ސަރުކާރުން ރައްޔިތުންނާ ގާތުން ޞިއްޙީ ޚިދުމަތް ފޯރުކޮށްދިނުމަށް ކުރައްވާ މަސައްކަތުގެ ދަށުން ވޭތުވެދިޔަ ދެ އަހަރު ދުވަހުގެ ތެރޭގައި ރާއްޖޭގެ 10 ރަށެއްގައި އަލަށް ޑައިލިސިސްގެ ޚިދުމަތް ފަށާފައިވާ ކަމަށް ޞިއްޙަތާބެހޭ ވަޒީރު ޢަބްދުﷲ ނާޠިމް އިބްރާހީމް ވިދާޅުވެއްޖެއެވެ.

ސަރުކާރުން ވަނީ މި ޚިދުމަތް މާލެއާއި އަތޮޅުތަކުގެ ރަށްތަކުގައި ފުޅާކުރުމަށް މަޝްރޫޢެއް ފަށާފައެވެ. މި މަޝްރޫޢުގެ ދަށުން އެންމެފަހުން ޑައިލިސިސްގެ ޚިދުމަތް ފަށާފައިވަނީ، ދ. އަތޮޅު ހޮސްޕިޓަލުގައެވެ.

Ad by Hajj Corporation

މި ހޮސްޕިޓަލުގައި ޑައިލިސިސްގެ ޚިދުމަތް ރަސްމީކޮށް ފެށުމަށް ބޭއްވި ރަސްމިއްޔާތުގައި ވާހަކަދައްކަވަމުން ޞިއްޙަތާބެހޭ ވަޒީރު ޢަބްދުﷲ ނާޠިމް އިބްރާހީމް ވިދާޅުވީ، ދ. އަތޮޅު ހޮސްޕިޓަލަކީ މި ވޭތުވެދިޔަ ދެ އަހަރު ތެރޭގައި މި ޚިދުމަތް ފެށި 10 ވަނަ ހޮސްޕިޓަލު ކަމަށެވެ. އަދި މީގެ ސަބަބުން އެ ރަށްރަށުގެ ރައްޔިތުން ޑައިލިސިސް ހެދުމަށްޓަކައި އެހެން ރަށްރަށަށް ކުރަންޖެހޭ ދަތުރުތައް ހުއްޓި، ބޮޑު ލުޔެއް ލިބިގެންދާނެ ކަމަށް ވަޒީރު ފާހަގަކުރެއްވިއެވެ.

މި ޚިދުމަތުގެ މުހިންމުކަމާ ގުޅޭގޮތުން ވާހަކަ ދައްކަވަމުން ވަޒީރު ވިދާޅުވީ، ޑައިލިސިސް ހަދަންޖެހޭ ބަލި މީހުންނަށް ނުވަތަ ބަލި މީހުންގެ އާއިލާއަަކަށް މެނުވީ އެކަމުން އުފުލަންޖެހޭ ތަކުލީފާއި ވޭން އިހުސާސް ނުކުރެވޭނެ ކަމަށެވެ. އެހެންކަމުން މިފަދަ އަސާސީ ޚިދުމަތެއް ރައްޔިތުން ތިބި ރަށަކުން ލިބޭނެ އިންތިޒާމު ހަމަޖެއްސުމަކީ ސަރުކާރުން ވަރަށް ބޮޑަށް އިސްކަމެއް ދެއްވާ ކަމެއް ކަމުގައި ވިދާޅުވިއެވެ.

މި ޚިދުމަތް ޤާއިމުކުރުމަކީ ގިނަ މަސައްކަތްތަކެއް އެކުލެވޭ ކަމެއްކަން ފާހަގަކުރައްވަމުން ވަޒީރު ވިދާޅުވީ، މީގެ ތެރޭގައި ބޭނުންވާ އުމްރާނީ ތަރައްޤީއާއި، މެޝިނަރީޒް އަދި ސާމާނު ހޯދުމުގެ އިތުރުން، މިކަމަށް ބޭނުންވާ ފަންނީ މީހުން ތަމްރީނުކުރުން ހިމެނޭކަމަށެވެ. އަދި ޚިދުމަތް ފެށި ގިނަ ރަށްތަކަކީ މީގެ ކުރިން އެކަމަށް ތަމްރީނުވެފައިވާ މީހުން ނެތް ރަށްތަކެއް ނަމަވެސް، މިހާރު އެ ރަށްރަށުގައި ތަމްރީނު ލިބިފައިވާ މުވައްޒަފުން ތިބެގެން ޚިދުމަތް ދެމުންދާކަން ވަޒީރު ފާހަގަކުރެއްވިއެވެ.

ޑައިލިސިސް ހެދުމަކީ، ބަލި މީހާއަށް އިތުރު ތަކުލީފުތަކެއް އުފުލަންޖެހޭ ކަމެކެވެ. ހަފްތާއަކު 2 ދުވަސް ނުވަތަ 3 ދުވަހުވެސް ޑައިލިސިސް ހަދާ މީހުން މަދެއް ނޫނެވެ. އެހެންނަމަވެސް ޒަމާނާ އެއްގޮތަށް، ބަލި މީހުން އިތުރު ތަކުލީފުތަކެއް އުފުލަން ނުޖެހޭ ފަދައިން ޑައިލިސިސްގެ ހެދުމުގެ މަގު މިވަނީ ފަހިވެގެން ގޮސްފައެވެ. އެގޮތުން ރާއްޖޭގައި ޕެރިޓޯނިއަލް ޑަޔަލިސިސް ނުވަތަ ޑިވައިސެއްގެ އެހީގައި އަމިއްލައަށް ހެދޭ ޑައިލިސިސްގެ ޚިދުމަތް ވަނީ ދޭން ފަށާފައެވެ.

ރާއްޖޭގައި މިވަގުތު ޑައިލިސިސްގެ ޚިދުމަތް ނުފެށި އޮތީ، ވ. އަތޮޅުގެ އިތުރުން ފ.އަތޮޅުގައެވެ. މި އަތޮޅުތަކުގައި މި ޚިދުމަތް ޤާއިމްކުރެއްވިއްޖެނަމަ ރައްޔިތުންނަށް ލުއިތަކެއް ލިބޭނެއެވެ. ޚާއްޞަކޮށް އެކި ސަރަޙައްދުތަކުން އެ ޚިދުމަތް ލިބެން ފެށުމުން ކިޑްނީގެ ބައްޔަށް ފަރުވާ ހޯދުމާއި، ޚާއްޞަކޮށް އެޚިދުމަތް ހޯދުމަށް މާލެ އައުމާއި މާލެއަށް ދިރިއުޅުން ބަދަލުކުރަން ޖެހިފައިވާ މީހުން އަލުން އަމިއްލަ ވަޒަނުގައި ތިބެގެން ފަރުވާ ލިބޭނެ މަގު ފަހިވެގެންދެއެވެ.

އަމިއްލަ ރަށުގައި ޚިދުމަތް ނުފެށުނު ނަމަވެސް އަތޮޅު ވެރިކަން ކުރާ ރަށުގައި ޚިދުމަތް ހަމަޖެހިފައިވާނަމަ، އާރުޓީއެލް ފެރީގައި ކުރު ދަތުރެއް ކޮށްގެން ޚިދުމަތް ހޯދޭނެ މަގުފަހިވާނެއެވެ. ނުވަތަ އަތޮޅުވެރިކަން ކުރާ ރަށުގައި މާލެ އަށްވުރެ ކުޑަ ޚަރަދެއް ކޮށްގެން ޚިދުމަތް ހޯދޭނެ އިންތިޒާމްތައް ހަމަޖެހިގެންދާނެއެވެ. މިކަމުން މި ބަލި ތަޙައްމަލު ކުރަމުންދާ މީހުންނަށާއި، އާއިލާތަކަށް އެތައް ލުއިފަސޭހައެއް ލިބޭނެއެވެ.