ޔޫއެފާ ޗެމްޕިއަންސް ލީގުގައި ރޭ ކުޅުނު ފޯރިގަދަ މެޗުގައި ސްޕެއިންގެ ގަދަބާރު ރެއާލް މެޑްރިޑް 4-2 ގެ ނަތީޖާއަކުން ބަލިކޮށް، ޕޯޗުގަލްގެ ބެންފީކާ އިން މުބާރާތުގެ ޕްލޭއޮފް ބުރުގެ ޖާގައެއް ކަށަވަރުކޮށްފި އެވެ. މި ނަތީޖާއާއެކު ރެއާލް މެޑްރިޑަށް ވަނީ ގަދަ އަށެއްގެ ތެރޭގައި ހިމެނިގެން ދެވަނަ ބުރުގެ ސީދާ ޖާގައެއް ހޯދުމުގެ ފުރުސަތު ގެއްލި، ޕްލޭއޮފް މެޗެއް ކުޅެން ޖެހިފަ އެވެ.

ރެއާލް މެޑްރިޑަށް ކުރިން ގިނަ ކާމިޔާބީތަކެއް ހޯދައިދީފައިވާ ހޯސޭ މޮރީނިއޯގެ އިރުޝާދުގެ ދަށުން ނުކުތް ބެންފީކާ އާއި ދެކޮޅަށް ކުޅުނު މި މެޗުގެ 30 ވަނަ މިނިޓުގައި ކިލިއަން އެމްބާޕޭ ވަނީ ލަނޑެއް ޖަހައި ރެއާލަށް ކުރި ހޯދައިދީފަ އެވެ. ނަމަވެސް އޭގެ ހަ މިނިޓު ފަހުން ބެންފީކާގެ އެންޑްރިއަސް ޝެލްޑްރަޕް ވަނީ ލަނޑެއް ޖަހައި މެޗުގެ ނަތީޖާ އެއްވަރުކޮށްފަ އެވެ. އަދި ފުރަތަމަ ހާފުގެ އިތުރު ވަގުތުގައި ވެންގެލިސް ޕަވްލިޑިސް ޖެހި ލަނޑާއެކު ބެންފީކާ އިން ފުރަތަމަ ހާފު ނިންމާލީ ކުރީގައި އޮވެގެންނެވެ.

Ad by Hajj Corporation

ދެވަނަ ހާފު ފެށިގެން ނުވަވަނަ މިނިޓުގައި ޝެލްޑްރަޕް ވަނީ އޭނާގެ ދެވަނަ ލަނޑު ޖަހައި ދެ ޓީމުގެ ދެމެދުގައިވާ ފަރަގު ބޮޑުކޮށްފަ އެވެ. ރެއާލްގެ ދެވަނަ ލަނޑު މެޗުގެ 58 ވަނަ މިނިޓުގައި ކާމިޔާބުކޮށްދިނީ އެމްބާޕޭ އެވެ. މިއީ މި ސީޒަނުގެ ޗެމްޕިއަންސް ލީގުގެ ފުރަތަމަ ބުރުގައި އޭނާ ކާމިޔާބުކުރި 13 ވަނަ ލަނޑެވެ.

މެޗުގެ ފަހުކޮޅު ރެއާލް މެޑްރިޑަށް އިތުރު މައްސަލަތަކެއް ކުރިމަތިވީ އެ ޓީމުގެ ރައުލް އަސެންސިއޯ އާއި ރޮޑްރިގޯ އަށް ދެވަނަ ރީނދޫ ކާޑާއެކު ރަތް ކާޑު ދައްކައި ދަނޑުން ފޮނުވާލުމުންނެވެ. މި މެޗުގެ އެންމެ ހައިރާންކުރުވަނިވި ވަގުތަކީ މެޗުގެ 98 ވަނަ މިނިޓުގައި ބެންފީކާގެ ގޯލުކީޕަރު އެނެޓޮލީ ޓްރުބިން ކާމިޔާބުކުރި ތާރީޚީ ލަނޑެވެ. އޭނާ މި ލަނޑު ކާމިޔާބުކުރީ ލިބުނު ހިލޭ ޖެހުމެއް ބޮލުން ޖަހައި ގޯލުގެ ތެރެއަށް ފޮނުވާލައިގެންނެވެ.

މި ނަތީޖާއާއެކު ރެއާލް މެޑްރިޑް އޮތީ ކުޅުނު 8 މެޗުން ލިބުނު 15 ޕޮއިންޓާއެކު ތާވަލުގެ 9 ވަނައިގަ އެވެ. ބެންފީކާ އަށް 8 މެޗުން 9 ޕޮއިންޓް ލިބިފައިވާއިރު، އެ ޓީމު އޮތީ ތާވަލުގެ 24 ވަނަ މަގާމުގަ އެވެ. ޗެމްޕިއަންސް ލީގުގެ އާ އުސޫލުގެ ދަށުން ގަދަ އަށް ޓީމަށް ދެވަނަ ބުރުގެ ސީދާ ޖާގައެއް ލިބޭއިރު، 9 ވަނައިން ފެށިގެން 24 ވަނައާ ދެމެދު ހިމެނޭ ޓީމުތަކަށް ޖެހޭނީ ޕްލޭއޮފް ބުރުގައި ވާދަކުރާށެވެ.