މި ސީޒަނުގެ ބުންޑެސްލީގާގައި ބަލިނުވެ ބަޔާން މިއުނިކުން ދަމަހައްޓަމުން އައި ރެކޯޑު، އޮގްސްބާގް އަތުން 2-1 އިން ބަލިވުމާ އެކު ނިމުމަކަށް އަތުވެއްޖެއެވެ. މިއީ މިދިޔަ އަހަރުގެ މާޗް މަހުގެ ފަހުން ލީގުގައި ބަޔާން ބަލިވި ފުރަތަމަ ފަހަރެވެ.

ވިންސެންޓް ކޮމްޕެނީގެ އިރުޝާދުގެ ދަށުން ކުޅެމުން އަންނަ ބަޔާން މިއުނިކުން މެޗުގެ ފުރަތަމަ ލަނޑު ޖަހައި ކުރިހޯދީ މެޗުގެ 23 ވަނަ މިނެޓުގައެވެ. މައިކަލް އޮލީސޭ ނެގި ކޯނަރަކުން މި ލަނޑު އެ ޓީމަށް ކާމިޔާބުކޮށްދިނީ ހިރޯކީ އިޓޯ އެވެ. އޭގެ ފަހުން ލުއިސް ޑިއާޒް އަދި ލެނާޓް ކާލް އަށް ލީޑު ފުޅާކުރަން ފުރުސަތުތަކެއް ލިބުނު ނަމަވެސް ބޭނުން ހިފޭގޮތެއް ނުވިއެވެ.

Ad by Hajj Corporation

އޮގްސްބާގުން މެޗުގެ ނަތީޖާ އަނބުރާލީ ދެވަނަ ހާފުގައެވެ. އެގޮތުން މެޗުގެ 75 ވަނަ މިނެޓުގައި އާތަރ ޗާވޭސް ވަނީ ލަނޑެއް ޖަހައި ނަތީޖާ އެއްވަރުކޮށްދީފައެވެ. މިއީ ބަޔާންގެ ކީޕަރު ޖޯނަސް އުރުބިގަށް ހެދުނު ގޯހެއްގެ ފައިދާ ނަގައިގެން އޭނާ ކާމިޔާބުކުރި ލަނޑެކެވެ. އޭގެ ހަ މިނެޓު ފަހުން، 81 ވަނަ މިނެޓުގައި ހާން-ނޯއާ މަސެންގޯ ވަނީ އޮގްސްބާގަށް މެޗުން މޮޅުވި ލަނޑު ޖަހައިދީފައެވެ.

މި މެޗަށް ބަޔާން މިއުނިކުން ނެރުނު ފުރަތަމަ 11 ގެ އެވްރެޖް އުމުރަކީ 26 އަހަރާއި 125 ދުވަހެވެ. މިއީ މި ސީޒަނުގައި އެ ޓީމުން ލީގު މެޗަކަށް ނެރުނު އެންމެ ޒުވާން ޓީމެވެ. މުޅި މެޗުގައި ބަޔާންއިން 15 ހަމަލާ އުފެއްދިއިރު، އޮގްސްބާގުން ވަނީ 16 ހަމަލާ އުފައްދާފައެވެ.

މެޗުގެ އެންމެ ފަހު ވަގުތުކޮޅުގެ ތެރޭގައި ނަތީޖާ އެއްވަރުކުރަން އޮލީސޭ އަށް ރަނގަޅު ފުރުސަތެއް ލިބުނެވެ. ނަމަވެސް އޭނާ ފޮނުވާލި ބޯޅަ އަމާޒުވީ ގޯލުގެ އަރިމަތީ ދަނޑިއަށެވެ. މި ނަތީޖާއާއެކު ބަޔާން ތާވަލުގެ އެއްވަނައިގައި އޮތް ނަމަވެސް، މިއީ އެ ޓީމަށް ކުރިމަތިވި ހައިރާންކުރުވަނިވި ނަތީޖާއެކެވެ.