މިހާރު ކުރިއަށްދާ ސާފް ވިމެންސް ފުޓްސެލް ޗެމްޕިއަންޝިޕްގައި ރާއްޖެ ޓީމު ކުޅުނު ތިންވަނަ މެޗުގައި ކުޅުން ރަނގަޅުކުރި ނަމަވެސް، 3-1 ގެ ނަތީޖާއަކުން ޕާކިސްތާނު އަތުން ބަލިވެއްޖެއެވެ.

ފުރަތަމަ ދެ މެޗާ އަޅާބަލާއިރު މި މެޗުގައި ރާއްޖެ ޓީމުން ވަނީ ވަރަށް ރަނގަޅު ކުޅުމެއް ދައްކާ، ޕާކިސްތާނަށް އުނދަގޫކޮށްފައެވެ.

Ad by Hajj Corporation

މެޗުގެ ފުރަތަމަ ގޯލު، ކެޕްޓަން ޒަހްރާ ބުޚާރީ ނަގައިދިން ކޯނަރަކުން ޕާކިސްތާނަށް ކާމިޔާބުކޮށްދިނީ އަޒްވާ ޗޯދްރީއެވެ. މެޗުގެ 9 ވަނަ މިނެޓުގައި ލިބުނު ހިލޭ ޖެހުމަކުން، ރާއްޖެއަށް މި މެޗުގައި ޖެހުނު ހަމައެކަނި ގޯލު ޖަހައިދިނީ މަރިޔަމް ނޫރާއެވެ. ޕާކިސްތާނުން ވަނީ، ހާފް ނިމުމުގެ ކުރިން ދެވަނަ ފަހަރަށް ލީޑު ނަގާފައެވެ. ކީޕަރު، ޖުނާ ނަވާލް ފާރޫޤީ އެއްލި ބޯޅައެއް ކޮންޓްރޯލް ކުރުމަށްފަހު، ރާއްޖެ ކީޕަރު ބޯމަތިން ބޯޅަ ފޮނުވާލައިގެން، އެޓީމަށް ކާމިޔާބުކޮށްދިނީ ކެޕްޓަން، ޒަހްރާ ބުޚާރީއެވެ.

ދެވަނަ ހާފުގައި ޓީމުގެ ތިންވަނަ ގޯލު ކާމިޔާބުކޮށްދީފައިވަނީ އަންމޫލް ހީރާއެވެ.

މުބާރާތުގައި މިހާތަނަށް ރާއްޖެއަށް މެޗަކުން މޮޅުވެވިފައި ނުވާއިރު، ރާއްޖެ ކޮޅަށް ތިން މެޗުން 19 ގޯލު ވަދެފައި ވެއެވެ.

މި މުބާރާތުގައި ރާއްޖޭގެ އަންހެން ޓީމު އިތުރު މެޗެއް ކުޅޭނީ މިމަހުގެ 21 ވަނަ ދުވަހު، ބޫޓާންއާ ދެކޮޅަށެވެ.