ފުރަތަމަ ފަހަރަށް ބޭއްވި ސާފް ފުޓްސަލް ޗެމްޕިއަންޝިޕްގައި ވާދަކޮށް މުބާރާތުގެ ޗެމްޕިއަންކަން ހޯދައި، ތާރީޚީ ކާމިޔާބީއާއެކު ގައުމީ ފިރިހެން ފުޓްސަލް ޓީމު އެނބުރި ރާއްޖެ އައުމުން އެއާޕޯޓުން ހޫނު މަރުހަބާއެއް ކިޔައިފިއެވެ.

ގައުމީ ފުޓްސަލް ޓީމަށް ވެލާނާ އިންޓަނޭޝަނަލް އެއާޕޯޓުން އިސްވެ މަރުހަބާ ދެންނެވީ ސްޕޯޓްސް މިނިސްޓަރު އަބްދުﷲ ރާފިއު އާއި މިނިސްޓްރީގެ އިސްވެރިންގެ އިތުރުން އެފްއޭއެމްގެ އިސްވެރިންނެވެ.

Ad by Hajj Corporation

ޓީމުގެ އިސްތިގުބާލުގައި އެއާޕޯޓަށް ގިނަ އަދަދެއްގެ އާއިލީ މެމްބަރުންނާއި ހެޔޮއެދޭ ފަރާތްތައްވެސް ގޮސް ތިއްބެއެވެ.

ސައުތު އޭޝިއަން ފުޓުބޯޅަ ފެޑެރޭޝަން (ސާފް) އިން ފުރަތަމަ ފަހަރަށް ބޭއްވި ސާފް ފުޓްސަލް ޗެމްޕިއަންޝިޕްގެ ތާރީޚީ ތަށި، ދިވެހިރާއްޖެއިން މިވަނީ ހުރިހާ މެޗަކުން މޮޅުވުމުގެ ރެކޯޑަކާއެކު ޙާސިލްކޮށްފައެވެ.

މިއީ މުޅި ޤައުމު ފަޚުރުވެރިވާފަދަ ކާމިޔާބީއަކަށްވާއިރު، މި ކާމިޔާބީ ފާހަގަކުރުމަށް، ސަރުކާރާއި، ގުޅުންހުރި މުއައްސަސާތަކާއި އިދާރާތަކާއި އަމިއްލަ ފަރުދުން ވެސް ވަނީ ވަރަށް ފުރިހަމައަށް ތައްޔާރުވެފައެވެ.

ޓީމަށް މަރުހަބާ ކިޔުމަށް ރޭވިފައިވާ ގޮތަށް ބަލާއިރު ވީއައިޕީން ޓީމަށް މަރުހަބާ ކިއުމާއި، އެއަޕޯޓުން ޓީމު މާލެ އައުމަށްފަހު އަމީނީ މަގާއި މަޖީދީ މަގުން ޕިކަޕުގައި އާންމުންނަށް ފެންނަ ގޮތަށް ޓްރޮފީއާއެކު ޓީމުން ދަތުރު ކުރާނެއެވެ. އަދި އާޓިފިޝަލް ބީޗަށް އައިސް ބީޗުގައި އޮންނަ ހަރަކާތްތަކުގައިި އާންމުންނާއެކު ޓީމުގެ އޮފިޝަލުންނާއި ކުޅުންތެރިން ބައިވެރިވާނެއެވެ.