ޑިޕްލޮމާއާއި ޑިގްރީ ފަދަ އެކި ސަނަދުތަކުގެ ކޯސްތަކުގައި ބައެއް ދަރިވަރުން އެހެން މީހުންގެ ފިކުރީ މަސައްކަތްތައް ނަކަލުކޮށް، އެކި މީހުން ލައްވާ މަސައްކަތްކުރުވުމާއި، ޖެނެރޭޓިވް އޭއައި ބޭނުންކުރުން ފަދަ ކަންކަން ހުއްޓުވައި، ރާއްޖޭގެ މަތީ ތައުލީމުގެ ފެންވަރާއި އިތުބާރު ހިފެހެއްޓުމަށް ކުރަން ފެންނަ ކަންކަން ރައްޔިތުންގެ މަޖިލީހުގެ ގަވާއިދު ކޮމިޓީއަށް ހުށަހަޅައިފިއެވެ.

މި މައްސަލަ މަޖިލީހުގެ ގަވާއިދު ކޮމިޓީއަށް ހުށަހެޅުއްވީ ގަލޮޅު އުތުރު ދާއިރާގެ މެންބަރު މުހައްމަދު އިބްރާހީމް (ކުޑޫ) އެވެ.

Ad by Hajj Corporation

ކުޑޫ ރައްޔިތުންގެ މަޖިލީހުގެ ރައީސް ޢަބްދުއްރަޙީމް ޢަބްދުالله އަށް މިއަދު ފޮނުއްވި ސިޓީއެއްގައި ވަނީ، ރާއްޖޭގައި މަތީ ތައުލީމުގެ ފުރުސަތުތައް ފަހިވެ، އެކަމުގެ ސަބަބުން އޮންލައިންކޮށް ކިޔެވުން، ނުވަތަ އޮންލައިން އަދި ސީދާ ތަނަށް ހާޒިރުވެގެން ކިޔެވުމުގެ ދާއިރާއިން ކުރިއެެރުންތައް ހޯދަމުން އަންނަ ކަމަށެވެ.

އެހެންކަމުން، އެކި ރަށްރަށުގައި ކިޔަވާ ދަރިވަރުންނަށް މަތީ ތައުލީމު ހާސިލުކުރުމުގެ ފުރުސަތު އިތުރުވެފައިވާކަން ކުޑޫގެ ސިޓީގައި ފާހަގަކޮށްފައިވެއެވެ.

ނަމަވެސް، ތައުލީމީ ފެންވަރާއި ނަޒާހާތްތެރިކަމާ ގުޅޭ އެކި މައްސަލަތައް ފެންމަތިވަމުން އަންނަކަން ފާހަގަކުރައްވައި، ކުޑޫގެ ސިޓީގައި ވަނީ އޮންލައިންކޮށް ބާއްވާ އިމްތިހާނުތަކުގެ ނަޒާހާތްތެރިކަމާ ގުޅޭ ޝަކުވާތައް ލިބެމުން އަންނަކަން ފާހަގަކޮށްފައެވެ.

އެ ސިޓީއާއެކު ކުޑޫ ހުށަހެޅުއްވި ކަރުދާހުގައިވާ ގޮތުން، ބައެއް ކޯސްތަކުގައި އެހެން މީހުންގެ މަސައްކަތްތައް ކޮޕީކުރުމާއި، އުޖޫރަ ދީގެން މީހުން ލައްވާ މަސައްކަތްކުރުވުމާއި، ހުއްދަނޫން ގޮތެއްގައި އޭއައިގެ އެހީތެރިކަން ހޯދުން ފަދަ ކަންކަން ދެނެގަނެވޭނެ އެއް ގޮތެއް ވެސް ނެތެވެ. އެހެންވެ، އެ ގޮތްގޮތަށް ފާސްވުމުގެ ފުރުސަތު ދަރިވަރުންނަށް އޮންނައިރު، އެ ބެލޭނެ މިންގަނޑެއް ނެތްކަމަށް، އެ ކަރުދާހުގައި ބަޔާންކޮށްފައިވެއެވެ.

އެފަދަ ކަންކަމުގެ ސަބަބުން، ބުރަ މަސައްކަތުން ތައުލީމު ހާސިލުކުރާ ދަރިވަރުންގެ ސަނަދުގެ އަގުވެއްޓި، ވަޒީފާ ދޭ ފަރާތްތަކަށް އެ ސަނަދުތަކަށް އިތުބާރުކުރަން ދަތިވާނެ ކަމަށާއި، މިއީ ރާއްޖޭގެ މަތީ ތައުލީމަށް ލިބޭ ބޮޑު ގެއްލުމެއްކަން ކުޑޫގެ ކަރުދާހުގައިވެއެވެ.

މީގެ އިތުރުން، މިފަދަ ޝަކުވާތަކަށް މޯލްޑިވްސް ކޮލިފިކޭޝަންސް އޮތޯރިޓީ (އެމްކިއުއޭ) އިން އެކަށީގެންވާ ވަގުތުގައި ޖަވާބުދާރީ ނުވާކަމަށާއި، ކޯސްތަކުގެ ފެންވަރު ބެލުމުގައި ބޮޑެތި އިހުމާލުތަކެއް ހުރިކަންވެސް މެންބަރުގެ ސިޓީގައި ފާހަގަކުރައްވާފައިވެއެވެ.