ބާސެލޯނާގެ ލަމާސިއާ އެކަޑަމީން ތަމްރީނުވެ، ބޮޑެތި ކްލަބުތަކުގެ ސަމާލުކަން ހޯދާފައިވާ ސްޕެއިންގެ ޒުވާން އެޓޭކިން މިޑްފީލްޑަރު ޕެޑްރޯ 'ޑްރޯ' ފެނާންޑޭޒް، ފްރާންސްގެ ޕީއެސްޖީއަށް ސޮއިކޮށްފިއެވެ. ޕީއެސްޖީން ބުނި ގޮތުގައި ޑްރޯ ފެނާންޑޭޒް އެ ކްލަބާއެކު ސޮއިކުރީ 2030 ވަނަ އަހަރުގެ ނިޔަލަށެވެ.

މިދިޔަ ފިނި މޫސުމުގެ ޓްރާންސްފާ ބާޒާރުގައި ބާސެލޯނާ ދޫކޮށްލަން ޑްރޯ ނިންމީ ކުޅުމުގެ ފުރުސަތު އިތުރަށް ހޯދުމުގެ ބޭނުމުގައެވެ. ޕީއެސްޖީއާ ގުޅުމަށްފަހު އޭނާ ބޭނުންކުރާނީ އެ ކްލަބުގެ 27 ނަންބަރު ޖާޒީ ކަމަށްވެސް އެ ކްލަބުން ވަނީ ކަށަވަރުކޮށްދީފައެވެ.

Ad by Hajj Corporation

ޕީއެސްޖީއަށް ސޮއިކުރުމަށްފަހު ވާހަކަދައްކަމުން ޑްރޯ ބުނީ، "ޕީއެސްޖީއަށް ސޮއިކުރެވުމުން ވަރަށް އުފާވެ، ފަޚުރުވެރިވޭ. މިއީ އަހަންނާއި އަހަރެންގެ އާއިލާއަށް ލިބުނު ވަރަށް ބޮޑު އުފަލެއް. ޕީއެސްޖީއަކީ އަހަރެން ކުޑައިރުއްސުރެ ސަޕޯޓްކުރާ، ބޮޑެތި ލެޖެންޑުން ކުޅެފައިވާ ވަރުގަދަ ކްލަބެއް. އަހަރެން ހުރީ މި ޖާޒީގައި ހުރިހާ މަސައްކަތެއް ކުރަން ތައްޔާރަށް،" ކަމަށެވެ.

ޕީއެސްޖީން ޑްރޯ ސިފަކުރަނީ މައިދާނުގެ އެކި މަގާމުތަކަށް ކުޅެވޭ، ފަންނީ ހުނަރުވެރިކަމާއި ދުރު ފެންނަ ފެނުމުގެ ގާބިލުކަން ލިބިފައިވާ ކުޅުންތެރިއެއްގެ ގޮތުގައެވެ. 2008 ވަނަ އަހަރު އުފަންވި ޑްރޯ، ބާސެލޯނާގެ އެކަޑަމީއާ ގުޅުނީ 2022 ވަނަ އަހަރު އީޑީ ވަލް މީނޯ ނިގްރާންގައި ދެއްކި މޮޅު ކުޅުމުގެ ސަބަބުންނެވެ.

އޭނާ ވަނީ 2025 ވަނަ އަހަރު ބާސެލޯނާގެ ސީނިއާ ޓީމަށް ފުރަތަމަ ފަހަރަށް ކުޅެދީ، ލަލީގާ އާއި ޗެމްޕިއަންސް ލީގުގައިވެސް ފެނިލާފައެވެ. ނަމަވެސް، ބާސެލޯނާގެ އެޓޭކިން މިޑްފީލްޑަށް ކުޅޭ ފާމިން ލޮޕޭޒް، ޑެނީ އޮލްމޯ، ގަވީ، ރަފީނިއާ އަދި ލަމީން ޔަމާލް ފަދަ ކުޅުންތެރިންގެ ސަބަބުން އޭނާއަށް ގަވާއިދުން ފުރުސަތު ހޯދުމަށް ވަނީ ބޮޑެތި ގޮންޖެހުންތަކަކާ ކުރިމަތިވެފައެވެ.