މެންޗެސްޓާ ޔުނައިޓެޑުގެ ވަގުތީ ކޯޗު މައިކަލް ކެރިކްގެ އިރުޝާދުގެ ދަށުން އެ ޓީމުން ހޯދަމުންދާ ކާމިޔާބީތަކާއެކު، ޖެނުއަރީ ޓްރާންސްފާ ބާޒާރު ބަންދުވުމުގެ ކުރިން ޗެލްސީގެ ތަރި ކޯލް ޕާމާ ހޯދުމަށް ޔުނައިޓެޑުން ޝައުގުވެރިވާކަމުގެ އަޑުތައް ގަދަވެއްޖެއެވެ. ކެރިކްގެ ބެލުމުގެ ދަށުން ކުޅުނު ދެ މެޗުންވެސް މޮޅުވެ، އޯލްޑް ޓްރެފޯޑަށް އުންމީދުތަކެއް ލިބިފައިވީ ނަމަވެސް، މި ފޯމު ދެމެހެއްޓުމަށްޓަކައި ޓީމުގެ ފެންވަރު މަތިކުރަން ޖެހޭ ކަމަށް ގިނަ ބަޔަކު ގަބޫލުކުރެއެވެ.

ރިޕޯޓްތައް ބުނާގޮތުން، މެންޗެސްޓާގެ ވައިތެންޝޯއަށް ނިސްބަތްވާ އަދި ކުޑައިރުއްސުރެ ޔުނައިޓެޑަށް ސަޕޯޓްކުރާ ޕާމާ ހުރީ އެނބުރި އުފަން ރަށަށް ބަދަލުވުމަށް ތައްޔާރަށެވެ. ލަންޑަނުގައި އުޅޭއިރު އާއިލާއާ ދުރުގައި އުޅެންޖެހުމުން އޭނާ ހިތްހަމަނުޖެހޭ ކަމަށާއި، ގަވާއިދުން މެންޗެސްޓާއަށް އާއިލާއާ ބައްދަލުކުރަން ޒިޔާރަތްކުރާ ކަމަށްވެސް މައުލޫމާތު ލިބެއެވެ. ނަމަވެސް، އޭނާ ކުރިން ކުޅުނު މެންޗެސްޓާ ސިޓީއަށް އެނބުރި ދިއުމުގެ ވިސްނުމެއް ޕާމާގެ ނެތް ކަމަށް ބެލެވެއެވެ.

Ad by Hajj Corporation

ޔުނައިޓެޑަށް މި ޓްރާންސްފާގައި ކުރިލިބޭނެ އަނެއް ސަބަބަކީ އެ ކްލަބުގެ އެގްޒެކެޓިވް ފެންވަރުގައި ތިއްބެވި ޖޭސަން ވިލްކޮކްސް އަދި އުމަރު ބެރާޑާއަކީ ސިޓީގެ އެކަޑަމީގައި ޕާމާއާއެކު ގާތުން މަސައްކަތްކޮށްފައިވާ ދެ ފަރާތް ކަމަށް ވުމެވެ. މީގެ އިތުރުން، ޔުނައިޓެޑުގެ ކެޕްޓަން ބްރޫނޯ ފެނާންޑޭޒް ހޯދުމަށް ސައުދީ އަރަބިއްޔާގެ ކްލަބުތަކުން އަލުން މަސައްކަތް ފަށާފައިވާތީ، ޕާމާއަކީ ނަންބަރު 10 ގެ ރޯލަށް ޔުނައިޓެޑަށް ލިބޭނެ ވަރުގަދަ ބަދަލަކަށް ވާނެއެވެ.