ސަރުކާރު ޖަވާބުދާރީކުރަންޖެހޭ ވަރުގެ ކަމެއް މިއަދު މިޤައުމުގައި އެބަ ހިނގާތޯ، ފުވައްމުލަކު ދެކުނު ދާއިރާގެ މެންބަރު އިބްރާހީމް ޙުސައިން ސުވާލު އުފައްދަވައިފިއެވެ.

މެންދުރު ޓީވީން ގެނެސްދޭ "މައުޟޫ" ޕްރޮގަރާމްގައި، ރާއްޖޭގެ ސިޔާސީ މަޝްރަހާ ގުޅޭގޮތުން ވާހަކަދައްކަވަމުން މެންބަރު އިބްރާހީމް ވަނީ، ކުރިއަށްއޮތް ލޯކަލް ކައުންސިލް އިންތިޚާބާއި އަންހެނުންގެ ތަރައްޤީއަށް މަސައްކަތްކުރާ ކޮމެޓީގެ އިންތިޚާބުގައި ޕީއެންސީ ކެންޑިޑޭޓުން އިންތިޚާބުކުރަންވީ ސަބަބު ވަރަށް ރަނގަަޅަށް އޮޅުންފިލުއްވައިދެއްވާފައެވެ. އެގޮތުން މެންބަރު ވިދާޅުވީ، ސަރުކާރުން މިވަގުތު ފަށާފައި ހުރި މަޝްރޫއުތަކާއި، ކުރިއަށް ރާވާފައިހުރި މަޝްރޫއުތައްވެސް ކާމިޔާބުކަމާއެކު ފަސޭހައިން ނިންމާލުމަށް، ކައުންސިލުގައި ސަރުކާރު މެންބަރުން ތިބުން މުހިންމު ކަމަށެވެ. މެންބަރު ވިދާޅުވީ މިހާރުވެސް ބައެއް ކައުންސިލުތަކުން ސަރުކާރަށް އުނދަގޫކުރަމުންދާ މަންޒަރު ފެންނަމުންދާ ނަމަވެސް ރައްޔިތުންނަށް އެކަން ފެނުމުގެ ފުރުސަތެއް ނޯންނާނެ ކަމަށެވެ.

Ad by Hajj Corporation

މެންބަރު ވިދާޅުވީ، ސަރުކާރުން ކައުންސިލުތައް ބޭނުންވަނީ މިހާރު ފަށާފައިހުރި ޕްރޮޖެކްޓުތައް އަވަސްކުރުމުގެ އިތުރުން ރައްޔިތުންނާ ގާތުން ކަންކަން ކުރުމަށް ކަމަށެވެ.

އަޅުގަނޑުމެން ޤަބޫލުކުރާ ގޮތުގައި، މިހާރު މިއަދުގެ ސަރުކާރުން ކުރަން ފެށިފައިހުރި މަސައްކަތްތަކާ، އަދި ކުރިއަށްހުރި ކަންތައްތަކާ އެއްޗެހި އަޅުގަނޑުމެންނަށް ކުރިއަށްގެންދެވޭނީ އަޅުގަނޑުމެންނަށް ތާޢީދުކޮށް، ކައުންސިލެއް އޮތުމުން އެކަން ކުރަން ވަރަށް ބޮޑުތަން ފަސޭހަވެގެންދާނެ. އަޅުގަނޑުމެން މިހެން ދަންނަވާލާއިރުވެސް ބައެއްފަހަރު އަޅުގަނޑުމެންނަށް ފެނިގެން އެބަދޭ ކައުންސިލްތަކުން އުނދަގޫކުރުމާ، އެކަހަލަ ކަންތައް ކުރަމުންދާތަން. އެހެންނަމަވެސް ރައްޔިތުންނަށް އެތަނެއް މާބޮޑުކޮންނެއް ނުފެންނާނެ. އެވާގޮތަކީ، ކަމެއް ކުރަން ހުށަހެޅުމަށްފަހުގަ އެކަން ޑިލޭކުރުމުގެ ފުރުސަތު އެބައޮތޭ.

އެއާއެކު، މެންބަރު އިބްރާހީމް ވަނީ، ފުވައްމުލަކު ކައުންސިލަށް ޕީއެންސީގެ ފަރާތުން ކުރިމަތިލާފައިތިބި ކެންޑިޑޭޓުން ހޮވައިދެއްވައިފިނަމަ، ދާއިރާގެ ރައްޔިތުންނަށް ބޭނުންވާ ގިނަ ކަންތައްތަކެއް ކުރިއަށް އޮތް ތިން އަހަރުތެރޭ ނިންމައިދިނުމަށް ހުރިހާ ފަރާތްތައް ގުޅިގެން މަސައްކަތްކޮށްދޭނެ ކަމުގެ ޔަޤީންކަން ދެއްވާފައެވެ.

މެންބަރު އިތުރަށް ވިދާޅުވީ، މިއަދު ރައްޔިތުން އެދެންވީ އަދި އުންމީދުކުރަންވީ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ގެނެސްދެއްވާ ތަރައްޤީއަށް ކަމަށެވެ. އަޅުގަނޑުމެން އެނބުރިދާންވީ ފަހަތަށް ނޫންކަމަށާއި އަޅުގަނޑުމެން ފަހަތް ބަލަން ނުވެސް ޖެހޭނެކަމަށެވެ. މިއަދު ސަރުކާރުން މަސައްކަތްކުރަމުން އަންނަގޮތް ރައްޔިތުންނަށް ވަރަށް ސާފުކަމަށާއި ވަރަށް ގިނަ ކަންތައްތަކެއް، މިސަރުކާރު އައިފަހުން ރަނގަޅުކޮށްފައިވާ ކަމަށް މެންބަރު ވިދާޅުވިއެވެ.

މިސަރުކާރުން ކަންކަން ކޮށްދެނީ އެންމެ ދާއިރާއަކަށް ނޫންކަމަށާއި، ކޮންމެ ދާއިރާއަކަށް ބަލާލިނަމަވެސް ފެންނަނީ ވަރަށް ރަނގަޅަށް ކަންކަން ކޮށްދެއްވަމުންދާތަން ކަމަށް މެންބަރު ވިދާޅުވިއެވެ.

އެހެންވީމަ އަޅުގަނޑު ޤަބޫލުކުރާހިތް އޮތީ މިއަދު ޕީއެންސީން ކުރިމަތިލާފައި ހުރި ކެންޑިޑޭޓުންނަކީ ރާއްޖޭގެ މެޖޯރިޓީ އިރާދަކުރެއްވިއްޔާ ޕީއެންސީއަށް ލިބިގެންދާ މަންޒަރު 4 އޭޕްރީލްގަ ނަގާ މި އިލެކްޝަންގެ ވޯޓުން އެކަން ކާމިޔާބުކުރެވިގެންދާނެ ކަމަށް އަޅުގަނޑުމެން މިބަލަނީ. އިރާދަކުރެއްވިއްޔާ އެކަން ވެގެންދާނެ.

މެންބަރު ވިދާޅުވިއެވެ.

ޕްރޮގްރާމުގައި ވާހަކަދައްކަވަމުން މެންބަރު އިތުރަށް ވިދާޅުވީ، އިދިކޮޅު ފަރާތްތައް މި އިންތިޚާބުން ވަރަށް ބޮޑުތަނުން ބަލިވާނެ ކަމަށް ޤަބޫލުކުރައްވާ ކަމަށާއި، މާޒީގައި ރައްޔިތުންނަށް އޮޅުވާލައިގެން ވޯޓު ހޯދަމުން އައި ފަރާތްތަކަށް ރައްޔިތުން މިފަހަރު ނޫނެކޭ ބުނާނެކަމަށެވެ. އަދި އެބޭފުޅުންނަށް ނޫނެކޭ ބުނަންޖެހޭ އެތަކެއް ސަބަބެއްވެސް އެބަހުރިކަމަށް މެންބަރު ވިދާޅުވިއެވެ. އެކަމުގެ އެންމެ ބޮޑު ސަބަބެއް ކަމަށް މެންބަރު ފާހަގަކުރައްވާފައިވަނީ، ރައްޔިތުން މިއަދު ދެކެމުންދާ ދަތި، އުނދަގޫ ދުވަސްތަކުގެ ޒިންމާ ނަގަންޖެހޭނީ އިދިކޮޅުން ކަމަށެވެ. މިކަންކަމަކީ ރައްޔިތުން މިކަންކަމާމެދު ވިސްނާނެ ކަންތައްތައް ކަމަށާއި ރައްޔިތުން ތިބެނީ މިހުރިހާ ކަމެއް ބަލައިގެން ކަމަށް މެންބަރު އިބްރާހީމް ވިދާޅުވިއެވެ.

މެންބަރު އިބްރާހީމް އިތުރަށް ފާހަގަކުރެއްވި ގޮތުގައި، މިރާއްޖޭގައި އިސްލާމްދީން ނޫން އެހެން ދީނެއް އޮންނަންޖެހޭނެ ކަމަށް ބުނަމުން އައީވެސް އިދިކޮޅު ފަރާތްތަކުން ކަމަށެވެ. ނަމަވެސް، ޕީއެންސީން ބޭނުންވަނީ މިޤައުމަކީ މާތްވެގެންވާ އިސްލާމްދީނަށް ލޯބިކުރާ ރައްޔިތުންތަކެއް ދިރިއުޅެމުންދާ ޤައުމަކަށް ހެދުމަށް ކަމަށްވެސް މެންބަރު ވިދާޅުވިއެވެ.

ސަރުކާރު ޖަވާބުދާރީ ކުރެވޭނީ އިދިކޮޅު ފަރާތްތަކަށް ކައުންސިލްތަކާއި ޑަބްލިއުޑީސީތަކުގެ މެޖޯރިޓީ ލިބިގެންކަމަށް އެފަރާތްތަކުން ދައްކަމުންދާ ވާހަކަތަކަކީ ސިޔާސީގޮތުން ކިހާ ބުރަދަނެއް ހުރި ވާހަކައެއްތޯ، ޕްރޮގްރާމްގެ ޕްރެޒެންޓަރު ސުވާލުކުރުމުން މެންބަރު ވަނީ، މިއަދު ސަރުކާރު ޖަވާބުދާރީކުރުވަންޖެހޭ ވަރުގެ ކަމެއް މިރާއްޖޭގައި އެބައޮތްތޯ ސުވާލު އުފައްދަވާފައެވެ. މީގެ އިތުރަށް، މެންބަރު ވަނީ ސަރުކާރު މިއަދު މިދަނީ ރަނގަޅަށް ނޫންތޯއާއި، އިދިކޮޅު ފަރާތްތަކުން ކަންކުރި ގޮތާ އަޅާ ބަލާއިރު މިއަދު ކަންކުރަމުންދަނީ ކިހާ ރަނގަޅަކަށްތޯވެސް ސުވާލު އުފައްދަވާފައެވެ.

މެންބަރު ވިދާޅުވީ މިއަދު ކަންތައްކުރަމުންދަނީ އިދިކޮޅު ފަރާތްތައް ބާރުގައި އޮތްދުވަހު ކަންކުރި ގޮތަށް ނޫންކަމަށާއި، އޭރު އެބޭފުޅުން ވަނީ ރާއްޖެ އެއްކޮށް ދަރުވާލާފައިކަމަށެވެ. މީގެ އިތުރުން، އެބޭފުޅުން ދިޔައީ ދޮގާއި މަކަރާއި ހީލަތުން އެތައް ކަމެއް ރާވަމުން ކަމަށާއި އެކަންތައްތަކަށް ރައްޔިތުން ނޫނެކޭ ބުނެފައިވާ ކަމަށްވެސް މެންބަރު ވިދާޅުވިއެވެ.

ރައްޔިތުންވަނީ، އެމީހުން ބޭނުންވާގޮތް ނިންމާފައި ކަމަށާއި، ރައްޔިތުން ތިބީ އެމީހުން ބޭނުންވާ ރައީސްއަށް ވެރިކަން ދީގެންކަމަށާއި، އޭރު ވެރިކަންކުރި ގޮތާއި މިއަދު ވެރިކަންކުރާ ގޮތާ، އުޑާއި ބިމާހާ ތަފާތު ކަމަށް މެންބަރު ވިދާޅުވިއެވެ.

ސަރުކާރު މިދަނީ ރަނގަޅަކަށް ނޫންތޯ؟ ސަރުކާރުން މިއަދު ކަންތައްތައް މިކުރަނީ އެބޭފުޅުން ކުރި ކަންތައްތަކާ އަލާބަލާއިރުގަ ކިހާ ރަނގަޅަކަށްތޯ؟ އެހެންވީމަ ސަރުކާރު ޖަވާބުދާރީ ކުރުވަންޖެހޭ ތިޔަވިދާޅުވާ ވަރުގެ މައްސަލަތަކެއް މިޤައުމުގަ އެބަހުރިތޯ؟ އަޅުގަނޑުމެން އެއަށް ބަލާލަންވާނެ، ދެއްތޯ؟ އެބޭފުޅުން ހިންގި ގޮތަކަށް ނޫން މިއަދު މިކަންތައް ކުރަނީކީ. އެބޭފުޅުން އޭރު ރާއްޖެ، މުޅި ރާއްޖެ ދަރުވާލީ. ކޮންމެ ރައްޔިތަކު ދަރުވާލަމުންދިޔައީ. ދޮގާއި، މަކަރާއި ހީލަތްތެރިކަމުގެ ގޮތުން އެތައް ކަމެއް ރާވަމުންދިޔައީ. އެހެންނަމަވެސް އެއަށް ރައްޔިތުން ނޫނެކޭ ބުނި، ދެއްތޯ؟ ރައްޔިތުން ނޫނެކޭ ބުނެފަ، މިއަދުގެ ޢިއްޒަތްތެރި ރައީސުލްޖުމްހޫރިއްޔާ ވެރިކަމަށް ޢައްޔަނު ކުރެއްވީ.

މެންބަރު އިބްރާހީމް ވިދާޅުވީ، ޕީއެންސީގެ ފަރާތުން ކުރިމަތިލައްވާފައި ތިއްބެވި ހުރިހާ ބޭފުޅުންނަކީވެސް ވަރަށް ރަނގަޅު، ވަރަށް ވިސްނުންތެރިކަމާއެކު މިސަރުކާރާ ގުޅިގެން މަސައްކަތްކުރައްވާނެ ކެންޑިޑޭޓުންތަކެއް ކަމަށެވެ. އެހެންކަމުން ހުރިހާ ރައްޔިތުންވެސް ވަރަށް ވިސްނުންތެރިކަމާއެކު، ރަށަށް ބޭނުންވާ ކަންކަމާއި ތަރައްޤީ ގެނައުމަށްޓަކައި، ފެށިފައިހުރި މަސައްކަތްތައް ވީހާވެސް އަވަހަކަށް ނިންމުމަށް އަތުގުޅާލަދިނުމަށް މެންބަރު އިބްރާހީމް ޙުސައިން އެދިލެއްވިއެވެ.