ކާބޯތަކެތީގެ ޚިދުމަތްދޭ ތަންތަނުގެ ރަޖިސްޓްރޭޝަންފީ މިއަދުން ފެށިގެން ދެ އަހަރުގެ މުއްދަތަކަށް %50 ކުޑަކޮށްފިއެވެ.

ކާބޯތަކެތީގެ ޚިދުމަތްދޭ ތަންތަން ރަޖިސްޓްރީކުރުމުގައި އެ އިދާރާއިން ނަގަަމުން އަންނަ ރަޖިސްޓްރޭޝަން ފީއާއި ކެޓަގަރީ ފީ ކުޑަކުރަން ނިންމާފައިވާ ކަމަށް، މޯލްޑިވްސް ފުޑް އެންޑް ޑްރަގް އޮތޯރިޓީން ބުނެފައި ވެއެވެ. އެގޮތުން، މިއަހަރުން ފެށިގެން ދެ އަހަރު ދުވަހުގެ މުއްދަތަކަށް ކާބޯތަކެތީގެ ޚިދުމަތްދޭ ތަންތަނުގެ ރަޖިސްޓްރޭޝަން ފީގެ އިތުރުން ކެޓަގަރީ ފީ%50 ކުޑަކުރަން ނިންމާފައިވާކަމަށް އެ އޮތޯރިޓީން ބުނެއެވެ.


ކާބޯތަކެތީގެ ޚިދުމަތް ދޭ ތަންތަނާއި ފަރާތްތައް ރަޖިސްޓްރީކޮށް ލައިސަންސް ދޫކުރުމުގައި ޢަމަލު ކުރާނެ ގޮތުގެ އިންތިޤާލީ އުޞޫލުގެ ޤަވައިދުގައި ވާގޮތުން
ކާބޯތަކެތީގެ ހިދުމަތްދޭ ތަންތަން 14 ކެޓަގަރީއަކަށް ބަހާލެވިފައިވެއެވެ. މި ހުރިހާ ތަނަކަށް ވެސް ރަޖިސްޓްރޭޝަން ފީގެ ގޮތުގައި ނެގުމަށް އުޞޫލުގައި ކަނޑައަޅާފައި އޭރު އޮތީ 500 ރުފިޔާއެވެ. މިއީ އެއްފަހަރު ނަގާ ފީއެއް ކަމަށް ގަވައިދުގައިވެއެވެ.

ނަމަވެސް އެމްއެފްޑީއޭއިން ގެނައި ބަދަލާއެކު، ރަޖިސްޓްރޭޝަން ފީގެ ގޮތުގައި މިއަށްފަހު ނަގާނީ 250 ރުފިޔާއެވެ. މީގެ އިތުރުން، އަހަރީފީގެ ގޮތުގައި 2،000 ރުފިޔާއިން ފެށިގެން އެކި އަގުތައް، އެކި ކެޓަގަރީތަކުގެ ތަންތަނުން ނަގައެވެ. މިއަދުން ފެށިގެން ދެން ދައްކަންޖެހޭނީ މި އަގުތަކުގެ ދެބައިކުޅަ އެއްބައެވެ.

Ad by Hajj Corporation

މިހާރު ނަގާ އަގުތައް:

- ހޮޓާ، ކެފޭ، ރެސްޓޯރެންޓު، ކެންޓީނު ފަދަ އިކޮނޮމިކް މިނިސްޓްރީގައި ރަޖިސްޓްރީކޮށްގެން ހިންގާ ތަންތަނުން 2،000 ރުފިޔާ، އިތުރުވާ ކޮންމެ ބަދިގެ، ސާވިން އޭރިއާއަކަށް 100 ރުފިޔާ. އަދި އިތުރުވާ ކޮންމެ 50 ގޮނޑިއަކަށް ވެސް 100 ރުފިޔާ
- ކޭޓަރިން، ބޭކަރީ އަދި ޕޭސްޓްރީ ޝޮޕްތަކުން 1000 ރުފިޔާ
- ބަތްޕާރުސަލް ހަދައި ވިއްކާ ޓޭކްއަވޭ ތަންތަނުން 2000 ރުފިޔާ
- ވިޔަފާރި އުސޫލުން ކާބޯތަކެތި ތައްޔާރުކޮށް ފޯރުކޮށްދޭ ބަދިގެތަކުން 2،000ރުފިޔާ
- ހެދިކާ ވިއްކާ ތަންތަނުން 2،000ރުފިޔާ
- ޖޫސް ފަދަ ބުއިންތައް އެކަނި ވިއްކާ ތަންތަނުން 2،000ރުފިޔާ
- މަގުމަތީގައި ކާނާ ވިއްކާ ތަންތަނާއި ގާޑިޔާ އަދި އެހެން އުޅަނދުތަކުން 500ރުފިޔާ

ކާބޯތަކެތީގެ ޚިދުމަތްދޭ ތަންތަނުގެ ރަޖިސްޓްރޭޝަން ފީ %50 ކުޑަކުރަން ނިންމާފައިވާއިރު، 2024 ވަނަ އަހަރުގެ އޯގަސްޓުމަހުގެ 23 ވަނަ ދުވަހު ވަނީ ކާބޯތަކެތީގެ ރައްކާތެރިކަމުގެ ޤާނޫނުގެ ދަށުން މޯލްޑިވްސް ފުޑް އެންޑް ޑްރަގް އޮތޯރިޓީއަށް ޤާނޫނީ ޙައިސިއްޔަތު ލިބިފައިވާތީ ރައީސުލްޖުމްހޫރިއްޔާ ވަނީ އެ އޮތޯރިޓީ އަލުން އެކުލަވާލައްވާފައެވެ. ފުޑް އެންޑް ޑްރަގް އޮތޯރިޓީއަށް މި ޤާނުނުގެ ތެރެއިން މަތިކުރާ އެންމެ ބޮޑު އެއް ޒިންމާއަކީ ކާބޯތަކެތީގެ ޚިދުމަތް ދޭ ތަންތަން ދަރަޖަކުރުމާއި ލައިސަންސްދީ ހުއްދަ ދޫކުރުމުގެ މަސައްކަތަކެވެ. މި ބަދަލާއެކު ކާބޯތަކެތީގެ ޚިދުމަތްދޭ ކެފޭ، ހޮޓާ، ރެސްޓޯރަންޓްތައް ރެޖިސްޓްރީކުރުމާއި ހުއްދަ ދިނުމުގެ ކަންކަން ދެން ބަލަހައްޓާނީ މޯލްޑިވްސް ފުޑް އެންޑް ޑްރަގް އޮތޯރިޓީންނެވެ.