އެފްއޭއެމުގެ އެއްވެސް ހުއްދައެއް ނެތި އެ އިދާރާގެ ގަވާއިދުތަކާ ހިލާފަށް ކުރީގެ މެނޭޖްމަންޓުން މާފަންނު ސްޓޭޑިއަމް ސަރަހައްދުގައި އެކި ކަންކަމަށް ދޫކޮށްފައިވާ ބިންތަކުގައިވާ އެއްވެސް އެއްޗަކަށް މީގެ ހަތް ދުވަސް ފަހުން ލިބޭ ގެއްލުމަށް ޒިންމާ ނުވާނެ ކަމަށް ފުޓްބޯޅަ އެސޯސިއޭޝަން އޮފް މޯލްޑިވްސްއިން ބުނެފި އެވެ.

ގައުމީ ފުޓްބޯޅަ އިދާރާއިން މިހެން ބުނީ އެ ބިންތައް ހުސްކޮށް ކުރަން ދިން 14 ދުވަހުގެ ތެރޭގައި ބިންތައް ހުސްކޮށްފައިނުވާތީ އެވެ. އެފްއޭއެމުން ބުނީ ބިންތައް ހުސްކުރަން މިއަދުން ފެށިގެން ހަތް ދުވަސް ދީފައިވާ ކަމަށާއި "އޭގެ ފަހުން އެ ބިމުގައިވާ މުދަލަކަށް، ނުވަތަ އުޅަނދަކަށް ނުވަތަ ވަގުތީ ގޮތުން ހަދާފައިވާ އިމާރާތަކަށް ލިބޭ ގެއްލުމުގެ ޒިންމާ ފުޓްބޯޅަ އެސޯސިއޭޝަނުން ނުވާނެކަން އަންގާ ދިވެހި ސަރުކާރުގެ ގެޒެޓުގައި އިއުލާން"ކުރާ ކަމުގައެވެ.

Ad by Hajj Corporation

ބިންތައް ދޫކޮށްފައިވާ ގޮތް، އެފްއޭއެމްގެ މިހާރުގެ މެނޭޖްމަންޓުން ބެލިއިރު އެ އިދާރާގެ އެއްވެސް ލިޔެކިއުމަކުން އެކަން ކުރަން ފާސްކޮށްފައިވާކަން ފެންނާކަށް ނެތެވެ. ނަމަވެސް ބިންތަކުގައި މަސައްކަތްކުރާ ފަރާތްތަކުން ބުނަނީ ކުރީގެ މެނޭޖްމަންޓުން ހަދާފައިވާ އެގްރީމަންޓްތައް އެބަހުރި ކަމަށެވެ. އެފްއޭއެމުގެ މިފަދަ އެތައް މައްސަލައެއް މިހާރުވެސް ކޯޓު މަރުހަލާގައި އެބަހުއްޓެވެ.

މި ބިންތަކަކީ ރާއްޖޭގައި ފުޓްބޯޅަ ތަރައްގީކުރުމަށް ސަރުކާރުން 50 އަހަރުގެ މުއްދަތަކަށް އެފްއޭއެމަށް ދީފައިވާ ބިންތަކެކެވެ. އަދި ފީފާއިން ވަނީ ފުޓްބޯޅަ ދަނޑުތަކެއް އެޅުމަށް އެފްއޭއެމަށް އެހީދީފައެވެ. މި ފައިސާ އަށް ވީނުވީއެއްވެސް ވަނީ ނޭނގިފަ އެވެ.