އިންޑިޔާގެ ރޫޕޭ ކާޑު ރާއްޖޭގައި ބޭނުންކުރެވޭ ގޮތް ހަދައި، މިއަދު އިފްތިތާޙްކޮށްފިއެވެ.

ރޫޕޭ ކާޑު ރާއްޖޭގައި ބޭނުންކުރެވޭ ގޮތަށް އިފްތިތާހުކޮށްފައިވަނީ، ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު މިހާރު އިންޑިޔާއަށް ކުރައްވަމުން ގެންދަވާ ދަތުރުފުޅުގެ ތެރެއިން، އެގައުމުގެ ބޮޑު ވަޒީރު ނަރެންދުރަ މޯދީއާއެކު ކުރެއްވި މަޝްވަރާ ބައްދަލުވުންތަކަށް ފަހުއެވެ.

އެ ޚިދުމަތް ރާއްޖޭގައި ތައާރަފްކުރުމަށް ފަހު ބޭއްވި ނޫސްވެރިންގެ ބައްދަލުވުމުގައި ބޮޑު ވަޒީރު ނަރެންދުރަ މޯދީ ވަނީ، އިންޑިއާގެ އިންސްޓެންޓު ސިސްޓަމް، ޔުނިފައިޑް ޕޭމަންޓު އިންޓަފޭސް (ޔޫޕީއައި)ގެ ޚިދުމަތް ވެސް ރާއްޖޭގައި ފަށާނެ ކަމުގައި ވިދާޅުވެފައެވެ.

ރައީސް ޑރ މުޙައްމަދު މުޢިއްޒު އިންޑިޔާގެ ބޮޑު ވަޒީރާ ކުރެއްވި ބައްދަލުވުމުގެ ތެރެއިން -- ފޮޓޯ/ ރައީސް އޮފީސް

އެގޮތުން އެ މަސައްކަތް ކުރުމަށް ރާއްޖެއާއި އިންޑިޔާގެ ފަރާތުން މީގެ ކުރިން ވަނީ އެމްއޯޔޫއެއްގައި ވެސް ސޮއިކޮށްފައެވެ. އެ އެމްއޯޔޫގައި ރާއްޖޭގެ ފަރާތުން ސޮއި ކުރެއްވީ މީގެ ކުރިން، އެގައުމުގެ ޚާރިޖީ ވަޒީރު ރާއްޖެއަށް ކުރެއްވި ރަސްމީ ދަތުރުފުޅުގެ ތެރެއިންނެވެ.

މިއަދު ރާއްޖޭގައި ތައާރަފްކުރި ރޫޕޭ ކާޑުގެ ފުރަތަމަ މުއާމަލާތް، ބިޒްނަސް ސެންޓާ ކޯޕަރޭޝަނުގެ ދަށުން ހިންގަމުން އަންނަ އޮތެންޓިކް މޯލްޑިވްސްގެ މާލޭގެ ފިހާރައިގައި ވަނީ ހިންގާފައެވެ. އެ ކާޑަކީ ދިވެހީން އާންމު ގޮތެއްގައި ވެސް ބޭނުންކުރާ މާސްޓާ ކާޑު އަދި ވިސާ ކާޑު ގޮތަށް ބޭނުންކުރެވޭނެ ކާޑެކެވެ. އެ ކާޑު ބަލައިގަތުމަށް ބީއެމްއެލް އިން ވެސް ވަނީ ނިންމާފައެވެ.