ދެކުނު އޭޝިއާގެ ފުޓްސަލްގެ ރަސްގެފާނުގެ ގޮތުގައި ބެލެވޭ ދިވެހިރާއްޖެއިން، ސާފް ފުޓްސަލް ޗެމްޕިއަންޝިޕްގެ ފުރަތަމަ މުބާރާތުގެ ތަށި ކާމިޔާބުކޮށް ރަން ތަށި އުފުލާލައިފިއެވެ. ރާއްޖެއިން މި ތަށި އުފުލާލީ މުބާރާތުގެ އެންމެ ފަހު މެޗަށްފަހު ބޭއްވި ޚާއްސަ ރަސްމިއްޔާތުގައެވެ. މިއީ ސަރަހައްދީ ފުޓްސަލް މުބާރާތެއްގައި ރާއްޖެއިން ހޯދި އެންމެ ބޮޑު ކާމިޔާބީއެވެ.

މި މުބާރާތުގައި ރާއްޖެއިން ދެކުނު އޭޝިއާގެ ފުޓްސަލްގެ ރަސްކަމުގެ ތަހުތަށް އިސްވެ، ހަމަޖެހިލީ ކުޅުނު ހުރިހާ މެޗަކުން މޮޅުވެގެންނެވެ. އެގޮތުން ފުރަތަމަ މެޗުގައި ޕާކިސްތާނުގެ މައްޗަށް 1-7 އިން ކުރިހޯދިއިރު، ދެވަނަ މެޗުގައި ބަންގްލަދޭޝް ބަލިކުރީ 1-6 އިންނެވެ. އޭގެ ފަހުން އިންޑިއާ އަތުން 0-5 އިން މޮޅުވެ، ނޭޕާލްގެ މައްޗަށް 1-2 އިން ވަނީ ކުރިހޯދާފައެވެ.

Ad by Hajj Corporation

މުބާރާތުގެ ފަސްވަނަ މެޗުގައި ބޫޓާނާ ދެކޮޅަށް ކުޅެ 1-4 އިން މޮޅުވުމާއެކު، ލަންކާއާ ދެކޮޅަށް ކުޅެން އޮތް ފަހު މެޗު ބާކީ އޮއްވައި ރާއްޖެއިން ވަނީ ޗެމްޕިއަންކަން ކަށަވަރުކޮށްފައެވެ. އެންމެ ފަހު މެޗުގައި ސްރީލަންކާ އަތުން ރާއްޖެ މޮޅުވީ 2-5 ގެ ނަތީޖާއަކުންނެވެ. ރާއްޖެ ތާވަލުގެ އެއްވަނަ ހޯދީ ކުޅުނު 6 މެޗުން ވެސް މޮޅުވެ ޖުމްލަ 18 ޕޮއިންޓާއެކުގައެވެ.

މުޅި މުބާރާތުގައި ވެސް އެންމެ ގިނަ ލަނޑު ޖެހި ޓީމަކީ ރާއްޖެއެވެ. އަދި މުބާރާތުގެ އެންމެ ގިނަ ލަނޑު ޖެހި ކުޅުންތެރިޔާގެ މަގާމު ހޯދީ ރާއްޖޭގެ ކެޕްޓަން މުޙައްމަދު އިމްރާން އެވެ. އޭނާ ވަނީ ކުޅުނު ހުރިހާ މެޗެއްގައި ލަނޑު ޖަހައި، ޖުމްލަ 9 ލަނޑު ކާމިޔާބުކޮށްފައެވެ. މީގެ އިތުރުން އޭނާ ވަނީ 3 އެސިސްޓް ވެސް ހަދާފައެވެ. ގިނަ ބަޔަކު ގަބޫލުކުރާ ގޮތުގައި އިމްރާނަކީ މި މުބާރާތުގެ އެންމެ މޮޅު ކުޅުންތެރިޔާއެވެ.

ރާއްޖެއަކީ މި މުބާރާތުގައި ބައިކޮޅަށް އެންމެ މަދުން ލަނޑު ވަން ގައުމުވެސް މެއެވެ. މުޅި މުބާރާތުގައި ރާއްޖެ ކޮޅަށް ވަދެފައި ވަނީ އެންމެ 6 ލަނޑެވެ. މިއީ ސާފް އިން ބޭއްވި ފުރަތަމަ ފުޓްސަލް މުބާރާތް ކަމަށްވާއިރު، ފުރަތަމަ މުބާރާތުގެ ރަން ކާމިޔާބީއާއެކު ރާއްޖެއިން މިވަނީ ސަރަހައްދީ ފުޓްސަލްގެ ތާރީޚުގައި ރަން އަކުރުން ނަން ފަވާލާފައެވެ.

ފުޓްސަލް ޓީމަށް މަރުޙަބާ ކިޔުމަށް ޚާއްސަ ހަރަކާތްތަކެއް

ޤައުމީ ފުޓްސަލް ޓީމުން ހޯދި މި މަތިވެރި ކާމިޔާބީ ފާހަގަކުރުމަށްޓަކައި މާދަމާރޭ އާޓިފިޝަލް ބީޗުގައި ހަވާއަރުވަން ނިންމާފައިވާ ކަމަށާއި، ޓީމަށް މަރުހަބާ ކިއުމުގެ ގޮތުން ޚާއްސަ ހަރަކާތްތަކެއް ކުރިޔަށް ގެންދަން ނިންމާފައިވާ ކަމަށް ކުޅިވަރާއި ހަށިހެޔޮކަމާއި ބެހޭ ވުޒާރާއިން މައުލޫމާތު ދެއްވައެވެ. ޤައުމީ ޓީމަށް މަރުހަބާކިއުމަށް ވިހާވެސް ގިނަ ބަޔަކު އާޓިފިޝަލް ބީޗަށް ދިއުމަށް ސަރުކާރުން ވަނީ އެދިފައެވެ.