ސްޕެއިންގެ ސައިންސްވެރިން ޕެންކްރިއެޓިކް ކެންސަރަށް (ޗިލްބިލްގަނޑުގެ ކެންސަރު) ކާމިޔާބު ފަރުވާއެއް ހޯދިފައިވާ ކަމަށް ދައުވާކޮށްފިއެވެ. ހަ އަހަރު ދުވަހުގެ މުއްދަތަށް މީދާ ބޭނުންކޮށްގެން ކުރިއަށްގެންދިޔަ މި ދިރާސާ އިސްކޮށް ހިންގެވީ ނޭޝަނަލް ކެންސަރ ރިސާޗް ސެންޓަރުގެ ސައިންސްވެރިއެއް ކަމަށްވާ މަރިއާނޯ ބާބަސިޑް އެވެ. މި ހޯދުންތައް ޖެނުއަރީ 27 ވަނަ ދުވަހު ވަނީ ސައިންޓިފިކް ޖާނަލްއެއް ކަމަށްވާ 'ޕްރޮސީޑިންގްސް އޮފް ދަ ނޭޝަނަލް އެކަޑަމީ އޮފް ސައިންސަސް' (PNAS) ގައި ޝާއިއުކޮށްފައެވެ.

މި ދިރާސާއިން ދެއްކި ގޮތުގައި ތިން ބޭހެއް އެއްކޮށްލައިގެން އުފެއްދި އާ ފަރުވާއަކުން ޕެންކްރިއެޓިކް ޓިއުމަރުތައް މުޅިން ނައްތާލެވުނެވެ. އަދި ފަރުވާ ނިމުނު ފަހުން ވެސް، މީދާތަކުގެ ހަށިގަނޑުން ކެންސަރު އަލުން ފެނިފައެއް ނުވެއެވެ. މިއީ މި ބަލީގެ ފަރުވާގައި ލިބުނު ވަރަށް ބޮޑު ކުރިއެރުމެއްގެ ގޮތުގައި ސައިންސްވެރިން ފާހަގަކުރެއެވެ.

Ad by Hajj Corporation

ތިން ބޭހެއް އެއްކޮށް ބޭނުންކޮށްގެން ދިން ފަރުވާ

މި އާ ފަރުވާގައި ސައިންސްވެރިން ބޭނުންކޮށްފައިވަނީ ޖެމްސިޓަބިން (gemcitabine)، އޯލް-ޓްރާންސް ރެޓިނޮއިކް އެސިޑް (ATRA) އަދި ނެރަޓިނިބް (neratinib) އެވެ. މީގެ ބޭނުމަކީ ކެންސަރު ސެލްތައް ސަލާމަތްވުމަށް ބޭނުންކުރާ އެކި މަގުތައް އެއްފަހަރާ ބަންދުކޮށްލުމެވެ. ދިރާސާވެރިން ބުނާ ގޮތުގައި، މީގެ ސަބަބުން ކެންސަރު ސެލްތަކަށް އާ ހާލަތަށް ހޭނުމުގެ ފުރުސަތު ނުލިބި، ފަރުވާ ކާމިޔާބުވިއެވެ.

ދިރާސާއިން ދައްކާ ގޮތުގައި މި ތިން ބޭސް ވެސް ކެންސަރަށް ހަމަލާދެނީ ތަފާތު ގޮތްގޮތަށެވެ. ޖެމްސިޓަބިން އިން ހަލުވިކަމާއެކު އިތުރުވަމުންދާ ކެންސަރު ސެލްތައް މަރާލާއިރު، ATRA އިން ޓިއުމަރުގެ ވަށައިގެން އުފެދިފައިވާ ރައްކާތެރި ފަށަލަ ބަލިކޮށްލައެވެ. އަދި ނެރަޓިނިބް އިން ޓިއުމަރު ބޮޑުވުމަށް ބޭނުންވާ ސިގްނަލްތައް ހުއްޓުވައެވެ. "ޕެންކްރިއެޓިކް ކެންސަރު އެންމެ ބޭހަކުން ނައްތާނުލެވޭނެ،" މަރިއާނޯ ބާބަސިޑް ވިދާޅުވެފައިވެއެވެ.

ނުރައްކާތެރި ބައްޔެއްގެ އާ އުންމީދެއް

ޕެންކްރިއެޓިކް ކެންސަރަކީ އެންމެ ނުރައްކާތެރި ކެންސަރުގެ ބާވަތްތަކުގެ ތެރޭގައި ހިމެނޭ އެކެކެވެ. މި ބަލި ޖެހޭ މީހުންގެ ތެރެއިން ފަސް އަހަރު ދުވަހު ދުނިޔޭގައި ތިބެވެނީ ގާތްގަނޑަކަށް %10 މީހުންނަށެވެ. މީގެ މައިގަނޑު ސަބަބަކީ ބަލީގެ ކުރީކޮޅު މިއީ ދެނެގަންނަން ވަރަށް އުނދަގޫ ބައްޔަކަށް ވުމެވެ. އާންމުގޮތެއްގައި ބަލީގެ އަލާމާތްތައް ފެންނަން ފަށަނީ ކެންސަރު ވަރަށް ބޮޑަށް ފެތުރޭ ފަހުންނެވެ. އެޕަލްގެ ކުރީގެ ސީއީއޯ ސްޓީވް ޖޮބްސް 2011 ވަނަ އަހަރު މަރުވީ ވެސް މި ބަލީގައެވެ.

މި ދިރާސާގައި ބައިވެރިނުވާ ސައިންސްވެރިން ވެސް ބުނެފައިވަނީ ޕެންކްރިއެޓިކް ކެންސަރު އަލުން ނުފެންނަ ގޮތަށް މިފަދަ ނަތީޖާއެއް ލިބުމަކީ ވަރަށް މަދުން ނޫނީ ނުވާ ކަމެއް ކަމަށެވެ. މިއީ އިންސާނުންގެ ހަށިގަނޑުގައި މި ފަރުވާ ބޭނުންކުރުމަށް މަގުފަހިވެގެންދާނެ މުހިންމު ހޯދުމެކެވެ.

ޕެންކްރިއެޓިކް ކެންސަރަކީ ކޮބާ؟

އަހަރެމެންގެ ބަނޑުގެ ފަހަތުގައި މަހެއްގެ ބައްޓަމަށް އިންނަ ގުނަވަނަކީ ޕެންކްރިއަސް އެވެ. މިއީ ހަށިގަނޑުގެ ގުނަވަނެއްގެ އިތުރުން ގްލޭންޑެއްގެ ގޮތުގައި ވެސް މަސައްކަތްކުރާ މުހިންމު ބައެކެވެ. މީގެން ހަށިގަނޑު ދުޅަހެޔޮކޮށް ބެހެއްޓުމަށް އެހީތެރިވެދޭ އެންޒައިމްތަކާއި ހޯރމޯންތައް ދޫކުރެއެވެ.

ހަށިގަނޑުގެ އެހެން ސެލްތަކެކޭ އެއްފަދައިން، ޕެންކްރިއަސްގެ ސެލްތައް ވެސް ވަކި އުސޫލަކުން އުފެދި މަރުވެއެވެ. މަރުވާ ސެލްތަކުގެ ބަދަލުގައި ދުޅަހެޔޮ ސެލްތައް އުފެދެއެވެ. ނަމަވެސް ކެންސަރު ޖެހުމުން މި އުސޫލު މެދުކެނޑި، ސެލްތައް އާންމު މިންވަރަށްވުރެ މާ ހަލުވިކޮށް އިތުރުވާން ފަށައެވެ. މިއަށް ކިޔަނީ ޕެންކްރިއެޓިކް ކެންސަރެވެ.

ޕެންކްރިއެޓިކް ކެންސަރުގެ އެންމެ ނުރައްކާތެރި ކަމަކީ ބަލީގެ ކުރީކޮޅު އެއްވެސް އަލާމާތެއް ނުފެނުމެވެ. އާންމުކޮށް އަލާމާތްތައް ފެންނަން ފަށަނީ ޓިއުމަރުގެ ސަބަބުން ހަޖަމުކުރާ ނިޒާމުގެ އެހެން ގުނަވަންތަކަށް އަސަރުކުރަން ފެށުމުންނެވެ.

ޕެންކްރިއެޓިކް ކެންސަރުގެ ނުރައްކާ އެންމެ ބޮޑީ ކޮން ބަޔަކަށް؟

ޕެންކްރިއެޓިކް ކެންސަރު ޖެހުމުގެ ފުރުސަތު ބޮޑުވަނީ އަންނަނިވި ހާލަތްތަކުގައެވެ:
ކަނޑައެޅިގެން ބަޔާންކުރެވިފައިވާ މިންވަރަށްވުރެ ގިނައިން ބޮލާއި ކަރުގެ މަސްތުވާތަކެތި ބޭނުންކުރުން
ދުންފަތުގެ އިސްތިއުމާލުކުރުން ނުވަތަ ކޮންމެ ސިފައެއްގައިވެސް ދުންފަތް ބޭނުންކުރުން
ގިނަގިނައިން ފާސްޓް ފުޑް އަދި އަލްޓްރާ-ޕްރޮސެސްޑް ކާނާ ކެއުން
ބަރުދަން އިތުރުވުން، ހާއްސަކޮށް އުނަގަނޑު ވަށައިގެން ސަރުބީ ޖެހުން
ހަކުރު ބަލި، ވަކިން ހާއްސަކޮށް ޓައިޕް 2 ޑައިބެޓީސް؛ ކުއްލިއަކަށް ޓައިޕް 2 ޑައިބެޓީސް ޖެހުމަކީ މި ބަލީގެ އިންޒާރަކަށް ވެދާނެއެވެ
ޕެސްޓިސައިޑްސް (ސޫފާސޫފި މަރާ ބޭސް) އަދި ޕެޓްރޯކެމިކަލްސް އަށް ހުށަހެޅުން
ގިނަ ދުވަސްވީ ޕެންކްރިއެޓައިޓިސް (ޕެންކްރިއަސް ދުޅަވުން)، މިއީ ފަހުން ޕެންކްރިއެޓިކް ކެންސަރަށް ބަދަލުވެދާނެ ކަމެކެވެ
އާއިލީ ގޮތުން ވާރުތަވާ ޖެނެޓިކް މިއުޓޭޝަންތަކުގެ ސަބަބުން ޖެހޭ ދާއިމީ ޕެންކްރިއެޓައިޓިސް

ޕެންކްރިއެޓިކް ކެންސަރަކީ ފަރުވާ ކުރެވޭ ބައްޔެއް ހެއްޔެވެ؟

ޕެންކްރިއެޓިކް ކެންސަރު ޖެހޭ މީހުން ސަލާމަތްވުމުގެ ނިސްބަތް ވަރަށް ދަށެވެ. ނަމަވެސް، ބަލީގެ ކުރީކޮޅު ދެނެގަނެވިއްޖެނަމަ، ފަރުވާ ކާމިޔާބުވުމުގެ ފުރުސަތު އޮވެއެވެ. ޕެންކްރިއެޓިކް ކެންސަރުން މުޅިން ފަސޭހަވުމަށް އާންމުކޮށް ބޭނުންވަނީ އޮޕަރޭޝަން ކޮށްގެން ޓިއުމަރު ނެގުމެވެ.

ޕެންކްރިއެޓިކް ކެންސަރަށް ހުރި ފަރުވާތައް

އޮޕަރޭޝަން: ކެންސަރު ޕެންކްރިއަސް ނޫން އެހެން ގުނަވަންތަކަށް ފެތުރިފައި ނުވާނަމަ އަދި އޮޕަރޭޝަން ކޮށްގެން މުޅިން ނެގޭނަމަ
ވިޕްލް ޕްރޮސީޖަރ: ކެންސަރު ޓިއުމަރު ހުރީ ޕެންކްރިއަސްގެ މަތީ ބައިގައި ނަމަ، އެ ބައި އޮޕަރޭޝަން ކޮށްގެން ނެގުން
ޑިސްޓަލް ޕެންކްރިއެކްޓޮމީ: ޓިއުމަރު ހުރީ ޕެންކްރިއަސްގެ ތިރީ ބައިގައި ނަމަ، އެ ބައި އޮޕަރޭޝަން ކޮށްގެން ނެގުން
ޓޯޓަލް ޕެންކްރިއެކްޓޮމީ: ޕެންކްރިއަސްގެ ހުރިހާ ހިސާބަކަށް ކެންސަރު ފެތުރިފައިވާނަމަ، މުޅި ޕެންކްރިއަސް ނަގަން ޖެހިދާނެއެވެ. ނަމަވެސް މިއީ ވަރަށް މަދުން ނޫނީ ކުރާ ކަމެއް ނޫނެވެ
ކީމޯތެރަޕީ: ކެންސަރު ސެލްތައް މެރުމަށް، ކުޑަކުރުމަށް ނުވަތަ ކޮންޓްރޯލް ކުރުމަށް ބޭނުންކުރެވޭ ފަރުވާއެއް
ރޭޑިއޭޝަން ތެރަޕީ: ބަލި ބޮޑުވެފައިވާ ހާލަތްތަކުގައި ކީމޯތެރަޕީއާ އެކު ދެވޭ ފަރުވާއެއް

މާރިއާނޯ ބާބަސިޑް އިންސާނުންގެ ކެންސަރު ޖީން ދެނެގަތުމަށް އެހީތެރިވެދިން

މާރިއާނޯ ބާބަސިޑް އަކީ ޔޫރަޕްގެ ފާހަގަކޮށްލެވޭ ކެންސަރު ސައިންސްވެރިއެކެވެ. 1980 ގެ އަހަރުތަކުގައި އޭނާ ވަނީ އިންސާނުންގެ ފުރަތަމަ ކެންސަރު ޖީން ދެނެގަތުމަށް އެހީތެރިވެދީ، ކެންސަރުގެ ދިރާސާތައް ކުރިއަށްދާ މިސްރާބު ބަދަލުކޮށްލާފައެވެ. ފާއިތުވި އަހަރުތަކުގައި އޭނާ މަސައްކަތް ކުރަމުން އަންނަނީ ގިނަ ޕެންކްރިއެޓިކް ކެންސަރު ކޭސްތަކުން ފެންނަ KRAS ޖީންއާ ގުޅުންހުރި ކެންސަރުތަކާ ބެހޭގޮތުންނެވެ.

މި ދިރާސާ ކުރިއަށް ގެންގޮސްފައިވަނީ ސްޕެއިންގެ ނޭޝަނަލް ކެންސަރު ރިސާޗް ސެންޓަރުގައެވެ. އަދި މިއީ ފަންޑަސިއޮން ކްރިސް ކޮންޓްރާ އެލް ކެންސަރުގެ އެހީތެރިކަމާއެކު ކުރިއަށް ގެންދިޔަ ދިރާސާއެކެވެ. އެ އިންސްޓިޓިއުޓުން ބުނި ގޮތުގައި މި ދިރާސާ ކުރިއަށް ގެންގޮސްފައިވަނީ ސައިންޓިފިކް ހުރިހާ އުސޫލުތަކަކަށް ތަބާވެ، ޝާއިއުކުރުމުގެ ކުރިން ފުރިހަމައަށް ރިވިއުކުރުމަށްފަހުގައެވެ.

ދެން އޮތް ފިޔަވަޅަކީ ރައްކާތެރިކަމުގެ ޓެސްޓުތައް ފުރިހަމަކުރުމެވެ. ހުއްދަތައް ލިބުމާއެކު، އިންސާނުން ބޭނުންކޮށްގެން ކުރާ ކުރީކޮޅުގެ ޓްރަޔަލްތައް ފެށޭނެއެވެ. މާހިރުން ބުނާ ގޮތުގައި މި ފަރުވާ ބަލިމީހުންނަށް ލިބެން އަދި ދުވަސް ނަގާނެއެވެ. ނަމަވެސް، މި ދިރާސާއިން ދައްކާ ގޮތުގައި އެކި ބޭސްތައް އެއްކޮށް ބޭނުންކުރުމަކީ ޕެންކްރިއެޓިކް ކެންސަރާ ދެކޮޅަށް ކުރާ މަސައްކަތުގައި މާ ނަތީޖާ ރަނގަޅު ކަމެކެވެ.