރުގެ ބިން ހިއްކާނެއެވެ. މަސައްކަތް ކުރިއަށްގޮސްފައިވާ ހިސާބާ ގުޅޭގޮތުން އެމްއޭސީއެލްއިން ބުނީ މަސައްކަތްތައް ކުރިއަށް ގެންގޮސް ނިންމާލަން ރާވާފައިވާ ދުވެލީގައި މަސައްކަތްތައް ކުރިއަށްދާ ކަމަށެވެ.

މާލެ ސަރަހައްދަށް ކުރިމަތިވެފައިވާ ބިމުގެ ޖާގައިގެ މައްސަލައަށް ހައްލެއް ހޯދައިދިނުމަށް ފަސް ސަރަހައްދަކުން 1600 ހެކްޓަރަށްވުރެ ބޮޑު ސަރަހައްދެއްގެ ބިން ހިއްކުމުގެ މަސައްކަތް ކުރިއަށް އެބަދެއެވެ. އެގޮތުން، ގުޅީފަޅުން ޖުމްލަ 277 ހެކްޓަރުގެ ބިން ހިއްކުމުގެ މަސައްކަތް ކުރިއަށްދާއިރު، ރަސްމާލެއިން 1009 ހެކްޓަރު ހިއްކުމުގެ މަސައްކަތްވެސް ބާރު ދުވެލީގައި ކުރެވެމުން އެބަދެއެވެ.