އަހަރުގެ ކޮންމެ ދުވަސްވަރެއްގައި ވެސް އުމްރާގެ މަތިވެރި އަޅުކަން އަދާކުރުމުގެ ފުރުސަތު ފަހިކޮށްދިނުމުގެ ގޮތުން، މޯލްޑިވްސް ހައްޖު ކޯޕަރޭޝަނުން "ކުރު އުމްރާ" ގެ ނަމުގައި ހާއްސަ ޕެކޭޖެއް ތައާރަފުކޮށްފިއެވެ.

އެ ކޯޕަރޭޝަނުން ބުނި ގޮތުގައި މިއީ ހައްޖު މޫސުން ފިޔަވައި އަހަރުގެ ކޮންމެ ދުވަސްވަރެއްގައި ވެސް އުމްރާ ކުރެވޭނެ ގޮތަށް ފަރުމާކޮށްފައިވާ ޕެކޭޖެކެވެ.

Ad by Hajj Corporation

މި ޕެކޭޖަކީ އަހަރުގެ ތެރޭގައި ލިބޭ ކުރު ޗުއްޓީތަކުގައި ނުވަތަ އެ ނޫން ވެސް ދުވަސްވަރެއްގައި އާއިލާ އާއި ރަހުމަތްތެރިންނާ އެކު ނުވަތަ އެކަނި އުމްރާ ކުރުމަށް ބޭނުންވާ ފަރާތްތަކަށް ފަސޭހަ އިންތިޒާމުތަކެއް ހަމަޖައްސައިދިނުމަށް ތައާރަފުކުރި ޕެކޭޖެކެވެ. މި ޕެކޭޖުގެ އެންމެ ހާއްސަ ސިފައަކީ ދަތުރުގެ ހުރިހާ ކަމެއް އިހުތިޔާރު ކުރުމުގެ ފުރުސަތު އުމްރާވެރިޔާއަށް އަމިއްލައަށް ލިބިގެންދިއުމެވެ.

ޕެކޭޖުގެ ތަފްސީލުތައް

ހައްޖު ކޯޕަރޭޝަނުން ބުނި ގޮތުގައި މި ޕެކޭޖުގެ ދަށުން އުމްރާ އަށް ފުރާނެ ދުވަހާއި، އެނބުރި އަންނާނެ ދުވަހާއި، ދަތުރުކުރާނެ ފްލައިޓާއި ކްލާސް، އަދި ސައުދީ އަރަބިއްޔާގައި މަޑުކުރާނެ ހޮޓަލާއި ހޮޓާ ހުންނަ ސަރަހައްދު ވެސް އަމިއްލައަށް ކަނޑައެޅޭނެއެވެ. މީގެ އިތުރުން، އެ މީހެއްގެ ބަޖެޓާ އެކަށީގެންވާ ފެންވަރުގެ އުޅަނދުތަކުގައި ދަތުރުކުރުމުގެ އިންތިޒާމު ވެސް ހަމަޖައްސައިދޭނެއެވެ.

ވިޔަފާރި ދަތުރުތަކާ ގުޅުވައިގެން އުމްރާ ކުރަން ބޭނުންވާ ފަރާތްތަކަށް ވެސް މި ޕެކޭޖުގެ ތެރެއިން ހާއްސަ ފުރުސަތުތަކެއް ވަނީ ހުޅުވާލާފައެވެ. އެގޮތުން އުމްރާގެ އަޅުކަމަށް ފަހު ދުބާއީ ފަދަ ގައުމުތަކަށް ވިޔަފާރިކުރަން ދާން ބޭނުންވާ ނަމަ، އެ ކަމަށް ބޭނުންވާ ވިސާގެ އިންތިޒާމުތައް ވެސް ކޯޕަރޭޝަނުން ހަމަޖައްސައިދޭނެއެވެ.

މި ޕެކޭޖުގެ ދަށުން އުމްރާވެރިން ބޭނުންވާ ހާއްސަ ތަންތަނަށް ޒިޔާރަތްކުރުމުގެ އިންތިޒާމު އެންމެ ފަސޭހަ ގަޑިތަކުގައި ހަމަޖައްސައިދޭނެ ކަމަށް ހައްޖު ކޯޕަރޭޝަނުން ބުނެއެވެ. އަދި ގުރޫޕުތަކާ ނުގުޅި، އަމިއްލަ މިނިވަންކަމާ އެކު އަޅުކަން ކުރަން ބޭނުންވާ ފަރާތްތަކަށް ވެސް މިއީ ވަރަށް ރަނގަޅު ފުރުސަތެކެވެ.

ހައްޖު ކޯޕަރޭޝަނުން ބުނީ އުމްރާއަށް ދާން ގަސްދުކުރާ ހިސާބުން ފެށިގެން ދަތުރު ނިމެންދެން ބޭނުންވާ ހުރިހާ ފަންނީ އިރުޝާދާއި އެހީތެރިކަން ފޯރުކޮށްދޭނެ ކަމަށެވެ. "އުމްރާއަށް ދާން ގަސްދުކުރާ ހިސާބުން ފެށިގެން ދަތުރުގެ ފެށުމާ ހަމައަށް ހުރިހާ އިރުޝާދެއް އަޅުގަނޑުމެން ދޭނަމެވެ. އަދި އޮޅުން ފިލުވަން ބޭނުންވާ ކަންކަން އޮޅުންފިލުވައިދީ، ދަތުރާ ގުޅޭ ފަންނީ ތަޖުރިބާ އާއި އެހީތެރިކަމާ ލަފާ ދޭނެ އެވެ،" އެ ކޯޕަރޭޝަނުން ބުންޏެވެ.