އިނގިރޭސި ޕްރިމިއާ ލީގުގައި ރޭ އަމިއްލަ ދަނޑުގައި ނިއުކާސަލް ޔުނައިޓެޑާ ދެކޮޅަށް ކުޅުނު މެޗުން 1-0 އިން ބަލިވެ، ޗެލްސީން ޗެމްޕިއަންސް ލީގުގެ ޖާގައަކަށް ކުރާ އުންމީދުތަކަށް ބޮޑު ހީނަރުކަމެއް އަތުވެއްޖެއެވެ. މިއީ ލީގުގައި އަމިއްލަ ދަނޑުގައި ޗެލްސީ މޮޅުނުވެ ނިންމާލި ޖެހިޖެހިގެން ތިންވަނަ މެޗެވެ.

މެޗުގެ ހަމައެކަނި ލަނޑު 18 ވަނަ މިނެޓުގައި ކާމިޔާބުކޮށްދިނީ އެންތަނީ ގޯޑަންއެވެ. މި ލަނޑު އޭނާ ކާމިޔާބުކުރީ ޓީނޯ ލިވްރަމެންޓޯ ޗެލްސީގެ ޑިފެންސް ފޫއަޅުވާލުމަށްފަހު ޖޯ ވިލޮކްއަށް ދިން ބޯޅައެއް، ގޯޑަންއަށް ލިބުމުންނެވެ. ބަލިވުމުގެ ސަބަބުން، މިއަދުގެ އެހެން މެޗުތަކުގެ ނަތީޖާ ނުކުންނަ ގޮތަކުން ޗެލްސީ ތާވަލުގެ ހަވަނައަށް ވެއްޓުމުގެ ބިރު ވަނީ ހީވެފައެވެ.

Ad by Hajj Corporation

މެޗުގެ ތެރޭގައި ދެ ޓީމުންވެސް ޕެނަލްޓީއަކަށް އެޕީލްކުރި ނަމަވެސް ރެފްރީ އެއިން އެއްވެސް ކަމަކަށް ފުރުސަތެއް ނުދެއެވެ. ޗެލްސީގެ ކޯޗު ލިއަމް ރޮސީނިއާ ވަނީ ދެވަނަ ހާފުގައި ލިއަމް ޑެލަޕް ކުޅެން އަރުވައިގެން ނަތީޖާ ބަދަލުކުރަން މަސައްކަތްކޮށްފައެވެ. ޑެލަޕަށް ލިބުނު ރަނގަޅު ދެ ފުރުސަތެއް ބޭކާރުވިއިރު، ޗެލްސީގެ ކެޕްޓަން ރީީސް ޖޭމްސް ފޮނުވާލި ހިލޭ ޖެހުމެއް ވަނީ ގޯލުގެ ދަނޑިއަށް އަމާޒުވެފައެވެ.

ތަފާސްހިސާބުތަކަށް ބަލާއިރު، ޗެލްސީން މި މެޗުގައި 22 ހަމަލާ އުފެއްދި ނަމަވެސް، ގޯލާ އަމާޒުވީ އެންމެ ތިން ހަމަލާއެވެ. މިއީ 2023 ވަނަ އަހަރަށްފަހު ސްޓެމްފޯޑް ބްރިޖުގައި ޖެހިޖެހިގެން ތިން މެޗުން ޗެލްސީ މޮޅުނުވެ ނިންމާލި ފުރަތަމަ ފަހަރެވެ.

މެޗުގެ ތަރި އެންތަނީ ގޯޑަން ވަނީ ޗެލްސީއާ ދެކޮޅަށް ކުޅުނު މެޗުތަކުގައި މިހާތަނަށް ޖުމްލަ 6 ލަނޑު އުފެއްދުމުގައި (3 ގޯލު، 3 އެސިސްޓް) ބައިވެރިވެފައެވެ. މިއީ ޓޮޓެންހަމް ފިޔަވައި އޭނާ ލީގުގައި އެންމެ ރަނގަޅު ރެކޯޑެއް އޮތް ޓީމެވެ.