އިންޑިޔާގެ ބޮޑުވަޒީރު ނަރެންދުރަ މޯދީ، ރާއްޖެއަށް ވަޑައިގެންނެވުމަށް ރައީސް ޑރ. މުޙައްމަދު މުއިއްޒު ދައުވަތު ދެއްވައިފިއެވެ.

އެ ދައުވަތު ދެއްވިކަން ރައީސް އިއުލާނުކުރެއްވީ، އިންޑިޔާއަށް ރައީސް ކުރައްވަމުން ގެންދަވާ ދަތުރުފުޅުގެ ތެރެއިން މިއަދު ދެ ބޭފުޅުން އެކުގައި ބޭއްވެވި ނޫސްވެރިންގެ ބައްދަލުވުމުގައެވެ.

Ad by Hajj Corporation

އެގޮތުން ރައީސް ވިދާޅުވީ، ބޮޑު ވަޒީރު މޯދީއަށް ދައުވަތު ދެެއްވީ، ރާއްޖެ އާއި އިންޑިޔާގެ ގާތް ގުޅުމަށް 60 އަހަރު ފުރޭ މުނާސަބަތު ފާހަގަކުރުމަށެވެ.

ރައީސް އިންޑިޔާއަށް ކުރައްވާ ފުރަތަމަ ފުރަމާނަ ދަތުރުފުޅުގައި، ބޮޑުވަޒީރު މޯދީއާ ބައްދަލުކުރެއްވީ މިއަދުގެ ހެނދުނުގެ ވަގުތެއްގައެވެ. އެގޮތުން އެ ދައުވަތު ރައީސް، މޯދީއަށް ދެއްވީ ވެސް އެ ބައްދަލުވުމުގައެވެ.

އެ ދައުވަތު ގަބޫލުކުރައްވައި މޯދީ ރާއްޖެ ވަޑައިގަންނަވައިފި ނަމަ، އެކަން ވާނީ ބޮޑުވަޒީރު ކަމުގައި ހުންނަވައިގެން މޯދީ ރާއްޖެއަށް ކުރައްވާ ތިން ވަނަ ދަތުރުފުޅަށެވެ. އެގޮތުން މޯދީ ވަނީ ކުރީގެ ރައީސް އިބްރާހިމް މުޙައްމަދު ސޯލިޙް ހުވާކުރެއްވުމުގެ ދަރުބާރަށާއި، އޭގެ ފަހުން 2022 ވަނަ އަހަރު ފުރަމާނަ ދަތުރުފުޅެއްގައި މާލެ ވަޑައިގަންނަވައިފައެވެ.

ރައީސް އިންޑިޔާއަށް ކުރައްވަމުން ގެންދަވާ ދަތުރުފުޅުގެ ތެރެއިން ރާއްޖޭގައި މުޅިން އަލަށް ރޫޕޭ ކާޑު އިފްތިތާހްކޮށް، 400 މިލިއަން ޑޮލަރުގެ ކަރަންސީ ސްވެޕް އެއްބަސްވުމެއްގައި ވެސް ދެ ގައުމުން ވަނީ ސޮއިކޮށްފައެވެ.