ޓެކްސީ ހިދުމަތް ފުޅާކޮށް، ހިދުމަތްދިނުމުގައި ލުއިތަކެއް ދިނުމުގެ ގޮތުން، ޓެކްސީ ގަވާއިދަށް އިސްލާހުތަކެއް ގެނެސްފިއެވެ.

އެގޮތުން، މިނިސްޓްރީ އޮފް ޓްރާންސްޕޯޓް އެންޑް ސިވިލް އެވިއޭޝަނުން ވަނީ، ޓެކްސީ ގަވައިދަށް ހަތަރުވަނަ އިސްލާހު ގެނެސް، އެ އިސްލާހުތައް އާންމުކޮށްފައެވެ. މި ބަދަލުތަކަކީ އެއްގަމު ދަތުރުފަތުރުގެ ނިޒާމު ހަރުދަނާކޮށް، ޚިދުމަތް ދޭ ފަރާތްތަކަށާއި ޑްރައިވަރުންނަށް ލުއިފަސޭހަ ގޮތްތަކެއް ހޯދައިދިނުމަށް ގެނައި ބަދަލުތަކެކެވެ.

މިގަވައިދަށް ގެނެސްފައިވާ އިސްލާހުތަކަށް ބަލާއިރު އެންމެ ފާހަގަކޮށްލެވޭ އެއްކަމަކީ، ޓެކްސީ ސެންޓަރެއް ރަޖިސްޓަރ ކުރުމަށްޓަކައި ބޭނުންވާ އުޅަނދާއި ޑްރައިވަރުންގެ އެންމެ މަދު އަދަދަކީ 100 ޑްރައިވަރުންނާއި އުޅަނދުކަމަށް އޮތްއޮތުން ބަދަލުކޮށް، މި އަދަދު 50 އަށް މަދުކޮށްފައި ވުމެވެ. މީގެ ސަބަބުން އައު ސެންޓަރުތައް އުފެދުމަށް ހުރި ހުރަސްތައް ނެތިގޮސް، ގިނަ ބަޔަކަށް މި ދާއިރާއަށް ވަނުމުގެ ފުރުސަތު ހުޅުވިގެންދާނެއެވެ. މިކަމުގެ ނަތީޖާއެއްގެ ގޮތުން، މާކެޓުގައި ވާދަވެރިކަން އުފެދި އާންމުންނަށް ލިބޭ ހިދުމަތުގެ ފެންވަރު ރަނގަޅުވާނެ ކަމަށް ބެލެވެއެވެ.

މީގެ އިތުރުން، ލައިސަންސް އޮންނަ ޓެކްސީ ޑްރައިވަރުންނަށް އެއް ވަގުތެއްގައި ދެ ޓެކްސީ ސެންޓަރެއްގައި ރަޖިސްޓްރީވެގެން މަސައްކަތް ކުރުމުގެ ފުރުސަތު މިހާރު ފަހިކޮށްދީފައިވާ ކަމަށާއި، މި ބަދަލުގެ ސަބަބުން ޑްރައިވަރުންނަށް ލިބޭ އާމްދަނީ އިތުރުކުރުމަށް މަގުފަހިވާނެ ކަމަށް އެވުޒާރާއިން ބުނެއެވެ. މީގެ އިތުރުން، ޚިދުމަތަށް އެންމެ ބާރުބޮޑުވާ ވަގުތުތަކުގައި ޑިމާންޑާ އެއްވަރަށް ހިދުމަތް ފޯރުކޮށްދިނުމަށް ސެންޓަރުތަކަށް އިތުރު ފަސޭހައަކަށް ވެގެންދާނެ ކަމަށްވެސް ދަތުރުފަތުރާއި މަދަނީ އުދުހުންތަކާބެހޭ ވުޒާރާއިން ބުނެއެވެ.

Ad by Hajj Corporation

ގަވައިދަށް ގެނެސްފައިވާ އިތުރު ބަދަލުތަކަށް ބަލާއިރު، ދަތުރުވެރިންގެ ރައްކާތެރިކަން ކަށަވަރު ކުރުމަށްޓަކައި މޮބައިލް އެޕްލިކޭޝަން ނުވަތަ އޮންލައިން ޕޯޓަލްތައް މެދުވެރިކޮށް ޓެކްސީ ޚިދުމަތްދޭން ބޭނުންވާ ފަރާތްތަކުން ވުޒާރާގެ ހާއްސަ ހުއްދައެއް ހޯދަންޖެހޭނެ ކަމަށްވެސް މި އިސްލާހުގައި ބަޔާންކޮށްފައިވެއެވެ. މިގޮތަށް ހުއްދަ ހޯދައިގެން ޑިޖިޓަލް ހިދުމަތް ދިނުމަކީ، ހިދުމަތްދޭ ފަރާތްތައް ޖަވާބުދާރީ ކުރުވުމަށް ލިބޭ ބާރެއްކަމަށް އެ ވުޒާރާއިން ބުނެއެވެ.

ހަމައެއާއެކު، ކުންފުންޏަކުން ދަތުރުފަތުރުގެ ހިދުމަތް ދޭނަމަ، އެކަމަކީ އެ ފަރާތެއްގެ މެންޑޭޓުގައި ހިމެނޭ ކަމެއްކަން ކަށަވަރު ކުރަންޖެހެއެވެ. އަދި އެފަދަ ފަރާތްތަކުންވެސް ގަވައިދާ އެއްގޮތަށް ރަޖިސްޓްރީކޮށް ހުއްދަ ހޯދުން ލާޒިމްވާނެ ކަމަށްވެސް ބަޔާންކޮށްފައިވެއެވެ.

މި ހުރިހާ ބަދަލުތަކެއްގެ މައިގަނޑު އަމާޒަކީ ފަސިންޖަރުންނާއި ޚިދުމަތްދޭ ފަރާތްތަކަށްވެސް މަންފާކުރާނެ، އިތުބާރު ހުރި އަދި ޒަމާނީ ޓެކްސީގެ ނިޒާމެއް ރާއްޖޭގައި ގާއިމުކުރުން ކަމަށް ދަތުރުފަތުރާ މަދަނީ އުދުހުންތަކާބެހޭ ވުޒާރާއިން ބުނެއެވެ.