ރާއްޖެއަށް ދެވަނައަށް އެންމެ ގިނަ ފަތުރވެރިން ޒިޔާރަތްކުރާ ޤައުމު ކަމަށްވާ އިޓަލީވިލާތުން، އަހަރުގެ މިހާތަނަށް ރާއްޖެއަށް 18،000އަށްވުރެ ގިނަ ފަތުރުވެރިން ޒިޔާރަތްކޮށްފިއެވެ.

ފަތުރުވެރިކަމާއި ތިމާވެއްޓާބެހޭ ވުޒާރާއިން އާންމުކޮށްފައިވާ އެންމެ ފަހުގެ ތަފާސްހިސާބުތައް ދައްކާގޮތުން، މިމަހުގެ 24 ވަނަ ދުވަހުގެ ނިޔަލަށް އިޓަލީވިލާތުން ރާއްޖެއަށް 18,256 ފަތުރުވެރިން ޒިޔާރަތްކޮށްފައިވެއެވެ. މިއީ މިދިޔަ އަހަރުގެ މި މުއްދަތުގައި އެގައުމުުން ރާއްޖެއަށް ޒިޔާރާތްކުރި 16,614 ފަތުރުވެރިންނާއި އަޅާ ބަލާއިރު 9.8 އިންސައްތަ އިތުރު އަދަދެކެވެ.

އިޓަލީވިލާތަކީ އާންމުގޮތެއްގައި ރާއްޖެއަށް އެންމެ ގިނައިން ޒިޔާރާތްކުރާ ފަތުރުވެރިންގެ ލިސްޓުގައި އަބަދުވެސް ހިމެނޭ ގައުމެކެވެ. އެގޮތުން މިދިޔަ އަހަރު ނިމުނުއިރު ތިންވަނައިގައި އޮތް އިޓަލީވިލާތް މިހާރު އޮތީ ދެވަނައިގައެވެ. މީގެ އިތުރުން ރާއްޖެއަށް ޒިޔާރާތްކުރި ޖުމްލަ ފަތުރުވެރިންގެ 10.7 އިންސައްތަ ހިއްސާކުރަނީވެސް އެޤައުމުގެ ފަތުރުވެރިންނެވެ.

މި ލިސްޓުގެ އެއްވަނައިގައި އޮތީ ރަޝިޔާއެވެ. އަހަރުގެ މި މުއްދަތުގައި އެޤައުމުން 23,943 ފަތުރުވެރިން އައިސްފައިވާއިރު މިއީ މިދިޔަ އަހަރުގެ މި މުއްދަތުގައި ރަޝިޔާއިން ރާއްޖެއަށް ޒިޔާރާތްކުރި 18,651 ފަތުރުވެރިންނާ އަޅާ ބަލާއިރު 28.3 އިންސައްތަ އިތުރު އަދަދެކެވެ.

މިއާއެކު، އަަހަރުގެ މިހާތަނަށް ރާއްޖެއަށް މުޅި ޖުމްލަ 170,709 ފަތުރުވެރިން ވަނީ ޒިޔާރާތްކޮށްފައެވެ. މިއީ މިދިޔަ އަހަރުގެ މި މުއްދަތުގައި ރާއްޖެއަށް ޒިޔާރާތްކުރި 160,224 ފަތުރުވެރިންނާ އަޅާ ބަލާއިރު 6.5 އިންސައްތަ އިތުރު އަދަދެކެވެ. މިހާރު ރާއްޖެއަށް އެވްރެޖްކޮށް 7،000 އަށްވުރެ ގިނަ ފަތުރުވެރިން ދަނީ ޒިޔާރާތްކުރަމުންނެވެ.

Ad by Hajj Corporation