އެމްބިއުލާންސްގެ ޚިދުމަތް ދެމެހެއްޓެނިވި ގޮތެއްގައި ހުރިހާ ރަށަކަށް ފޯރުކޮށްދިނުމުގެ މަސައްކަތުގެ ދަށުން މިހާތަނަށް 27 ރަށަކަށް ބޭނުންވާ އެމްބިއުލާންސް ހަވާލުކޮށްފިއެވެ.

ޞިއްޙީ ވުޒާރާއިން 56 ރަށަކާއި ހަވާލުކުރާ އެމްބިއުލާންސްތައް އެ ރަށްރަށަށް ފޮނުވުމުގެ މަސައްކަތް ހަވާލުކޮށްފައިވަނީ މޯލްޑިވްސް ޕޯޓްސް ލިމިޓެޑް، އެމްޕީއެލްއާއެވެ. އެ ކުންފުނިން މި މަސައްކަތް މި މަހުގެ 19ވަނަ ދުވަހު ފަށާފައިވާއިރު މިހާތަނަށް 27 ރަށަކަށް ބޭނުންވާ އެމްބިއުލާންސް ފޮނުވައި އެ ރަށްރަށުގެ ހޮސްޕިޓަލްތަކާ ހަވާލުކޮށްފައިވާ ކަމަށް އެކުންފުނިން ވަނީ ބުނެފައެވެ.

އެމްޕީއެލްއިން ބުނިގޮތުގައި، ބާކީ ހުރި އެމްބިއުލާންސްތައް ވެސް ލިބެންޖެހޭ ރަށްރަށަށް، ކައިރި މުސްތަޤުބަލެއްގައި ފޯރުކޮށްދިނުމަށް އެކުންފުނިން މަސައްކަތްކުރަމުން އަންނަ ކަމަށެވެ.

ޞިއްޙީ ވުޒާރާއިން އެމްޕީއެލްއާ އެމަސައްކަތް ހަވާލުކޮށްފައިވަނީ މިދިޔަ އަހަރު ކޮންޓްރެކްޓަރ ފައިނޭންސް އުސޫލުގެ ތެރެއިންނެވެ. އެ މަސައްކަތުގެ ދަށުން ފުރަތަމަ 56 އެމްބިއުލާންސް މާލެގެނެސް އެރަށްރަށާއި ތަޅުދަނޑުވަނީ ހަވާލުކޮށްފައެވެ. މި މަޝްރޫޢަށް 65.3 މިލިޔަން ރުފިޔާ ވަނީ ޚަރަދުކޮށްފައެވެ.

މި އެމްބިއުލާންސްތަކުގެ އިތުރުން، މިއަހަރުގެ ތެރޭގައި އިތުރު 31 ރަށަކަށް ބޭނުންވާ އައު އެމްބިއުލާންސްތަކާއި، ގްރޭޓަރ މާލޭ ސަރަހައްދާއި ސިޓީތަކުގައި ޕެރަމެޑިކް ޚިދުމަތް ދިނުމަށް އެތަންތަނަށް ބޭނުންވާ 10 ޕެރަމެޑިކް އެމްބިއުލާންސް ގެނެވި އެ ޚިދުމަތްވެސް ފެށޭނެކަމަށްވެސް ޞިއްޙީ ވުޒާރާއިންބުނެފައިވެއެވެ.

Ad by Hajj Corporation

ދެމެހެއްޓެނިވި ގޮތެއްގައި ހުރިހާ ރަށަކަށް އެމްބިއުލާންސް ފޯރުކޮށްދިނުމުގެ މަސައްކަތަކީ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު އަތޮޅުތަކުގެ މީހުން ދިރިއުޅޭ ރަށްރަށަށް ކުރެއްވި ދަތުރުފުޅުގައި އެކި މުއައްސަސާތަކުގެ ވެރިންނާއި ބައްދަލުކުރައްވާ އެރަށްރަށުގައި ހުރި އެކި މައްސަލަތައް ދެނެގަތުމުގެ ތެރެއިން ފެއްޓެވި މަސައްކަތެވެ.