ޔޫއެފާ ޗެމްޕިއަންސް ލީގުގައި ރޭ ޑެންމާކްގެ ކޯޕަންހޭގަން އާއި ދެކޮޅަށް ބާސެލޯނާ ކުޅުނު މެޗު 4-1 ގެ ނަތީޖާއަކުން ކާމިޔާބުކޮށް، މުބާރާތުގެ ގަދަ 8 ގެ ޖާގައެއް ބާސެލޯނާއިން ކަށަވަރުކޮށްފިއެވެ. ބާސެލޯނާގެ އަމިއްލަ ދަނޑު ކަމަށްވާ ނޫކޭމްޕްގައި ކުޅުނު މި މެޗުން މޮޅުވުމާއެކު އެޓީމު ވަނީ ތާވަލުގެ ތޭރަވަނައިގައި އޮތުމަށްފަހު ފަސްވަނައަށް އަރާފައެވެ. މިއާއެކު ބާސެލޯނާވަނީ ޕްލޭއޮފް ނޮކްއައުޓްބުރުން ސަލާމަތްވެފައެވެ.

މި މެޗުން ލިބުނު ތިން ޕޮއިންޓާއެކު ބާސެލޯނާއަށް ވަނީ ފުރަތަމަ ބުރުގައި ކުޅުނު 8 މެޗުން ޖުމްލަ 16 ޕޮއިންޓް ލިބިފައެވެ. މިއާއެކު އެޓީމު މިހާރު އޮތީ ތާވަލުގެ ފަސްވަނަ މަގާމުގައެވެ. އަނެއްކޮޅުން މި މެޗުން ބަލިވި ކޯޕަންހޭގަންއަށް ލިބިފައިވާ 8 ޕޮއިންޓާއެކު އެ ޓީމު ވަނީ މުބާރާތުން ކަޓާފައެވެ.

Ad by Hajj Corporation

މެޗު ފެށިގެން ހަތަރުވަނަ މިނިޓުގައި ކޯޕަންހޭގަންގެ ޑައޮއާސަން ލަނޑެއް ޖަހައި ބާސެލޯނާ ސިއްސުވާލިއެވެ. މެޗުގެ ފުރަތަމަ ހާފު ނިމުނުއިރުވެސް 1-0 ގެ ނަތީޖާއަކުން ކުރީގައި އޮތީ ކޯޕަންހޭގަންއެވެ. ނަމަވެސް ދެވަނަ ހާފު ފެށިގެން މާގިނަ އިރުތަކެއް ނުވަނީސް ބާސެލޯނާއިން ވަނީ ކުޅުން ރަނގަޅުކޮށް ނަތީޖާ އަނބުރާލާފައެވެ.

ބާސެލޯނާއަށް މެޗުގެ ނަތީޖާ އެއްވަރުކޮށްދިނީ 48 ވަނަ މިނިޓުގައި ލަމީން ޔަމާލް ދިން ފުރުސަތަކުން ރޮބަޓް ލެވަންޑޯސްކީއެވެ. އޭގެ ފަހުން 60 ވަނަ މިނިޓުގައި ލަމީން ޔަމާލް އަމިއްލައަށް ލަނޑެއް ޖަހައި ބާސެލޯނާއަށް ފުރަތަމަ ފަހަރަށް މެޗުގެ ކުރިހޯދައިދިނެވެ. އަދި 69 ވަނަ މިނިޓުގައި ލިބުނު ޕެނަލްޓީއަކުން ރަފީނިއާ ވަނީ އެޓީމުގެ ތިންވަނަ ލަނޑު ކާމިޔާބުކޮށްދީފައެވެ.

ބާސެލޯނާގެ ހަތަރުވަނަ ލަނޑު މެޗުގެ ފުރިހަމަ ވަގުތު ހަމަވާން ފަސް މިނިޓަށް ވެފައިވަނިކޮށް ކާމިޔާބުކޮށްދިނީ މާކަސް ރަޝްފޯޑްއެވެ. މި މޮޅާއެކު ބާސެލޯނާ ދެން ތައްޔާރުވާނީ މުބާރާތުގެ ގަދަ 16 ގައި ވާދަކުރާށެވެ.