ޗެމްޕިއަންސް ލީގުގެ ސެމީ ފައިނަލްގެ ފުރަތަމަ ލެގުގައި އެންމެ ފަހުގެ ޗެންޕިއަން ޕެރިސް ސެއިންޓް ޖާމަން (ޕީއެސްޖީ) އާއި ބަޔާން މިއުނިކް ބައްދަލުކުރި ފޯރިގަދަ މެޗު 5-4 ގެ ނަތީޖާއަކުން ޕީއެސްޖީ ކާމިޔާބުކޮށްފިއެވެ. ޕާކް ޑެސް ޕްރިންސަސްގައި ކުޅުނު މި މެޗަކީ ޗެމްޕިއަންސް ލީގުގެ ސެމީ ފައިނަލެއްގައި މިހާތަނަށް އެންމެ ގިނަ ލަނޑު ފެނިގެންދިޔަ މެޗުގެ ރެކޯޑު ގާއިމުކުރި މެޗެވެ.

މެޗުގެ ކުރީކޮޅު ބަޔާން މިއުނިކުން ވަނީ ލަނޑެއް ޖަހައި ކުރިހޯދާފައެވެ. މި ލަނޑަކީ ލުއިސް ޑިއާޒްއަށް ކުރި ފައުލަކާ ގުޅިގެން ލިބުނު ޕެނަލްޓީއަކުން ހެރީ ކޭން ކާމިޔާބުކުރި ލަނޑެކެވެ. ނަމަވެސް ޕީއެސްޖީން ވަނީ ވަރުގަދަ ކުޅުމެއް ދައްކައި މެޗުގެ ނަތީޖާ އަނބުރާލާފައެވެ. އެގޮތުން ހްވިޗާ ކްވަރަޓްސްކޭލިއާ ނަތީޖާ އެއްވަރުކޮށްދިން އިރު، ޔާއޯ ނޭވޭސް ވަނީ ބޮލުން ޖެހި ލަނޑަކުން ޕީއެސްޖީއަށް ކުރިހޯދައިދީފައެވެ.

Ad by Hajj Corporation

ފުރަތަމަ ހާފު ނިމުމުގެ ކުރިން ބަޔާންގެ މައިކަލް އޮލީސޭ ލަނޑެއް ޖަހައި ނަތީޖާ އެއްވަރުކުރި ނަމަވެސް، އޮސްމާން ޑެމްބެލޭ ޕެނަލްޓީއަކުން ލަނޑު ޖަހައި އަލުން ޕީއެސްޖީއަށް ކުރިހޯދައިދިނެވެ. މެޗުގެ ދެވަނަ ހާފު ފެށިގެން ކުޑަވަގުތުކޮޅެއްގެ ތެރޭގައި ކްވަރަޓްސްކޭލިއާ އާއި ޑެމްބެލޭ އިތުރު ލަނޑުތަކެއް ޖަހައި، 5-2 ގެ ބޮޑު ލީޑެއް ޕީއެސްޖީއަށް ހޯދައިދިނެވެ.

ބަޔާން މިއުނިކުން ވަނީ މެޗުގެ ފަހުކޮޅު ކުޅުން ރަނގަޅުކޮށް، ޑަޔޮޓް އުޕަމެކާނޯ އާއި ލުއިސް ޑިއާޒްގެ ލަނޑުތަކުން ފަރަގު ކުޑަކޮށްފައެވެ. ޑިއާޒްގެ ލަނޑު ކަށަވަރުކުރީ ވީއޭއާރު (VAR) ބެލުމަށްފަހުއެވެ. މެޗުގެ ފަހު މިނެޓުތަކުގައި ދެ ޓީމަށްވެސް ލަނޑު ޖަހާނެ ރަނގަޅު ފުރުސަތުތަކެއް ލިބުނު ނަމަވެސް، އިތުރު ލަނޑެއް ފެނިފައެއް ނުވެއެވެ.

ތަފާސްހިސާބުތަކަށް ބަލާއިރު، މި މެޗުގައި ޖެހި ޝޮޓްތަކުގެ 40 އިންސައްތައަށްވުރެ ގިނަ ޝޮޓް ވަނީ ގޯލަށް އަމާޒުވެފައެވެ. ބަޔާންގެ ފޯވާޑް ތްރީ ކަމަށްވާ ކޭން، އޮލީސޭ އަދި ޑިއާޒް މި މެޗުގައިވެސް މޮޅު ކުޅުމެއް ދެއްކި ނަމަވެސް، ޕީއެސްޖީގެ ފިނިޝިންގް މި މެޗުގައި މާ ބޮޑަށްވެސް ރަނގަޅެވެ. މި ދެ ޓީމު ބައްދަލުކުރާ ދެވަނަ ލެގުގެ މެޗު އޮންނާނީ މިއުނިކްގައެވެ.